កម្លាំងអាវុធហត្ថខេត្តស្វាយរៀង ឃាត់ខ្លួនជនជាតិវៀតណាម ២នាក់ ករណីជួញដូរគ្រឿងញៀនជាង ៩គីឡូក្រាម នៅក្រុងបាវិត

ស្វាយរៀង៖ កម្លាំងកងរាជអាវុធហត្ថខេត្តស្វាយរៀងបង្ក្រាបគ្រឿងញៀនបានជាង ៩គីឡូក្រាម និងឃាត់ខ្លួនជនសង្ស័យជាជនជាតិវៀតណាមបានចំនួន ២នាក់ ដើម្បីបញ្ជូនទៅសាលាដំបូងខេត្តស្វាយរៀងចាត់ការតាមផ្លូវច្បាប់នៅថ្ងៃទី៩ ខែកញ្ញា ឆ្នាំ២០២៤នេះ។

មន្ត្រីកងរាជអាវុធខេត្តស្វាយរៀង បានឲ្យដឹងថា ដោយអនុវត្តបទបញ្ជាដ៏ម៉ឺងម៉ាត់របស់លោកឧត្តមសេនីយ៍ត្រី សុខា រ៉ានាថ មេបញ្ជាការ កងរាជអាវុធហត្ថខេត្តស្វាយរៀង និងដោយមានការសម្របសម្រួលនីតិវិធីពីលោក ឡាយ ជុងហេង ព្រះរាជអាជ្ញារង នៃអយ្យការអមសាលាដំបូងខេត្តស្វាយរៀង នៅវេលាម៉ោង១៥៖៣០នាទី រហូតដល់វេលាម៉ោង១៨៖១៥នាទី ថ្ងៃទី០៤ ខែកញ្ញា ឆ្នាំ២០២៤ កម្លាំងជំនាញកងរាជអាវុធហត្ថខេត្តស្វាយរៀង ដឹកនាំដោយលោកវរសេនីយ៍ឯក ស្រី វុត្ថា មេបញ្ជាការរងកងរាជអាវុធហត្ថខេត្តស្វាយរៀង បានចុះបង្ក្រាបករណីរក្សាទុកឬជួញដូរ និងប្រើប្រាស់ដោយខុសច្បាប់នូវសារធាតុញៀន នៅចំណុចផ្ទះសំណាក់ហេងហេងស្រីរ័ត្ន ស្ថិតនៅភូមិបាវិតកណ្ដាល សង្កាត់បាវិត ក្រុងបាវិត និងនៅបុរីចន្ទរាជ ផ្ទះជួលលេខA11 ភូមិតាបឹប សង្កាត់បាវិត ក្រុងបាវិត ខេត្តស្វាយរៀង ឃាត់ខ្លួនជនសង្ស័យជាជនជាតិវៀតណាមចំនួន២នាក់ ។

មន្ត្រីអាវុធហត្ថខេត្តស្វាយរៀង បានបញ្ជាក់ថា ក្នុងប្រតិបត្តិការបង្ក្រាបគ្រឿងញៀននេះ សមត្ថកិច្ច បានដកហូតយកវត្ថុតាងរួមមាន៖ ថ្នាំញៀនក្រាមពណ៌សថ្លាចំនួន១៧ កញ្ចប់ មានទម្ងន់៩.៣០៦,៥០ ក្រាម(មេតំហ្វេតាមីន)ម្សៅកញ្ចប់ពណ៌ក្រហមសញ្ញារូបសេះ ចំនួន ០៣ កញ្ចប់ ទម្ងន់ ៥៥,៩០ ក្រាម (អិចស្រ្តាស៊ី) ថ្នាំគ្រាប់ពណ៌ផ្កាឈូកចំនួន ០១ កញ្ចប់ទម្ងន់២,៣០ក្រាម (អិចស្រ្តាស៊ី) ថ្នាំគ្រាប់ពណ៌ត្រួយចេកចំនួន០៥ កញ្ចប់ មានទម្ងន់៤៣,០០ក្រាម (អិចស្រ្តាស៊ី) ថ្នាំគ្រាប់ពណ៌បៃតងចំនួន០១ កញ្ចប់មានទម្ងន់៣,៦០ក្រាម (អិចស្រ្តាស៊ី) ថ្នាំគ្រាប់ពណ៌ក្រហមចំនួន០៤ កញ្ចប់ ទម្ងន់៥១,៨០ក្រាម (មេតំហ្វេតាមីន) ថ្នាំម្សៅម៉ត់ពណ៌ស ចំនួន០២ កញ្ចប់ទម្ងន់៦,៦០ក្រាម (កេតាមីន) ថ្នាំគ្រាប់ពណ៌ខៀវចំនួន០១កញ្ចប់មានទម្ងន់១,១០ក្រាម (អិចស្រ្តាស៊ី) ទម្ងន់ថ្នាំញៀនសរុប ចំនួន ៩.៤៧០,៨០ក្រាម។

សមត្ថកិច្ច ក៏បានដកហូត ម៉ូតូ ចំនួន០១ គ្រឿង ទូរសព្ទដៃចំនួន០៣ គ្រឿង ប័ណ្ណបើករថយន្ដចំនួន០១ សន្លឹក សៀវភៅបើកបររថយន្ដចំនួន០១ ក្បាល ឧបករណ៍សម្រាប់កិនគ្រឿងញៀនចំនួន០១ គ្រឿងគ្រាប់កាំភ្លើងខ្លី០១គ្រាប់ អាវុធខ្លីម៉ាក់រ៉ូឡូ០១ដើម ពូថៅតូច០១ ដុំរ៉ូឡូកាំភ្លើងខ្លី០១ កាបូបពណ៌ខ្មៅ០១ជញ្ជីងសម្រាប់ថ្លឹងគឿងញៀនចំនួន០៣គឿង ប័ណ្ណបើកបរ ចំនួន ០១ក្បាល លិខិតឆ្លងដែន ចំនួន០១ក្បាល សម្ភារៈវេខខ្ចប់ និងសម្ភារៈប្រើប្រាស់គ្រឿងញៀនមួយចំនួនផងដែរ៕ រក្សាសិទ្ធដោយ ៖ សុទ្ធលី