ហេតុការណ៍ខ្លោចផ្សានេះ ត្រូវបានថតនៅផ្លូវចោតឡើងភ្នំ ក្នុងឧទ្យានជាតិ Picos de Europa ប្រទេសអេស្បាញ ហើយកំពុងត្រូវបានអ្នកទស្សនា បញ្ចេញកំហឹងយ៉ាងខ្លាំងក្លា ចំពោះទង្វើអមនុស្សធម៌បែបនេះ។
តាម Daily Mail ប៉ូលិសកំពុងស្វែងរកក្រុមភ្ញៀវទេសចរឡើងភ្នំ១ក្រុម ដែលបានគៀងជ្រូកព្រៃ១ក្បាល ដែលរងរបួសឲ្យមកកៀកច្រាំងភ្នំ មុនពេលរុញទម្លាក់វាឲ្យធ្លាក់ស្លាប់យ៉ាងអណោចអធ័ម។
ក្នុងខ្សែវីដេអូគេឮ អ្នកឡើងភ្នំម្នាក់ស្រែកខ្លាំងៗ “ប្រឹងថែមបន្តិចទៀតថានឹងធ្លាក់ចុះហើយ!” ស្របពេលដែលមនុស្សម្នាក់ទៀតយកឈើមកបុកលើជ្រូកអភ័ព្វ១នេះ។
ប៉ុន្មានវិនាទី គេឃើញជ្រូកព្រៃនេះធ្លាក់បុកប៉ះថ្មរមៀលច្រើនដុំ ខណៈពេលហ្វូងមនុស្សកាចសាហាវនេះនាំគ្នាស្រែកហ៊ោសប្បាយប្រៀបដូចជាដើរសាងស្នាដៃដ៏ “មហិមា” គួរឲ្យមោទនភាពអីចឹង!។
គេបានដឹងថា មុននោះជ្រូកព្រៃ១ក្បាលនេះ បានរងរបួស ហើយក៏ត្រូវប្រទះនឹងក្រុមមនុស្សកាចសាហាវ១ហ្វូងនេះ។
ក្រោយពេលដឹងហេតុការណ៍នេះ លើទំព័រ Twitter របស់ក្រុមការពារសត្វព្រៃបានប្រកាសថា ៖ “អ្នកមានដឹងពួកដែលច្រានជ្រូកព្រៃនេះទម្លាក់ពីលើចំណោតភ្នំនៅឧទ្យានជាតិ Picos de Europa ដែរឬទេ? បើដឹងមេត្តាប្រាប់ដល់ពួកខ្ញុំផង!”។
សត្វដ៏អភ័ព្វត្រូវហ្វូងមនុស្សរុញឲ្យទ័លច្រក រួចច្រានទម្លាក់ Fernado Nava សមាជិកម្នាក់នៃក្រុមប្រឹក្សាទីក្រុង Cabrales ឲ្យដឹងថា ៖ “រូបភាពទាំងនេះពិតជាព្រៃផ្សៃណាស់។ នេះជាទង្វើដ៏យង់ឃ្នងចំពោះសត្វដែលគួរឲ្យអាណិត”។
“យើងខ្ញុំនឹងរកវិធី បញ្ជូនជនទាំងនោះទៅកាន់តុលាការ ព្រោះប្រាកដណាស់វាជាទង្វើឃោរឃៅព្រៃផ្សៃ”។
