ភ្នំពេញ ៖ អ្នកឧកញ៉ា ម៉ៅ ចំណាន ប្រធានសមាគមសិល្បករខ្មែរ អញ្ជើញចូលរួមជាអធិបតីក្នុងសិក្ខាសាលាស្ដីពី “ការអប់រំផ្សព្វផ្សាយមេរោគអេដស៍ និងជំងឺអេដស៍ ជូនដល់សិល្បករ-សិល្បការិនី” ដែលរៀបចំឡើងដោយអាជ្ញាធរជាតិប្រយុទ្ធនឹងជំងឺអេដស៍ នៅភោជនីយដ្ឋានទន្លេបាសាក់២ រាជធានីភ្នំពេញ។
នៅក្នុងសុន្ទរកថាខ្លី អ្នកឧកញ៉ា ម៉ៅ ចំណាន បានលើកឡើងថា រហូតមកដល់ពេលនេះ មេរោគអេដស៍នៅតែមិនទាន់មានថ្នាំបង្កានៅឡើយ ហើយជំងឺអេដស៍នៅតែមិនទាន់មានឱសថសម្រាប់ព្យាបាលឱ្យបានជាសះស្បើយនៅឡើយដែរ។ បន្ថែមលើនេះ មេរោគអេដស៍ និងជំងឺអេដស៍ កំពុងបន្តបង្កផលលំបាកដល់ស្ថានភាពសង្គម ក៏ដូចជាស្ថានភាពសេដ្ឋកិច្ចផងដែរ។ អត្រានៃការឆ្លងនៅចំណោមយុវជនវ័យក្មេង និងអត្រានៃអ្នកស្លាប់ដោយសារជំងឺអេដស៍នៅតែជាការព្រួយបារម្ភ ដែលយើងទាំងអស់គ្នាត្រូវផ្ដោតការយកចិត្តទុកដាក់ និងចូលរួមប្រយុទ្ធទប់ស្កាត់ឱ្យសកម្មបំផុត។
ក្នុងនាមជាប្រធានសមាគមសិល្បករខ្មែរ អ្នកឧកញ៉ា ម៉ៅ ចំណាន បានធ្វើការអំពាវនាវ៧ចំណុចជូនដល់សិល្បករ-សិល្បការិនី ដូចតទៅ៖
ទី១.សិល្បករ-សិល្បការិនី ទាំងអស់ ចូលរួមស្វែងយល់ពីមេរោគអេដស៍ និងជំងឺអេដស៍ឱ្យបានស៊ីជម្រៅ និងបញ្ជ្រាបការយល់ដឹងទាំងនេះក្នុងគ្រប់ទម្រង់សិល្បៈឱ្យបានទូលំទូលាយ ដើម្បីឱ្យប្រជាជនយើង ជាពិសេសក្រុមយុវជនបង្កាខ្លួនចៀសផុតពីការឆ្លងមេរោគអេដស៍ ។
ទី២.នៅគ្រប់វេទិការនៃការសម្ដែងសូមគ្រប់ពិធីករ-ពិធីការិនី តារាសម្ដែង តារាកំប្លែងលើកអំពីសារខ្លីៗដែលអប់រំពីមេរោគអេដស៍ និងជំងឺអេដស៍ឱ្យបានជាប់ជាប្រចាំ។
ទី៣.សូមអ្នកនិពន្ធ អ្នកដឹកនាំរឿង ផលិតដឹកនាំរឿងខ្លីស្ដីពីការអប់រំការបង្កា និងការប្រយុទ្ធទប់ស្កាត់ការរីករាលដាលមេរោគអេដស៍ និងជំងឺអេដស៍។
ទី៤. សូមសិល្បករ-សិល្បការិនី បញ្ចៀសការប្រព្រឹត្តប្រឈមនឹងការឆ្លងមេរោគអេដស៍ និងជំងឺអេដស៍ តាមការស្មោះស្ម័គ្រស្នេហាប្រពន្ធមួយ-ប្ដីមួយ ឬគូសង្សារតែមួយ ឬប្រើប្រាស់ស្រោមអនាម័យឱ្យបានត្រឹមត្រូវជាប់ជាប្រចាំនៅពេលរួមភេទជាមួយដៃគូផ្សេង។
ទី៥.សូមសិល្បករ-សិល្បការិនី ដែលសង្ស័យថា បានប្រព្រឹត្តប្រឈមទៅនឹងការឆ្លងមេរោគអេដស៍ ជំងឺអេដស៍ សូមរួសរាន់ទៅទទួលសេវាធ្វើតេស្តរកមេរោគអេដស៍ ដើម្បីទទួលបានការព្យាបាលថែទាំ។
ទី៦. សូមសិល្បករ-សិល្បការិនី ចូលរួមលុបបំបាត់ការមាក់ងាយ និងការរើសអើងលើគ្រប់ទម្រង់ភេទនៃអ្នកផ្ទុកមេរោគអេដស៍ និងអ្នកជំងឺអេដស៍ ដោយចាត់ទុកអ្នករងគ្រោះទាំងអស់ជាមិត្តភក្ដិបងប្អូនរបស់យើង ត្រូវជួយគ្នា និងលើកទឹកចិត្តគ្នា ធ្វើការរួមគ្នា ដើម្បីភាពសុខដុមនៃសង្គមជាតិយើង។
ទី៧. សូមសិល្បករ-សិល្បការិនីទាំងអស់ ចាត់ទុកថា មានភារកិច្ចសំខាន់មួយទៀតរបស់យើង ក្រៅពីការផ្ដល់ការកម្សាន្ត និងភាពរីករាយ គឺការចូលរួមទប់ស្កាត់ការរីករាលដាលមេរោគអេដស៍ និងជំងឺអេដស៍ ដោយធ្វើជាគម្រូដល់អ្នកគាំទ្រទាំងឡាយអំពីមេរោគអេដស៍ និងជំងឺអេដស៍។
ក្នុងនាមសិល្បករ-សិល្បការិនី អ្នកឧកញ៉ាប្រធានសមាគមសិល្បករខ្មែរបានប្រកាសជាឱឡារិកថា យើងទាំងអស់គ្នា មានមោទនភាពបំផុត ដែលបានចូលរួមជាមួយរាជរដ្ឋាភិបាលក្នុងការឈានឆ្ពោះទៅបញ្ចប់អេដស៍នៅកម្ពុជា៕ រក្សាសិទ្ធដោយ ៖ សុទ្ធលី
![](https://cen.com.kh/wp-content/uploads/2024/06/427196a03a663d591480fa3ddce29dae-1024x787.jpg)
![](https://cen.com.kh/wp-content/uploads/2024/06/39f7bedce3480a84d1eeb4d66f425d19-1024x879.jpg)
![](https://cen.com.kh/wp-content/uploads/2024/06/882c89a8da8070f1af755c7ab6ae4c5b-1024x683.jpg)
![](https://cen.com.kh/wp-content/uploads/2024/06/754c83681d6c819f1b99f6f5e84e275d-1024x683.jpg)
![](https://cen.com.kh/wp-content/uploads/2024/06/5eb28681d86acf7c411b2c7c5d7e3a85-1024x683.jpg)
![](https://cen.com.kh/wp-content/uploads/2024/06/b715c22cb72ec328bcc684f3f30a9298-1024x683.jpg)
![](https://cen.com.kh/wp-content/uploads/2024/06/40cf4176a234ff0c75cf235a8d62ae9c-1024x847.jpg)
![](https://cen.com.kh/wp-content/uploads/2024/06/e0548b431610ce4697bc56f68cf9959c-1024x711.jpg)
![](https://cen.com.kh/wp-content/uploads/2024/06/3f69142e1e118af3165ee0047dcecc83-1024x710.jpg)
![](https://cen.com.kh/wp-content/uploads/2024/06/3826170091af4db6d7efd1e5100ee0db-1024x683.jpg)
![](https://cen.com.kh/wp-content/uploads/2024/06/2a45336f6ea2468208878ed28190bf9e-1024x608.jpg)