កាសែត Sputnik នៅថ្ងៃទី ២១/១១ បានដកស្រង់របាយការណ៍របស់ Global Times ឲ្យដឹងថា ៖ នៅអំឡុងកណ្តាលឆ្នាំ ២០១៨ កងកម្លាំងរំដោះប្រជាជនចិន (PLA) នឹងទទួលបានប្រភេទកាំជ្រួចអន្តរទ្វីបផលិតដោយប្រទេសនេះ មានឈ្មោះថា Dongfeng-41 ។ វាជាកាំជ្រួចអន្តរទ្វីបដែលបំពាក់ក្បាលគ្រាប់ច្រើន ហើយភាគីចិនប្រកាសថា វាអាចវាយលុកទៅគ្រប់ទីកន្លែងលើពិភពលោក។
សកម្មភាពនេះរបស់ចិន ធ្លាប់មានចែងក្នុងទិសដៅកែសម្រួល និងទំនើបកម្មកងកម្លាំងប្រឆាំងអាវុធ ដែលប្រធានរដ្ឋចិន ស៊ី ជិនពៀន ធ្លាប់បាននិយាយដល់នោះ។ តាម Global Times Dongfeng-41 មានល្បឿន 12.348km/h ហើយមានបំពាក់បន្ថែមកាំជ្រួចពន្លឺក្លែងក្លាយដើម្បីបន្លំ “បញ្ឆោត” ប្រព័ន្ធការពារដែនអាកាសរបស់គូសត្រូវ។ Dongfeng-41 ប្រើឥន្ធនៈរឹង បំពាក់ក្បាលគ្រាប់នុយក្លេអ៊ែរ ១០ ហើយក្បាលគ្រាប់នីមួយៗ មានសញ្ញាវាយលុកទៅកាន់គោលដៅផ្សេងគ្នា។ តាម Global Security នោះកាំជ្រួចនេះ មានប្រវែង 15m វិជ្ជមាត្រ 2m ទម្ងន់ ៣០តោន។
ចាប់ពីឆ្នាំ ២០១២មក ចិនបានសាកល្បងកាំជ្រួចថ្មី ៨លើក -នេះបើតាម India Times។ អ្នកវិភាគជាច្រើនទទួលស្គាល់ថា បច្ចុប្បន្នកាំជ្រួចនេះមានការកែសម្រួលគួរឲ្យកត់សម្គាល់តាំងពី PLA ប្រកាសថា វាត្រៀមទុកជាស្រេចសម្រាប់ប្រតិបត្តិការនាថ្ងៃអនាគត។
Global Times និយាយថា ទង្វើផលិត Dongfeng-41 ពុំសំដៅបម្រើឲ្យការរត់ប្រណាំងសពា្វវុធ និងពុំប្រជែងជាមួយប្រទេសណាក្នុងគោលបំណងស្រដៀងគ្នានោះទេ៕ សូយន
