ប្តីប្រពន្ធមួយ រស់នៅតំបន់កណ្តាលប្រទេសចិន បានត្រូវប៉ូលិសហៅមក “សួរសុខទុក្ខ” បន្ទាប់ពីចែករំលែកឃ្លីប១ ថតទិដ្ឋភាពកូនស្រីវ័យ៦ឆ្នាំ ឲ្យកាត់ចង្កូតទឹកពួកគេ តាមដងវិថី -នេះបើតាម The Beijing News ។
ឃ្លីបនេះ បង្ហាញឲ្យឃើញក្មេងស្រីអង្គុយលើភ្លៅម្តាយហើយបញ្ជារថយន្តឆ្លងកាត់ភូមិមួយនៅ Xianning ខេត្តហ៊ីប៉ៃ ។
ពេលរថយន្តទៅជិតស្ពានមួយ ក្មេងស្រីហាក់ភ័យខ្លាច ទើបឮសំឡេងឪពុកវាលើកទឹកចិត្តដល់កូនបើកយឺតៗ ។ បុរសជាឪពុកពោល ៖ ប្រសិនជាកូនអាចបើកបរតាមផ្លូវជនបទបាននោះ ពិតជាអាចបើកលើផ្លូវហាយវ៉េបាន ។ កូនពិតជាអស្ចារ្យណាស់! ។
ប៉ុន្តែប៉ូលិសពុំបានចាត់ទុកទង្វើនេះគួរឲ្យសរសើរទេ! ។ ក្រោយពេលពិនិត្យឃ្លីបនេះរួចគេក៏ស្រាវជ្រាវរកឃើញឪពុកម្តាយដែលជា “ជនល្មើស” នាំខ្លួនយកមកសួរចម្លើយ ។
ស្ត្រីត្រកូល Ge ជាម្តាយ សារភាពថាពេលនាងកំពុងបើកបរបានយកកូនស្រីមកដាក់អង្គុយលើភ្លៅ ។ បន្ទាប់មកប្តីរបស់នាងឈ្មោះ Yu បានហៅកូនស្រីឲ្យកាន់ចង្កូត “មួយភ្លែត” សាកមើល ។ នាងជាម្តាយថា កូនស្រីខ្លួនកាន់ចង្កូតប្រហែល១នាទីប៉ុណ្ណោះ ។
ទោះបីជាសារភាពកំហុស តែអ្នកទាំង២ បានរងការពិន័យជាប្រាក់ 2000 យាន់ (ជាង៣០០ដុល្លារ) រីឯនារីជាម្តាយត្រូវបានព្យួរទុកប័ណ្ណបើកបរមួយរយៈ ។
នេះហើយ កុំចេះតែហ៊ាននោះ ! ៕ ចន្ទ្រា