ខេត្តកំពង់ស្ពឺ ៖ ឧត្តមសេនីយ៍យោធាពាក់ផ្កាយ៣ម្នាក់ ត្រូវបានមន្ត្រីមន្ទីររ៉ែ និងថាមពលខេត្តកំពង់ស្ពឺ និងប្រជាពលរដ្ឋនៅក្បែរកន្លែងកើតហេតុ រិះគន់គ្រប់ៗគ្នាថា និយាយស្តីគ្មានសុជីវធម៌សោះ។ ពួកគេរិះគន់ថា មន្ត្រីមានឋាន្តនរស័ក្តិពាក់ផ្កាយដល់ទៅ៣ នៅលើស្មាទៅហើយ ប៉ុន្តែបែរជាមកស្រែកជេរប្រមាថមន្ត្រីជំនាញ និងប្រធានមន្ទីររ៉ែ និងថាមពលខេត្តកំពង់ស្ពឺ យ៉ាងចាស់ដៃ ខណៈមន្ត្រីជំនាញបានចុះទៅពិនិត្យក្រុមឈ្មួញរកស៊ីជីកកាយយកអាចម៍ដីលក់ មិនបានសុំច្បាប់អនុញ្ញាត ហើយត្រូវបាន លោកផ្កាយ៣ ឈ្មោះ ណូន រ៉ន ដែលជាអ្នកកាងនៅពីក្រោយខ្នងមិនគោរពច្បាប់ ដោយបានយកច្បាប់ព្រៃ និងអំណាចរបស់ខ្លួន មកគំរាមមន្ត្រីជំនាញទៅវិញ។
តាមការអះអាង របស់ លោក ផាន់ ឧត្តម អាយុ ២៦ឆ្នាំ ជាមន្ត្រីមន្ទីររ៉ែ និងថាមពលខេត្តកំពង់ស្ពឺ រស់នៅក្នុងភូមិពាណិជ្ជកម្ម សង្កាត់រកាធំ ក្រុងច្បារមន ខេត្តកំពង់ស្ពឺ បានផ្តល់សម្ភាសន៍ឲ្យក្រុមអ្នកកាសែតប្រចាំខេត្តកំពង់ស្ពឺ ដឹងថា កាលពីព្រឹកថ្ងៃទី៧ ខែសីហា ឆ្នាំ២០១៨កន្លងទៅ គណៈបញ្ជាការឯកភាពស្រុកសំរោង បានដឹកនាំកម្លាំងចម្រុះចុះពិនិត្យមើលដំណាំស្រែស្រូវ របស់ប្រជាពលរដ្ឋនៅក្នុងឃុំត្រពាំងគង ស្រុកសំរោងទង ខេត្តកំពង់ស្ពឺ។ បន្ទាប់ពីចុះពិនិត្យរួចហើយ កម្លាំងចម្រុះក៏ប្រទះឃើញមានក្រុមឈ្មួញមួយក្រុម ដែលរកស៊ីជីកកាយអាចម៍ដីលក់ ដោយសង្ស័យថា មិនមានសុំច្បាប់អនុញ្ញាត ក៏ទូរស័ព្ទទៅខាងមន្ត្រីជំនាញរ៉ែ និងថាមពល ឲ្យចុះ ទៅពិនិត្យ និងសួរនាំរឿងជីកកាយមានច្បាប់ត្រឹមត្រូវឬយ៉ាងណា?។
លោកបន្តទៀតថា បន្ទាប់ពីទទួលបានព័ត៌មានខាងលើរួចហើយ រូបលោករួមជាមួយមន្ត្រីចំនួន២នាក់ទៀត រួមដំណើររថយន្តមួយគ្រឿង បានចុះទៅសួរនាំតៃកុងរថយន្តដឹកដីនោះ ដោយនិយាយថា គ្រឿងចក្រ ដែលកំពុងជីកកាយយកអាចម៍ដីនោះ មានថៅកែ ឈ្មោះ លឹម ហេង ដែលរស់នៅម្តុំផ្សារព្រៃផ្តៅ ហើយការជីកកាយយកអាចម៍ដីនេះ ធ្វើឡើងនៅក្នុងភូមិលំពែងព្រះរាម ឃុំត្រពាំងគង ស្រុកសំរោងទង ខេត្តកំពង់ស្ពឺ។
មន្ត្រីដដែលបន្តថា បន្ទាប់មក ពួកគាត់បានទូរស័ព្ទទៅលោក លឹម ហេង ដើម្បីសួរនាំ និងណែនាំឲ្យសុំច្បាប់ទម្លាប់ត្រឹមត្រូវតាមច្បាប់រដ្ឋកំណត់ ហើយលោក លឹម ហេង បានណាត់ក្រុមការងារទៅជួបនៅមុខបន្ទាយទាហានទន្លេរកន្ទិល ក៏ស្រាប់តែលេចមុខ លោកផ្កាយ៣ម្នាក់ អតីតបម្រើការងារនៅបន្ទាយទន្លេរកន្ទិលនេះ បច្ចុប្បន្នទៅបម្រើការងារនៅអគ្គហើយ មកអះអាងកាងស្រែកឡូឡា ជេរប្រមាថធ្ងន់ៗដល់ មន្ត្រីរ៉ែ និងថាមពលខេត្តកំពង់ស្ពឺ។ មិនតែប៉ុណ្ណោះ លោកផ្កាយ៣រូបនេះ ក៏បានជេរប្រមាថទាំងលោកប្រធានមន្ទីររ៉ែ និងថាមពល នូវពាក្យអសុរោះថែមទៀត។
ចំពោះទង្វើ របស់លោកផ្កាយ៣ខាងលើនេះ បានធ្វើឲ្យប្រជាពលរដ្ឋអ្នកធ្វើដំណើរ ឆ្លងកាត់ បាននាំគ្នារិះគន់ថា មានបុណ្យស័ក្ត័ធំរហូតដល់ពាក់ផ្កាយ៣ លើស្មារទៅហើយនោះ គ្រាន់តែមន្ត្រីជំនាញ មកសួរនាំរឿងជីកកាយដីមានច្បាប់ទម្លាប់ដែរឬអត់ ហេតុអ្វីអាងអំណាចរបស់ខ្លួនមកជេរប្រមាថ មាក់ងាយមន្ត្រីតូចតាចជាងខ្លួនបែបនេះទៅវិញ។
បើតាមការអះអាងរបស់មន្ត្រីដដែល លោកផ្កាយ៣រូបនោះ ឡើងបុណ្យតាមខ្សែស្រឡាយប៉ុណ្ណោះ ហើយតែងតែអួតក្តែងៗថា មិនខ្លាចអ្នកណានោះទេ (អ្នកណាមិនស្គាល់អញ នៅលំពែងព្រះរាមនេះ)។
ប្រភពថា ការលើកឡើង របស់លោកផ្កាយ៣នេះ ហាក់បីដូចជាមិនគោរពសិទ្ធិអ្នកដទៃឡើយ ធ្វើអ្វីអាងអំណាចបុណ្យស័ក្តិរបស់ខ្លួន តើមន្ត្រីមានចរិកបែបនេះ តើគួរឲ្យប្រជាពលរដ្ឋ និងមន្ត្រីថ្នាក់ក្រោយគោរពដែរឬទេ?។
ដោយឡែក ប្រជាពលរដ្ឋម្នាក់ មានមុខរបរជាអ្នកប្រមូលសំរាម បាននិយាយឲ្យដឹងថា កន្លងមក លោកផ្កាយ៣រូបនោះ ធ្លាប់សុំស្រាបៀរ លោកចំនួន១០កេស យកទៅជប់លៀងក្នុងកម្មវិធីមួយ ប៉ុន្តែលោកគ្មានលទ្ធភាពឲ្យ ស្រាប់តែលោកផ្កាយ៣ ខឹងកៀងគរប្រមូលប្រជាពលរដ្ឋផ្តិតមេដៃថា កន្លែងចាក់សំរាម របស់លោកប៉ះពាល់បរិស្ថានទៅវិញ ធ្វើឲ្យលោកខកខានខាតដំណើរការអាជីវកម្មប្រមូលសំរាមមួយរយៈពេលទៅ។
ដោយសារទង្វើទាំងនេះហើយ បានជាប្រជាពលរដ្ឋលើកឡើងថា លោកផ្កាយ៣រូបនេះ អាងអំណាច ធ្វើអ្វីមិនគិត។ ដូចនេះ បានសំណូមពរដល់ថ្នាក់លើ ពិសេសសម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា មេត្តាជួយពិនិត្យមើលទង្វើ របស់លោកផ្កាយ៣ខាងលើ ដោយអនុគ្រោះផង។
យ៉ាងនេះក្តី មិនទាន់មានប្រភពទាក់ទង លោក ណូន រ៉ន ដែលមន្ត្រីមន្ទីររ៉ែ និថថាមពលខេត្តកំពង់ស្ពឺ អះអាងថា ពាក់ផ្កាយ៣ខាងលើ ដើម្បីបំភ្លឺជុំវិញ ការចោទប្រកាន់បានទេ នៅថ្ងៃសុក្រ ទី១០ ខែសីហា ឆ្នាំ២០១៨នេះ៕ ដោយ ៖ ដែនសីមា