ភ្នំពេញ ៖ ក្រោយពីបានសិក្សា និងរៀបចំការងារបច្ចេកទេស ជាច្រើនដំណាក់កាលរួចមក ការប្រឡងប្រជែងជ្រើសរើសគ្រូបង្រៀនបឋមសិក្សាត្រូវបានកំណត់នៅខែកក្កដា ឆ្នាំ២០២៤។ ដើម្បីពិនិត្យលើវឌ្ឍនភាព និងតម្រង់ទិសការងារបន្ថែម ឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ និងជាប្រធានគណៈកម្មការប្រឡងប្រជែងជ្រើសរើសមន្ត្រីរាជការ បានដឹកនាំកិច្ចប្រជុំអន្តរក្រសួង នារសៀលថ្ងៃទី២០ ខែមិថុនា ឆ្នាំ២០២៤ នៅសាលាភូមិន្ទរដ្ឋបាល ដោយមានការចូលរួមពីតំណាងក្រសួងសេដ្ឋកិច្ច និងហិរញ្ញវត្ថុ តំណាងក្រសួងអប់រំ យុវជន និងកីឡា តំណាងអង្គភាពប្រឆាំងអំពើពុករលួយ ព្រមទាំងថ្នាក់ដឹកនាំ និងមន្ត្រីជំនាញ នៃគណៈកម្មការរៀបចំការប្រឡងប្រជែងជ្រើសរើសគ្រូបង្រៀននៅបឋមសិក្សាជាច្រើនរូប។
កិច្ចប្រជុំនេះ ប្រព្រឹត្តិទៅដោយមានការធ្វើរបាយការណ៍ពីក្រុមការងារបច្ចេកទេស រួមជាមួយការពិភាក្សាពីទិដ្ឋភាពនានា ដើម្បីឱ្យការប្រឡងប្រជែង ប្រព្រឹត្តទៅកាន់តែល្អប្រសើរស្របតាមនិយាមដែលបានដាក់ចេញ និងស្របតាមគោលការណ៍ដែលធ្លាប់បានអនុវត្តកន្លងមក។ ស្របពេលជាមួយគ្នានេះ ឯកឧត្តមឧបនាយករដ្ឋមន្ត្រី ក៏បានលើកឡើងថា បេក្ខជនចំនួន ៤,០៤១នាក់ ឬស្មើរបីដងនៃចំនួនដែលត្រូវជ្រើសរើសជាប់ស្ថាពរចុងក្រោយ (១,៣៤៧នាក់) នឹងត្រូវបានជ្រើសរើស សម្រាប់ការប្រឡងលើកទី១ ដើម្បីជ្រើសសម្រាំងបេក្ខជនចេញពីបេក្ខជនដែលមានសិទ្ធប្រឡងចំនួនសរុប ៣៨,១៦៨នាក់ ។
តាមការគ្រោងទុក អង្គប្រជុំបានកំណត់កាលបរិច្ឆេទ សម្រាប់ការប្រឡងនៅថ្ងៃទី១៣-១៤ និងថ្ងៃទី២០-២១ ខែកក្កដា ឆ្នាំ២០២៤ តាមមណ្ឌលប្រឡងផ្សេងៗគ្នា៕ រក្សាសិទ្ធដោយ ៖ សុទ្ធលី
![](https://cen.com.kh/wp-content/uploads/2024/06/838220c13648e88e8cadcedeecba36f8-1024x683.jpg)
![](https://cen.com.kh/wp-content/uploads/2024/06/9ed892f8af5ba60704d9b3c597a53c54-1024x683.jpg)
![](https://cen.com.kh/wp-content/uploads/2024/06/7146fcec9713eb186ce86877771acb32-1024x683.jpg)
![](https://cen.com.kh/wp-content/uploads/2024/06/028956a724a567ba49dbb9c191082aef-1024x683.jpg)
![](https://cen.com.kh/wp-content/uploads/2024/06/a3948c79ec6df8c9e8df66cf7d2c1973-1024x683.jpg)
![](https://cen.com.kh/wp-content/uploads/2024/06/85a9eae5e522ba189a848b95b758ee78-1024x683.jpg)
![](https://cen.com.kh/wp-content/uploads/2024/06/5e347f4f663140a25dd5327b6cd5afe6-1024x683.jpg)
![](https://cen.com.kh/wp-content/uploads/2024/06/d3eabe6279ecc3513600d469b68422b1-1024x683.jpg)
![](https://cen.com.kh/wp-content/uploads/2024/06/ad793d1887613e343d5ee3d44a6aa226-1024x683.jpg)
![](https://cen.com.kh/wp-content/uploads/2024/06/ba6bc9aa4ddf0e3548955c535034a14a-1024x683.jpg)
![](https://cen.com.kh/wp-content/uploads/2024/06/10dd8a3f6b952f18322b2c94be08fb58-1024x683.jpg)