ភ្នំពេញ៖ មន្ទីរសុខាភិបាល នៃរដ្ឋបាលរាជធានីភ្នំពេញ បានឲ្យដឹងថា នាថ្ងៃទី០៧ ខែកក្កដា ឆ្នាំ២០២៥ មន្ទីរសុខាភិបាលនៃរដ្ឋបាលរាជធានីភ្នំពេញ បានឃើញគេហទំព័រសារព័តមានក្នុងស្រុកខ្លះបាន ចុះផ្សាយអំពីករណីទីតាំងផ្តល់សេវាសុខាភិបាលឯកជនមួយកន្លែង(មន្ទីរសម្រាកព្យាបាល មេត្ដាសំណង់១២)ដែល បានព្យាបាលអ្នកជំងឺជាកុមារ ភេទប្រុស អាយុ ៨ខែ ទម្ងន់ ១១.៣គីឡូក្រាម មានអាសយដ្ឋានភូមិលេខ៦ ឃុំស្វាយឃ្លាំង ស្រុកក្រូចឆ្មា ខេត្តត្បូងឃ្មុំ។ ភ្លាមនោះមន្ទីរសុខាភិបាលបានចាត់តាំងក្រុមការងារដើម្បីចុះត្រួតពិនិត្យ និងធ្វើកំណត់ហេតុនៅទីតាំងកើតហេតុ មានទីតាំងស្ថិតនៅ ផ្ទះលេខ ២៦៥ ផ្លូវលេខ ៦៤L សង្កាត់ទឹកល្អក់៣ ខណ្ឌទួលគោក រាជធានីភ្នំពេញ។
ករណីកុមារជាអ្នកជំងឺ ភេទប្រុស អាយុ ៨ខែ ពិតជាបានចូលមកព្យាបាលនៅមន្ទីរសម្រាកព្យាបាលមេត្តា សំណង់១២ ជាមួយរោគសញ្ញាក្តៅខ្លួនមិនធូរស្បើយ។ ឳពុកម្តាយកុមារបាននាំកូនទៅទទួលការព្យាបាលនៅ ទីតាំងខាងលើកាលពីរសៀលថ្ងៃទី០៥ ខែកក្កដា ឆ្នាំ២០២៥ វេលាម៉ោង ១៦:០០នាទី គ្រូពេទ្យបានពិនិត្យ ឃើញថាកុមារមានជំងឺគ្រុនឈាម។ លុះព្រលឹមថ្ងៃទី០៧ ខែកក្កដា ឆ្នាំ២០២៥ កុមារមានអាការៈ ស្វាយមុខ-មាត់ និងដង្ហើមដង្ហក់ខ្លាំង ក៏ត្រូវបានបញ្ជូនទៅដល់មន្ទីរពេទ្យគន្ធបុប្ផាទី៤ វេលាម៉ោង ៧ : ៣០នាទីព្រឹក។
កុមារជាអ្នកជំងឺបានទៅដល់មន្ទីរពេទ្យគន្ធបុប្ផាទី៤ នៅថ្ងៃទី០៧ ខែកក្កដា ឆ្នាំ២០២៥ វេលាម៉ោង ៧:៣០ នាទីព្រឹក ក្រុមគ្រូពេទ្យជំនាញមន្ទីរពេទ្យគន្ធបុប្ផាបានព្យាយាមជួយសង្គ្រោះអ្នកជំងឺតាមនិយាមបច្ចេកទេសអស់រយៈ ពេល២០នាទី ប៉ុន្តែគួរឱ្យសោកស្ដាយមិនអាចជួយសង្គ្រោះអ្នកជំងឺបាន ដោយបានទទួលមរណៈភាពក្នុងរោគ វិនិច្ឆ័យ៖ កុមារស្លាប់ពេលមកដល់មន្ទីរពេទ្យ/ Death On Arrival(Entrant Mort)។
ដោយទីតាំងផ្តល់សេវាខាងលើកំពុងដាក់ពាក្យស្នើសុំលិខិតអនុញ្ញាតពីក្រសួងសុខាភិបាល ក៍ប៉ុន្តែពុំទាន់ ទទួលបានការអនុញ្ញាតជាផ្លូវការនៅឡើយ ហេតុនេះមន្ទីរសុខាភិបាល នៃរដ្ឋបាលរាជធានីភ្នំពេញ សហការជាមួយ អាជ្ញាធររដ្ឋបាលខណ្ឌទួលគោក បានចេញសេចក្ដីសម្រេចស្ដីពីការបិទទីតាំងផ្តល់សេវាដែលមានឈ្មោះ(មន្ទីរសម្រាក ព្យាបាល មេត្ដាសំណង់១២) ដោយមូលហេតុទីតាំងនេះពុំទាន់មានលិខិតអនុញ្ញាតពីក្រសួងសុខាភិបាល។
ថ្ងៃទី០៨ ខែកក្កដា ឆ្នាំ២០២៥ ធ្វើឡើងទៅតាមសេចក្តីសម្រេច ស្តីពីការបិទមន្ទីរសម្រាកព្យាបាលជំងឺ មេត្តាសំណង់ ១២ លេខ៦០៤/២៥ រប ចុះថ្ងៃទី០៨ ខែកក្កដា ឆ្នាំ២០២៥ របស់មន្ទីរសុខាភិបាលរាជធានីភ្នំពេញ ដោយមានការចូលរួមលោកវេជ្ជបណ្ឌិត កែវ វិបុល អនុប្រធានមន្ទីរសុខាភិបាល នៃរដ្ឋបាលរាជធានីភ្នំពេញ,លោក កែវ សុភា អភិបាលរង នៃគណៈអភិបាលខណ្ឌទួលគោក និងអាជ្ញាធសង្កាត់ ។
មន្ទីរសម្រាកព្យាបាលជំងឺមេត្តាសំណង់១២ ស្ថិតនៅផ្ទះលេខ២៥ ផ្លូវលេខ២៦៥ សង្កាត់ទឹកល្អក់ទី៣ ខណ្ឌទួលគោក រាជធានីភ្នំពេញ។ ក្នុងឱកាសនោះគណៈកម្មការ ក៏បានប្រគល់សេចក្តីជូនលោកវេជ្ជបណ្ឌិត ហ៊ាង រតនា ដែលជាម្ចាស់ទុនមន្ទីរសម្រាកព្យាបាលជំងឺ មេត្តាសំណង់១២ ផងដែរ ។
តាមសេចក្តីសម្រេច ស្តីពីការបិទមន្ទីរសម្រាកព្យាបាលមេត្តាសំណង់១២ របស់មន្ទីរសុខាភិបាល នៃរដ្ឋបាលរាជធានីភ្នំពេញ បានសម្រេច
ប្រការ១ ៖ បិទទីតាំងផ្តល់សេវាសុខាភិបាលឯកជន ០១កន្លែង (មន្ទីរសម្រាកព្យាបាល មេត្តាសំណង់១២) របស់លោក វេជ្ជបណ្ឌិត ហ៊ាង រតនា ដែលមានទីតាំងស្ថិតនៅផ្ទះលេខ២៥ ផ្លូវលេខ២៦៥ សង្កាត់ទឹកល្អក់ទី៣ ខណ្ឌ ទួលគោក រាជធានីភ្នំពេញ ដោយមូលហេតុ ពុំទាន់មានលិខិតអនុញ្ញាតពីក្រសួងសុខាភិបាល ។
ប្រការ២ ៖ ប្រធានការិយាល័យនិយ័តកម្មសុខាភិបាល ប្រធានការិយាល័យសុខាភិបាលស្រុកប្រតិបត្តិចតុមុខ និងលោក វេជ្ជបណ្ឌិត ហ៊ាង រតនា មានភារកិច្ចអនុវត្តសេចក្តីសម្រេចនេះតាមភារកិច្ចរៀងៗខ្លួន ឱ្យមានប្រសិទ្ធិភាព ចាប់ពីថ្ងៃចុះហត្ថលេខានេះតទៅ ។
បន្ទាប់ពីមន្ទីរសម្រាកព្យាបាលជំងឺមេត្តាសំណង់១២ ត្រូវបានបិទនៅវេលាព្រលប់ លោកវេជ្ជបណ្ឌិត ហ៊ាន រតនា ដែលជាម្ចាស់គ្លីនិក បានបង្ហោះសារនៅក្នុងបណ្ដាញសង្គមអោយដឹងថា “ពេលនេះ គ្លីនិកមេត្តាសំណង់១២ ត្រូវបានបិទ។ ខ្ញុំមានមនោសញ្ជេតនា និងអនុស្សាវរីយ៍ ជាមួយទីនេះ និងជាមួយអ្នកជំងឺនៅទីនេះច្រើនណាស់ ពេលនេះ បេះដូងរបស់ខ្ញុំ ដូចត្រូវបានកាំបិតមួយចាក់យ៉ាងជ្រៅ ណាមួយ គឺទិដ្ឋភាព ដែលម្តាយអោបសាកស.ពកូនយំ នៅដិតដាមចំពោះមុខខ្ញុំ។ នេះគឺជាលើកទីមួយហើយ ក្នុងឆាកជីវិតខ្ញុំ ដែលខ្ញុំព្យាយាមជួយសង្គ្រោះអ្នកជំងឺដោយខ្លួនឯងផ្ទាល់ហើយ និងបញ្ជូនជំងឺបន្តដើម្បីជួយសង្គ្រោះហើយ តែនៅតែមិនអាចជួយសង្គ្រោះអ្នកជំងឺបាន។ វាបានប៉ះទង្គិចផ្លូវចិត្តខ្ញុំខ្លាំងណាស់ នៅហេតុការណ៍ទាំងនេះ និងជាពិសេស នៅពេលលឺពាក្យថា «ព្យាបាលដើម្បីលុយ»។ ខ្ញុំដឹងច្បាស់អំពីខ្លួនឯង ថាទឹកចិត្តខ្ញុំបែបណា ថាចង់ធ្វើអ្វី ដើម្បីអ្វីទស្សនៈវិស័យរបស់ខ្លួនឯងបែបណា ខ្ញុំលះបង់អ្វីខ្លះ។ ពេលនេះខ្ញុំសួរខ្លួនឯងថាតើ ខ្ញុំគួរបន្តទៀតទេ ??? នោះសូមបងប្អូនវាយតម្លៃចុះ ថាខ្ញុំជាមនុស្សបែបណា ជាគ្រូពេទ្យបែបណា ? បងប្អូនអាចខំមិនបានទាំងអស់ មិនថា បងប្អូនជាគ្រូពេទ្យ អ្នកស្អប់ខ្ញុំ អ្នកស្រលាញ់ខ្ញុំ ជាអ្នកជំងឺខ្ញុំ ឬក៏មិនមែន បើខ្ញុំមើលឃើញថា មានខំមិនចាប់ពី ៥% ទៅ ថាខ្ញុំជាគ្រូពេទ្យមិនល្អ នោះខ្ញុំនឹងបញ្ចប់អាជីពជាគ្រូពេទ្យរបស់ខ្លួន បោះបង់សញ្ញាប័ត្រ និងគណៈគ្រូពេទ្យរបស់ខ្ញុំចោល និងឈប់ធ្វើជាគ្រូពេទ្យពេញមួយជីវិត រហូតដល់ថ្ងៃខ្ញុំស្លា.ប់។ លោកក៏បានបញ្ជាក់ទៀតថានេះ មិនមែនជាការឆ្លើយតប ឬបកស្រាយអ្វីមួយនោះទេ គឺខ្ញុំគ្រាន់តែចង់រំដោះផ្លូវចិត្តរបស់ខ្ញុំ ៕រក្សាសិទ្ធដោយ : សុទ្ធលី
