សមត្ថកិច្ចចាប់ខ្លួនជនសង្ស័យម្នាក់ ករណីលួចម៉ូតូ ឯមុខសញ្ញាម្នាក់ទៀត បានរត់គេចខ្លួនបាត់ ជាអ្នកយកម៉ូតូរបស់ជនរងគ្រោះទៅបាត់

ស្រុកគិរីវង់ ÷ អធិការដ្ឋាននគរបាលស្រុកគិរីវង់ បានឲ្យដឹងថា នៅថ្ងៃអង្គារទី៣០ ខែកក្កដា ឆ្នាំ២០២៤ វេលាម៉ោង ០៨:៣០នាទី សមត្ថកិច្ចបានទទួលពាក្យបណ្តឹងពីជនរងគ្រោះឈ្មោះ ស៊ូ សូនី ភេទស្រី អាយុ៤២ឆ្នាំ មុខរបរ កសិករ មានទីលំនៅភូមិកំពង់ ឃុំព្រះបាទជាន់ជុំ ស្រុកគិរីវង់ ខេត្តតាកែវ ដោយបានប្តឹងករណីបទ អំពើលួច (លួចម៉ូតូ) ។

ដោយមានការចង្អុលបង្ហាញពី លោកឧត្តមសេនីយ៍ទោ ម៉ែន លី ស្នងការ នៃស្នងការដ្ឋាននគរបាលខេត្តតាកែវ និងសម្របសម្រួលនីតិវិធីពី ឯកឧត្តម ព្រះរាជអាជ្ញាអមសាលាដំបូងខេត្តតាកែវ និងដឹកនាំស្រាវជ្រាវផ្ទាល់ពីលោកវរសេនីយ៍ឯក ជា សុផល អធិការ នៃអធិការដ្ឋាននគរបាលស្រុកគិរីវង់ នៅវេលាម៉ោង០៩:១០នាទីថ្ងៃទី០១ ខែសីហា ឆ្នាំ២០២៤ បានធ្វើការឃាត់ខ្លួនជនសង្ស័យ១នាក់ ឈ្មោះ មិត្ត លីហួ ភេទប្រុស អាយុ១៧ឆ្នាំ មុខរបរ មិនពិតប្រាកដ មានទីលំនៅភូមិព្រាល ឃុំសោម ស្រុកគិរីវង់ ខេត្តតាកែវ (ឃាត់ខ្លួនបាន) ជាអ្នកបើកបរម៉ូតូទៅធ្វើសកម្មភាព និងបក្ខពួក១នាក់ទៀត ឈ្មោះ រឿង រ៉ាវី (ហៅក្រៅ ឡេវ) ភេទប្រុស អាយុ២៣ឆ្នាំ មុខរបរ មិនពិតប្រាកដ មានទីលំនៅភូមិកណ្តាល ឃុំភ្នំដិន ស្រុកគិរីវង់ ខេត្តតាកែវ ជាអ្នកយកម៉ូតូរបស់ជនរងគ្រោះទៅបាត់ ( មុខសញ្ញានេះបានរត់គេចខ្លួនបាត់ )។

សូមបញ្ជាក់ថា ÷ ចំពោះក្រុមជនសង្ស័យខាងលើជាមុខសញ្ញាប្រើប្រាស់គ្រឿងញៀន ។
ករណីនេះយើងបានដកហូតម៉ូតូដែលជិះធ្វើសកម្មភាព (មិនស្គាល់ម៉ាក ម៉ូតូចាស់) យកមកអធិការដ្ឋាននគរបាលស្រុកគិរីវង់ ដើម្បីកសាងសំណុំរឿងតាមនីតិវិធី ៕ រក្សាសិទ្ធដោយ ៖ សុទ្ធលី