ភ្នំពេញ ៖ នារសៀលថ្ងៃពុធ ទី២៩ ខែឧសភា ឆ្នាំ២០២៤នេះ ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានអញ្ជើញដឹកនាំកិច្ចប្រជុំស្តីពី វឌ្ឍនភាពកិច្ចប្រតិបត្តិការចុះសិក្សា និងបោសសម្អាតគ្រាប់យុទ្ធភណ្ឌមិនទាន់ផ្ទុះក្នុងនាវាដែលលិចនៅបាតទន្លេ និងសមុទ្រ នៅសាលប្រជុំទីស្តីការក្រសួងមហាផ្ទៃ ។
កិច្ចប្រជុំនេះមានការចូលរួមពីក្រុមការងារអន្តរក្រសួង ដើម្បីចុះសិក្សា និងដោះស្រាយករណីរកឃើញគ្រាប់យុទ្ធភណ្ឌមិនទាន់ផ្ទុះក្នុងនាវាលិចក្នុងទន្លេ និងសមុទ្រ ដែលមានសមាសភាពមកពីក្រសួងមហាផ្ទៃ ក្រសួងការពារជាតិ ក្រសួងសេដ្ឋកិច្ចនិងហិរញ្ញវត្ថុ ក្រសួងរ៉ែ និងថាមពល អង្គភាពស៊ីម៉ាក់ អង្គភាពកំពង់ផែស្វយ័តភ្នំពេញ និងថ្នាក់ដឹកនាំរដ្ឋបាលខេត្តពាក់ព័ន្ធមួយចំនួនទៀត។
ឯកឧត្តមអភិសន្តិបណ្ឌិត បានវាយតម្លៃខ្ពស់ និងសម្តែងនូវការកោតសរសើរក្រុមការងារ ជាពិសេសកងកម្លាំងប្រតិបត្តិការផ្ទាល់ ដែលមានកងកម្លាំងនៃអង្គភាពអិនភីម៉ិច អង្គភាពស៊ីម៉ាក់ បញ្ជាការដ្ឋានទ័ពពិសេស ៩១១ កងកម្លាំងនគរបាលជាតិ ដែលលះបង់កម្លាំងកាយ កម្លាំងចិត្ត ពុះពារគ្រប់ឧបសគ្គ ចុះមុជទឹកក្នុងបាតទន្លេ ដើម្បីរាវរកគ្រាប់ និងបីគ្រាប់ឡើងពីបាតទន្លេ ប្រកបដោយជោគជ័យជាបន្តបន្ទាប់។
យោងតាមរបាយការណ៍ ក្រុមការងារបានសិក្សាស្រាវជ្រាវនូវទីតាំងនាវាដឹកគ្រាប់ដែលលិចតាមដងទន្លេមេគង្គ តាមដងទន្លេនានា និងក្នុងសមុទ្រជាច្រើនទីតាំង ក្នុងនោះបានបញ្ចប់ដោយជោគជ័យនៅឃុំមានជ័យ ស្រុកស្រីសន្ធរ ខេត្តកំពង់ចាម ដោយស្រង់គ្រាប់យុទ្ធភណ្ឌមិនទាន់ផ្ទុះគ្រប់ប្រភេទបានចំនួន ១០៩.១០៤គ្រាប់ ស្មើនឹង ១៦តោន នាវាចម្បាំង១គ្រឿង និងវត្ថុតាងមួយចំនួនទៀត។
ក្រុមការងារក៏បាននិងកំពុងបន្តប្រតិបត្តិការនៅទីតាំងឃុំកោះចេក ស្រុមពាមជរ ចាប់ពីថ្ងៃទី៧ ខែកុម្ភៈ ឆ្នាំ២០២៣ ដល់បច្ចុប្បន្ន នៅទីតាំងក្នុងឃុំកោះរការ ស្រុកពាមជរ ខេត្តព្រៃវែង និងឃុំព្រែកសំបួរ ស្រុកពាមជរ ខេត្តព្រៃវែង ចាប់ពីខែកុម្ភៈ ឆ្នាំ២០២៤ ដោយរុករកឃើញ និងស្រង់គ្រាប់យុទ្ធភណ្ឌចំនួន ២៣.៧២២គ្រាប់ ស្មើនឹង ២០២,៥៩តោន បំណែកដែកនាវា ព្រមទាំងអំបែងយុទ្ធភណ្ឌសង្គ្រាម ទម្ងន់ ២៥,៤៩តោន។
ក្នុងឱកាសនោះដែរ ឯកឧត្តមអភិសន្តិបណ្ឌិត ស សុខា ក៏បានបញ្ជាក់ពីការត្រៀមដឹកនាំប្រតិភូអន្តក្រសួង ដើម្បីចុះពិនិត្យស្ថានភាពជាក់ស្ដែងដែលកំពុងប្រតិបត្តិការនាពេលខាងមុខ និងបានណែនាំក្រុមការងារបន្តយកចិត្តទុកដាក់ស្រាវជ្រាវទីតាំងថ្មីៗបន្ថែមទៀត ព្រមទាំងបន្តយកចិត្តទុកដាក់ជាប់ជាប្រចាំចំពោះសុវត្ថិភាពក្រុមប្រតិបត្តិការ ទាំងការស្រង់ប្រមូលមកលើគោក ការដឹកជញ្ជូន និងការសម្អាត៕ រក្សាសិទ្ធដោយ ៖ សុទ្ធលី
![](https://cen.com.kh/wp-content/uploads/2024/05/7b1e8b6a253bdd30861ac3dece430081-1024x683.jpg)
![](https://cen.com.kh/wp-content/uploads/2024/05/282f7ead306e1934c797190297cb75ab-1024x683.jpg)
![](https://cen.com.kh/wp-content/uploads/2024/05/77086a969a30728e62c6179324998deb-1024x683.jpg)
![](https://cen.com.kh/wp-content/uploads/2024/05/73ef6e314745959f1ffd42c2c7146ab5-1024x724.jpg)
![](https://cen.com.kh/wp-content/uploads/2024/05/f403dac00cc48e1fddae03730c966c29-1024x683.jpg)
![](https://cen.com.kh/wp-content/uploads/2024/05/00c4b39edfb11fd644ecb18242013282-1024x701.jpg)
![](https://cen.com.kh/wp-content/uploads/2024/05/d4243c1385a78c3ae5428335a61e9028-1024x712.jpg)
![](https://cen.com.kh/wp-content/uploads/2024/05/831a0e08c8379429cb74a3130c9bea2b-1024x683.jpg)
![](https://cen.com.kh/wp-content/uploads/2024/05/6b18072bf98aa27bf6a330f0d43d9079-1024x683.jpg)
![](https://cen.com.kh/wp-content/uploads/2024/05/39d66c2a0cd81fa5e1d62d06768fec6c-1024x683.jpg)
![](https://cen.com.kh/wp-content/uploads/2024/05/a13be95fc6628a4f48ce05a54515ea35-1024x683.jpg)
![](https://cen.com.kh/wp-content/uploads/2024/05/75b46efed058db9f704812bc0720108e-1024x727.jpg)
![](https://cen.com.kh/wp-content/uploads/2024/05/cc6f6a412f50e510805100b09227c9dc-1024x683.jpg)
![](https://cen.com.kh/wp-content/uploads/2024/05/33d994a4a4d8a64a94ed8e29db9cdbdd-1024x683.jpg)
![](https://cen.com.kh/wp-content/uploads/2024/05/cbccf1e7c90dc7eb1a4d224e2b14bd5a-1024x683.jpg)
![](https://cen.com.kh/wp-content/uploads/2024/05/eb389766aa3d6b54c6460cfad693ab3b-1024x683.jpg)
![](https://cen.com.kh/wp-content/uploads/2024/05/a3b683268125af865350cb53ee85f9ce-1024x683.jpg)
![](https://cen.com.kh/wp-content/uploads/2024/05/58e7257643149c236fc9dc2bc852dc21.jpg)
![](https://cen.com.kh/wp-content/uploads/2024/05/8c5378cf42bd8635cedb24c5e8e6d2b0.jpg)
![](https://cen.com.kh/wp-content/uploads/2024/05/9344200e6697bd32806263a2f1daa333-1024x683.jpg)