បណ្ឌិតសភាចារ្យ ហង់ ជួនណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា បានអញ្ជើញបើកវិញ្ញាសារប្រឡង នៅមណ្ឌលប្រឡងក្នុងវិទ្យាល័យ ព្រះស៊ីសុវត្ថិ ក្នុងរាជធានីភ្នំពេញ ដូចបណ្តាឆ្នាំកន្លងទៅ។
ក្នុងសន្និសីទសារព័ត៌មាននាព្រឹកថ្ងៃទី៨ខែតុលាឆ្នាំ២០២៤នេះ ឯកឧត្តម ហង់ ជួនណារ៉ុន បានមានប្រសាសន៍ថា កំណែទម្រង់សាលារៀនមានន័យថា នាយកកែលម្អការដឹកនាំ និងការគ្រប់គ្រង សិស្សខំប្រឹងរៀន គ្រូខំបង្រៀន កែលម្អវិធីសាស្ត្របង្រៀន និងទទួលការគាំទ្រពីអាណាព្យាបាល។ វិញ្ញាសាទាំងអស់ ត្រូវបានជ្រើសរើស តាក់តែង រៀបចំ និងគ្រប់គ្រងដោយក្រសួងអប់រំ យុវជន និងកីឡា។ វិញ្ញាសាប្រឡង ត្រូវបានកំណត់សម្រាប់ថ្នាក់វិទ្យាសាស្ត្រ និងសម្រាប់ថ្នាក់វិទ្យាសាស្ត្រសង្គម ដោយក្នុងថ្នាក់នីមួយៗ មាន ៧ មុខវិជ្ជា។ ទម្រង់វិញ្ញាសា ត្រូវបានរៀបចំជាពីរ គឺទម្រង់វិញ្ញាសាចម្លងដាក់លើក្តារខៀន និងទម្រង់វិញ្ញាសា ដែលត្រូវចែកជូនបេក្ខជន។
ឯកឧត្តមរដ្ឋមន្ត្រីក្រសួងអប់រំយុវជន និងកីឡា បានអះអាងថា ការធ្វើកំណែរទម្រង់វិស័យអប់រំ ពិសេសការប្រឡងសញ្ញាបត្រមធ្យមសិក្សាទុតិយភូមិ ឬបាក់ឌុបនោះមានការពិបាក រហូតរដល់មានការដាក់ទោសទណ្ឌចំពោះបេក្ខជនដែលមិនគោរព បទប្បញ្ញត្តិ តែនៅឆ្នាំបន្តបន្ទាប់មានភាពល្អ ជាដើមហេតុធ្វើឲ្យមានការកែទម្រង់វិស័យអប់រំនៅតាមសាលារៀនមានភាពល្អប្រសើរ ។
ឯកឧត្តម ហង់ ជួនណារ៉ុន បានថ្លែងថា យើងឃើញថា នៅឆ្នាំដំបូងនៃការធ្វើកំណែទម្រង់ប្រឡងបាក់ឌុបឃើញថា មានកំហុសច្រើន ដោយសារតែបេក្ខជនមិនទាន់យល់ដឹង ក៏មានការ នាំចូលនូវសំណៅឯកសារច្រើន ហើយក៏មានការនាំចូលឧបករណ៍អេឡិចត្រូនិច និងអ្នកប្រឡងជំនួ សជាដើមដែលនេះជាបញ្ហាធំៗយើងមើលឃើញ។
ឯកឧត្តមរដ្ឋមន្ត្រីក្រសួងអប់រំ បានអះអាងសិស្សានុសិស្សបានខិតខំប្រឹងប្រែងរៀនសូត្រ ហើយគ្រូក៏ខិតខំក្នុងការបង្រៀនដែលចំណុចដែលត្រូវដោះស្រាយ។
ឯកឧត្តមរដ្ឋមន្ត្រីបានគូសបញ្ជាក់បន្ថែមថា អីញ្ចឹងនៅពេលដែលយើងដឹងថា បញ្ហាប្រឈម ហើយដោះស្រាយចំពោះមិនសូវចេះនោះក្រសួង ក៏រៀបចំសង្ខេបនូវឯកសារសំខាន់ៗមួយចំនួន និង មានការប្រឡងជាលើកទី២ និងមានការបង្រៀនបំប៉នដោយមានការចូលរួមសហភាពសព័ន្ធ យុវជន និងភាគីពាក់ព័ន្ធនោះយើងឃើញថា រយៈពេល១០ឆ្នាំមកនេះឃើញថាមានភាពល្អ។
ឯកឧត្តមរដ្ឋមន្ត្រីបានអះអាងថាតាមរយៈធ្វើកំណែទម្រង់ការប្រឡងបាក់ឌុបនេះ ធ្វើឲ្យក្រសួងយកមកអនុវត្តនៅតាមសាលារៀន ដោយសិស្សត្រូវខិតខំរៀន ហើយគ្រូខិតខំបង្រៀន ព្រមទាំងឲ្យសិស្សធ្វើស្វ័យសិក្សាតាមរយៈផ្នែកឌីជីថលផងដែរ។
ឯកឧត្តមហង់ ជួនណារ៉ុន បានលើកឡើងទៀតថា កក្តាដែលធ្វើឲ្យវិស័យអប់រំមានភាពល្អ ប្រសើរមានទាំងយន្តការប្រឡងដែលទទួលយកបានដោយធ្វើការពង្រឹងការគ្រប់គ្រង ផ្តល់ឲ្យសិស្សរៀនបានច្រើន ក្នុងនោះ គ្រូខំប្រឹងបង្រៀន សិស្សខំប្រឹងរៀន ហើយឪពុកម្តាយ ក៏ខំប្រឹងជំរុញកូនឲ្យខិតខំរៀន
។
ឯកឧត្តមរដ្ឋមន្ត្រី បានបញ្ជាក់ថា មូលហេតុដែលរៀបចំការប្រឡងបាក់ឌុបនៅខែតុលា ក្នុងពេលនេះ ព្រោះចង់បង្ខិតការប្រឡងនេះឱ្យដូចពេលមុន ដែលធ្វើឡើងនៅខែសីហា មុនពេលកូវីដ-១៩ ដោយសារបញ្ហាកូវីដ ការប្រឡងត្រូវបានរុញរហូតមកដល់ខែមករា ឬខែធ្នូ។ ដូច្នេះ លោកចង់បង្ខិតឱ្យមកដល់ខែសីហា ដើម្បីឱ្យអ្នកដែលប្រឡងចប់ហើយមានឱកាស ដាក់ពាក្យទៅរៀននៅបរទេស ឬក៏ទទួលអាហារូបករណ៍នៅបរទេស។
នាពេលបច្ចុប្បន្ននេះ ដោយសារមានភ្លៀងធ្លាក់ធ្វើឱ្យមណ្ឌលប្រឡងមួយចំនួនមានការជន់លិច ប៉ុន្តែក្រសួងបានត្រៀមក្នុងការដោះដូរមណ្ឌលប្រឡងផងដែរ ដោយមណ្ឌលខ្លះ ដូចជា មណ្ឌលកំពង់ចាម និងសៀមរាប គឺអាចធ្វើការដោះដូរមណ្ឌលបាន ចំណែកមណ្ឌលមួយចំនួននៅរាជធានីភ្នំពេញ ដែលបានរងការជន់លិច អាជ្ញាធរក៏បានធ្វើការដោះស្រាយរួចហើយដែរ ដើម្បីធានាដល់មណ្ឌលប្រឡងទាំងនោះអាចដំណើរការប្រឡងបានជាធម្មតា៕ រក្សាសិទ្ធដោយ ៖ សុទ្ធលី
