Friday, May 31, 2024

ទំនាក់ទំនង : 0716140005

Address : #16 (Borey New World) St. 6A sk . Phnom Penh Thmey kh. Sen Sok ct., Phnom Penh 120913 Office: +85523232725 Tel: 017 93 61 91

រដ្ឋបាលខេត្ត​ព្រះសីហនុ ហាម​មិន​ឲ្យ​សង់​សំណង់​អត់​ច្បាប់ នៅតាម​តំបន់ឆ្នេរ និង​សង់​រំលោភ​ដី​ចំណីផ្លូវ​សាធារណៈ​

spot_img

​ព្រះសីហនុ​៖ រដ្ឋបាល​ក្រុង​-​ខេត្ត​ព្រះសីហនុ ព្រមាន​ចាត់វិធានការ​តាមផ្លូវ​ច្បាប់ ទៅលើ​ម្ចាស់​សំណង់​សង់ សង់​អត់​ច្បាប់​អនុញ្ញាត ពី​អាជ្ញាធរ​ស្ថាប័ន​ពាក់ព័ន្ធ ដែល​នាំ​ឲ្យ​ប៉ះពាល់​ដល់​ដី​តំបន់​ឆ្នេរសមុទ្រ និង​ដី​ចំណីផ្លូវ​សាធារណៈ នា​មូលដ្ឋាន​ខេត្ត​ជាប់​ឆ្នេរសមុទ្រ​មួយ​នេះ ឲ្យ​បាន​ធ្ងន់ធ្ងរ ដើម្បី​ជាការ​ព្រមាន​។​​មន្ត្រី​ឃ្លាំមើល​សង្គម គ្មាន​ជំនឿ​ថា អាជ្ញាធរ នឹង​ចុះ​អនុវត្ត​ការងារ​នេះ មាន​ប្រសិទ្ធភាព​ទេ​។​

​អភិបាលរងក្រុង​ព្រះសីហនុ លោក សន កុសល ដែល​បាន​ដឹកនាំ​មន្ត្រី​ចុះទៅ​ណែនាំ​ដល់​អាជីវករ​អ្នកលក់ដូរ នៅតាម​តំបន់ឆ្នេរ កាលពី​ព្រឹក​ថ្ងៃ​អង្គារ ទី​២១ ខែវិច្ឆិកា ព្រមាន​ថា ចាប់ពីពេលនេះ​តទៅ អាជីវករ​លក់ដូរ​នៅតាម​ដងផ្លូវ​សាធារណៈ​នានា ជាពិសេស​តាម​តំបន់ឆ្នេរ​សមុទ្រ ដែល​បាន​សង់រោង និង​ស្តង់​លក់ដូរ​វត្ថុ​អនុស្សាវរីយ​ជូន​ភ្ញៀវទេសចរ ត្រូវ​រៀបចំ​ឲ្យ​មាន​សណ្តាប់ធ្នាប់ និង​មាន​របៀបរៀបរយ ជាពិសេស​កុំ​ឲ្យ​ប៉ះពាល់​ដល់​ដី​ចំណីផ្លូវ​សាធារណៈ និង​តំបន់​ឆ្នេរសមុទ្រ​ជាដើម​។​

​អាជ្ញាធរ​ក្រុងព្រះសីហនុ ព្រមាន​ថា ចំពោះ​ប្រជាពលរដ្ឋ ឬ​អាជីវករ​លក់ដូរ នៅតាម​តំបន់​ឆ្នេរសមុទ្រ​នានា ចាប់ពីពេលនេះ​តទៅ គឺ​មិន​ឲ្យ​សាងសង់​សំណង់​ថ្មី ដោយ​គ្មាន​ច្បាប់​អនុញ្ញាត​ទៀត​ទេ ហើយ​ក្នុងករណី​ប្រជាពលរដ្ឋ មិន​ស្តាប់​តាម​ការណែនាំ របស់​អាជ្ញាធរ​ទេ នឹងមាន​វិធានការ​តាមផ្លូវ​ច្បាប់ ឈានទៅ​ផាកពិន័យ ឬ​បញ្ជូន​សំណុំ​រឿងនេះ​ទៅកាន់​តុលាការ​ផ្តន្ទាទោស​។​

​លោក សន កុសល អភិបាលរងក្រុង​ព្រះសីហនុ ស្នើ​បាន​អំពាវនាវ​ដល់​ប្រជាពលរដ្ឋ លក់ដូរ នៅតាម​តំបន់​ឆ្នេរសមុទ្រ​នានា ត្រូវ​ចូលរួម​អនុវត្តតាម​ការណែនាំ របស់​រដ្ឋបាល​ក្រុង​-​ខេត្ត​ឲ្យ​បាន​ទាំងអស់គ្នា ដើម្បី​ជៀសផុត​ពី​ការពិន័យ ឬ​ផ្តន្ទាទោស​នា​ថ្ងៃ​អនាគត​។​

​ទាក់ទិន​បញ្ហា​នេះ​កន្លងមក លោក យន្ត មីន អភិបាលខេត្ត​ព្រះសីហនុ ធ្លាប់បាន​រំលឹក​ដល់​ប្រជាពលរដ្ឋ ពិសេស​ក្រុមហ៊ុន​សំណង់ ឬ​វិស័យ​ឯកជន​ទាំងអស់​នា​មូលដ្ឋាន​នេះ មិនត្រូវ​បើក​ការដ្ឋាន ឬ​សាងសង់​សំណង់​អ្វីមួយ ដោយ​មិនទាន់​មានច្បាប់​អនុញ្ញាត ពី​មន្ត្រី​ស្ថាប័ន​ពាក់ព័ន្ធ​ជាមុន​ទេ​។​

​លោក​ព្រមាន​ថា បទល្មើស​នេះ អាជ្ញាធរ​រដ្ឋបាល​ក្រុង​ខេត្ត នឹង​ចាត់វិធានការ​ក្តៅ​តាមផ្លូវ​ច្បាប់ ឬ​ឈានទៅ​វាយកំទេច​ចោល​សំណង់​ខុសច្បាប់​ទាំងឡាយណា ដែល​សង់​រំលោភ​លើដី​ចំណីផ្លូវ​សាធារណៈ ពិសេស​សង់​រំលោភ​ទៅ​លើដី​ចំណី​ឆ្នេរសមុទ្រ ជាពិសេស​អាជ្ញាធរ​អាច​នឹង​បញ្ជូន​សំណុំ នៃ​បទល្មើស​នេះ ទៅកាន់​តុលាការ​ផ្តន្ទាទោស បើ​មិន​ចូលរួម​សហការ​ជាមួយ​រដ្ឋបាល​ក្រុង​ខេត្ត​នា​ថ្ងៃ​អនាគត​។​

​បញ្ហា​នេះ រដ្ឋបាលខេត្ត​ព្រះសីហនុ ក៏​តម្រូវ​ឲ្យ​អាជ្ញាធរ នៅតាម​រដ្ឋបាល​សង្កាត់​នីមួយៗ ត្រូវ​រៀបចំ​សណ្ដាប់ធ្នាប់​តាម​ទីប្រជុំជន​នានា មាន​ទីផ្សារ និង​នៅតាម​ផ្លូវ​សាធារណៈ ពិសេស​នៅតាម​តំបន់ឆ្នេរ​សមុទ្រ​ជាដើម ត្រូវ​ឲ្យ​មាន​អនាម័យ​បរិស្ថាន​ល្អ ជាប្រចាំ ចាប់ពី​ខែវិច្ឆិកា ឆ្នាំ​២០១៧​តទៅ​។​

​ទោះជា​បែបនេះ​ក្តី មន្ត្រីរាជការ​ថ្នាក់ទាប និង​ប្រជាពលរដ្ឋ ប្រកប​របរ​តូចតាច មួយចំនួន នា​ខេត្ត​ព្រះសីហនុ បាន​រិះគន់ ថ្នាក់ដឹកនាំ​រដ្ឋបាល​ក្រុង​-​ខេត្ត​ព្រះសីហនុ​ថា បាន​អនុវត្ត​ច្បាប់​សាងសង់​នេះ មិនទាន់​ស្មើភាព​ចំពោះមុខ​ច្បាប់​នោះទេ​។ ពួកគេ​ចោទថា កន្លងមក​រដ្ឋបាល​ក្រុង​ខេត្ត​ព្រះសីហនុ បាន​ចុះ​ធ្វើ​សកម្មភាព​រុះរើ ឬ​វាយកំទេច​តែ​សំណង់​សង់​ដើម្បី​លក់ដូរ​ជា​លក្ខណៈ​តូចតាច របស់​ប្រជាបលរដ្ឋ​ក្រីក្រ​តែប៉ុណ្ណោះ ប៉ុន្តែ​សម្រាប់​សំណង់​ធំ​ស្កឹមស្កៃ ឬ​សំណង់​រឹងមាំ​ធំៗ ដែលមាន​ម្ចាស់​ជា​មន្ត្រី​មានអំណាច និង​ឈ្មួញ​មានទ្រព្យ​វិញ គឺ​មិនបាន​វាយកំទេច​ចោល​ភ្លាមៗ ដូច​សំណង់​ពលរដ្ឋ​ក្រីក្រ​គ្មាន​ខ្នងបង្អែក​នោះទេ​។​

​ត្រង់ចំណុច​នេះ អ្នកសម្របសម្រួល​សមា​គម​អាដហុក (Adhoc) ប្រចាំខេត្ត​ព្រះសីហនុ លោកស្រី ជៀប សុធា​រី ទទួលស្គាល់ថា កន្លងមក​សំណង់​សង់​អត់​ច្បាប់ របស់​ប្រជាពលរដ្ឋ​មាន​ជីវភាព​ក្រីក្រ ត្រូវ​អាជ្ញាធរ​រដ្ឋបាល​ក្រុង​-​ខេត្ត​ព្រះសីហនុ ចុះ​អនុវត្ត​ច្បាប់​សំណង់ ដោយ​រុះរើ និង​វាយ​កំទេចចោល​ភ្លាមៗ និង​មាន​ប្រសិទ្ធភាព​ខ្ពស់ ប៉ុន្តែ​ចំពោះ​សំណង់​សង់​មិនទាន់​មានច្បាប់​អនុញ្ញាត​ពី​មន្ត្រី​ស្ថាប័ន​ជំនាញ មាន​មន្ទីរ​រៀបចំ​ដែនដី​នគររូបនីយកម្ម និង​សំណង់ ខេត្ត​ព្រះសីហនុ​ជាដើម គឺ​កម្រ​ឃើញ​សមត្ថកិច្ច​ចុះ​វាយកំទេច​ភ្លាមៗ​ណាស់​។ ផ្ទុយទៅវិញ សំណង់​សង់​ល្មើសច្បាប់​ទាំងនោះ បាន​បន្តសកម្មភាព​សាងសង់ ដោយ​មិន​ញញើត​រដ្ឋបាល​ក្រុង​-​ខេត្ត​ព្រះសីហនុ​នោះទេ ទោះបី​សំណង់​ទាំងនោះ បាន​សង់​រំលោភ​ប៉​ពាល់​ដល់​ដី​ចំណ​ផ្លូវ​សាធារណៈ និង​ដី​ចំណី​បឹង​អូរ​ធម្មជាតិ ពិសេស​ឆ្នេរសមុទ្រ​បែបណា​ក្តី​។​

​អ្នកឃ្លាំមើល​សង្គម​រូបនេះ ចាត់ទុក​ការអនុវត្ត​ច្បាប់​សំណង់ របស់​រដ្ឋបាល​ក្រុង​-​ខេត្ត​ព្រះសីហនុ​រាល់ថ្ងៃនេះ ថា មិនទាន់​អនុវត្ត​ឲ្យ​បាន​ត្រឹមត្រូវ​ចំពោះមុខ​ច្បាប់​នោះទេ ដោយ​ភាគច្រើន​អាជ្ញាធរ បាន​លម្អៀង ទៅលើ​ភាគី​អ្នកមានអំណាច​បុណ្យស័ក្តិ និង​ឈ្មួញ​មាន​ទ្រព្យធន​មួយចំនួន ដែលជា​ម្ចាស់​សំណង់​សង់​គ្មាន​ច្បាប់​ទាំងនោះ ដែល​នាំ​ឲ្យ​មានមតិ​រិះគន់​ពី​សាធារណៈ​។​
​បញ្ហា​នេះ ទាំង​ប្រជាពលរដ្ឋ និង​មន្ត្រី​សង្គម​ស៊ីវិល​ក្រៅ​រដ្ឋាភិបាល​មួយចំនួន នា​ខេត្ត​ព្រះសីហនុ បានស្នើ​ដល់ លោក ជា សុផារ៉ា រដ្ឋមន្ត្រីក្រសួង​រៀបចំ​ដែនដី ជាពិសេស​សម្តេច​អគ្គមហាសេនាបតី​តេ​ជោ ហ៊ុន សែន នាយករដ្ឋមន្ត្រី នៃ​ព្រះរាជាណាចក្រ​កម្ពុជា ជួយ​ពិនិត្យ​តាមដាន ទៅលើ​ប្រសិទ្ធភាព នៃ​ការចុះអនុវត្ត​ច្បាប់​សំណង់ របស់​រដ្ឋបាល​ក្រុង​-​ខេត្ត​ព្រះសីហនុ ដើម្បី​ឈានទៅ​ពង្រឹង​ច្បាប់​សំណង់​នា​មូលដ្ឋាន​នេះ ឲ្យ​បាន​ជោគជ័យ និង​ស្មើភាព រវាង​ប្រជាពលរដ្ឋ​សាមញ្ញ មន្ត្រីរាជការ​ថ្នាក់ទាប ឈ្មួញ​មាន​ទ្រព្យធន និង​បុគ្គល​មានអំណាច​មួយចំនួន ដើម្បី​ជៀសវាង​មានមតិ​រិះគន់​ផ្សេងៗ​នា​ថ្ងៃ​អនាគត​៕ ដោយ​៖ ដែន សីមា​

 

spot_img
×