ខេត្តស្វាយរៀង ៖ បុរសម្នាក់ បានរងរបួសធ្ងន់ ខណៈពេលកំពុងបើកបររ៉ឺម៉កម៉ូតូកង់ ស្រាប់តែមានរថយន្តមួយគ្រឿង បើកបរដោយជនជាតិចិនក្នុងល្បឿនយ៉ាងលឿន ហើយបានជ្រុលទៅបុកពីក្រោយពេញទំហឹងតែម្តងដែលហេតុការណ៍គ្រោះថ្នាក់ចរាចរណ៍នេះ បានកើតឡើងកាលពីវេលាម៉ោង៣និង១០នាទីទៀបភ្លឺឈានចូលថ្ងៃទី ២១ ខែសីហា ឆ្នាំ២០១៨ នៅលើផ្លូវជាតិលេខ១ ត្រង់ចំណុចគីឡូម៉ែត្រលេខ១៦១-១៥៦២ ស្ថិតក្នុងភូមិតាបឹប សង្កាត់បាវិត ក្រុងបាវិត ខេត្តស្វាយរៀង។
សមត្ថកិច្ច បានឲ្យដឹងថា រថយន្តបង្កម៉ាក BMW 730d ពណ៌ទឹកប្រាក់ ពាក់ស្លាកលេខភ្នំពេញ 2AW-3135 បើកបរដោយឈ្មោះ ស៊ី អ៊ីពីង ភេទប្រុស អាយុ៣១ឆ្នាំ ជនជាតិចិន មុខរបរបុគ្គលិកកាស៊ីណូ ជីវីន ស្នាក់នៅភូមិបាវិតកណ្តាល សង្កាត់បាវិត ក្រុងបាវិត ខេត្តស្វាយរៀងធ្វើដំណើរពីកើតទៅលិច លុះមកដល់ចំណុចកើតហេតុខាងលើ ក៏បានបុកពីក្រោយម៉ូតូកង់បី(តុកៗ)១គ្រឿងម៉ាកហុងដា C125 ពណ៌ខ្មៅ ពាក់ស្លាកលេខស្វាយរៀង1E-0289 បើកបរដោយឈ្មោះ ជុំ ដង ភេទប្រុស អាយុ៤០ឆ្នាំ ជនជាតិខ្មែរមុខរបរ រត់ម៉ូតូតុកៗ រស់នៅភូមិតាពៅ សង្កាត់បាវិត ក្រុងបាវិតខេត្តស្វាយរៀង បណ្តាលឲ្យអ្នកបើកបរម៉ូតូតុកៗរងរបួសធ្ងន់។
បច្ចុប្បន្នជនរងគ្រោះ ត្រូវបានដឹកជញ្ជូនទៅព្យាបាលនៅមន្ទីរពេទ្យប្រទេសវៀតណាម ដោយសភាពធ្ងន់ធ្ងរពេក។ ចំណែករថយន្ត និងម៉ូតូ ត្រូវបានសមត្ថកិច្ចយកមករក្សាទុកនៅអធិការដ្ឋាននគរបាលក្រុងបាវិត ដើម្បីរង់ចាំម្ចាស់ចូលខ្លួនមកដោះស្រាយពេលក្រោយ៕ ដោយ ៖ វ៉ៃកូ
