ខេត្តព្រះសីហនុ៖ របាយការណ៍ របស់មន្ត្រីកងរាជអាវុធហត្ថ ស្នាក់ការសន្តិសុខ៤០១ ផ្លូវជាតិលេខ៤ បានអោយដឹងថា កាលពីម៉ោង ៧ និង២០នាទីយប់ថ្ងៃទី១៤ ខែសីហា ឆ្នាំ២០១៨ នៅលើដងផ្លូវជាតិលេខ៤ នៅចន្លោះគីឡូម៉ែត្រលេខ១៥៩ និង១៦០ ស្ថិតនៅក្នុងភូមិមនោរម្យ ឃុំតានៃ ស្រុកព្រៃនប់ ខេត្តព្រះសីហនុ មានគ្រោះថ្នាក់ចរាចរណ៍មួយកើតឡើង រវាងរថយន្ត៤គ្រឿង បានបុកបន្តរគ្នាក្នុងទិសដៅស្របគ្នាពី ខេត្តព្រះសីហនុ ឆ្ពោះទៅរាជធានីភ្នំពេញ។
១-រថយន្តម៉ាកលុចសុីស RX300 ពាក់ផ្លាកលេខ ភ្នំពេញ 2T89 25 បើកបរដោយឈ្មោះ ជឿន សំអន មុខរបរ រត់តាក់សុី ភេទប្រុស អាយុ ៣៧ឆ្នាំ មានទីលំនៅភូមិជើងទឹក ឃុំត្រាំយ៉ាប ស្រុកស្រីសន្ធ (កំពង់ចាម) បង្អង់គេចសត្វគោឆ្លងផ្លូវ។
២- រថយន្តម៉ាកលុចសុិច RX៣៣០ គ្មានផ្លាកលេខ បើកបរដោយឈ្មោះ អុឹម វណ្ណា ភេទប្រុស អាយុ៥៤ឆ្នាំ មានទីលំនៅភូមិព្រៃនប់ ឃុំព្រៃនប់២ ស្រុកព្រៃនប់ ខេត្តព្រះសីហនុ បានទៅបុកពីក្រោយរថយន្តទី១។
៣- រថយន្ត ឡង់គ្រីស័រ៥៧០ ពាក់ផ្លាកលេខភ្នំពេញ2M69 08 បើកបរ ដោយឈ្មោះចាន់ ស្រស់ ភេទប្រុស អាយុ ៣៨ឆ្នាំ មានទីលំនៅភូមិទឹកថ្លា ឃុំទឹកថ្លា ខណ្ឌសែនសុខ ភ្នំពេញ បានទៅបុកបន្តពីក្រោយរថយន្តទី២។
៤- រថយន្តម៉ាកស្តារិច ពណ៌ពាក់ផ្លាកលេខភ្នំពេញ2AU 57 09 បើកបរដោយឈ្មោះឡេង ហៃ ភេទប្រុស អាយុ ២៦ឆ្នាំ មានទីលំនៅភូមិព្រៃព្រីង សង្កាត់ចោមចៅ ខណ្ឌពោសែនជ័យ ភ្នំពេញ បានទៅបុកបន្តពីក្រោយរថយន្តទី៣។
មន្ត្រីកងរាជអាវុធហត្ថ បានឲ្យដឹងថា ហេតុការណ៍គ្រោះថ្នាក់ចរាចរណ៍នេះ ពុំមានរបួសដល់មនុស្ស ឬប៉ះពាល់ដល់ទ្រព្យសម្បត្តិសាធារណៈឡើយ ក្នុងនោះបណ្តាលអោយខូចខាតរថយន្តធ្ងន់ធ្ងរ ០២គ្រឿង ហើយគ្រប់គូភាគី បានសម្របសម្រួលគ្នា នៅកន្លែងកើតហេតុ ដោយពុំមានការប្តឹងផ្តល់គ្នាឡើយ៕ ដោយ ៖ ដែន សីមា
