ខេត្តស្វាយរៀង ៖ ប្រជាពលរដ្ឋក៏ដូចជាអ្នកដែលធ្វើដំណើរលើដងផ្លូវជាតិលេខ១ ត្រង់ចំណុចស្ពានហាយវ៉េ ស្ថិតក្នុងភូមិ បាក់រនាស់ សង្កាត់ សង្ឃ័រ ក្រុង ស្វាយរៀង ខេត្តស្វាយរៀង កាលពីវេលាម៉ោង៦ព្រលប់ ថ្ងៃទី២១ ខែសីហា ឆ្នាំ២០១៨នេះ មានការភ្ញាក់ផ្អើល ចោមរោមមើល និងបានរាយការណ៍ទៅសមត្ថកិច្ច ខណៈដែលប្រទះឃើញសាកសពបុរសម្នាក់ អណ្តែតទឹករសាត់មកជាប់កញ្ជែតហើយសង្ស័យថា ជាតៃកុងរថយន្តកុងតឺន័រ ។
បើយោងតាមសមត្ថកិច្ចបានដាក់សង្ស័យថា សាកសពបុរសដែលមិនទាន់ស្គាល់អត្តសញ្ញាណខាងលើនេះអាចជាតៃកុងរថយន្តកុងទីន័រ ដែលបានជួបគ្រោះថ្នាក់ចរាចរណ៍ កាលពីថ្ងៃទី២០ ខែសីហាឆ្នាំ២០១៨(ម្សិលមិញ) ពីព្រោះបុរសម្នាក់ដែលត្រូវសមត្ថកិច្ចឃាត់ខ្លួនកាលម្សិលមិញបានអៈអាងថា ខ្លួនគ្រាន់តែជាព្រូរថយន្តទេ ។
ដោយឡែកនៅកន្លែងកើតហេតុ ក៏មានតំណាងខាងក្រុមហ៊ុនរថយន្តមកប្រាប់ថា មិនអាចទាក់ទងទៅតៃកុង ដែលបើកបររថយន្តបង្កគ្រោះថ្នាក់កាលពីម្សិលមិញបាននោះដែរ (បាត់ការទំនាក់ទំនង)។
ប៉ុន្តែទោះបីជាយ៉ាងណាក៏ដោយ ការប្រទះឃើញសាកសពនាពេលនេះ សមត្ថកិច្ចមិនទាន់ដឹងថា តើការស្លាប់របស់ជនរងគ្រោះដោយសារអ្វីនៅឡើយទេ ខណៈដែលពេលនេះសមត្ថកិច្ចជំនាញកំពុងខ្នៈខ្នែងយកសាកសពចេញទឹករង់ចាំធ្វើការស្រាវជ្រាវបន្តទៅទៀត ៕ ដោយ ៖ វ៉ៃកូ
