ខេត្តស្វាយរៀង ៖ ក្រោយពីមានការភ្ញាក់ផ្អើលដល់ពលរដ្ឋចោមរោមមើល និងតាមការស្រាវជ្រាវរបស់សមត្ថកិច្ច ខណៈដែរប្រទះឃើញសាកសពបុរសម្នាក់អណ្តែតទឹករសាត់មកជាប់កញ្ជែតនោះពិតជាតៃកុងរថយន្តកុងតឺន័រ ដែលជួបគ្រោះថ្នាក់ចរាចរណ៍កាលពីថ្ងៃទី២០ ខែសីហា ឆ្នាំ២០១៨ប្រាកដមែន ។
ការប្រទះឃើញ និងបង្កមានការភ្ញាក់ផ្អើលនេះ បានកើតឡើងកាលពីវេលាម៉ោង៦ព្រលប់ ថ្ងៃទី២១ ខែសីហា ឆ្នាំ២០១៨ នៅត្រង់ចំណុចក្បាលស្ពានខាងកើតឈៀងខាងជើង ស្ថិតក្នុងភូមិ បាក់រនាស់ សង្កាត់ សង្ឃ័រ ក្រុងស្វាយរៀង ខេត្តស្វាយរៀង ។
បើយោងតាមសមត្ថកិច្ចបានបញ្ជាក់ឲ្យដឹងថា សាកសព ដែលពលរដ្ឋប្រទះឃើញនោះ ពិតជាតៃកុងរថយន្តកុងតឺន័រពិតប្រាកដមែន ដែលជួបគ្រោះថ្នាក់ចរាចរណ៍កាលពីម្សិលមិញ ពីព្រោះបុរសម្នាក់ ដែលត្រូវសមត្ថកិច្ចឃាត់ខ្លួនកាលម្សិលមិញប្រាប់ថា ខ្លួនជាព្រូរថយន្តតែប៉ុណ្ណោះ ។
នៅកន្លែងកើតហេតុ ក៏មានតំណាងខាងក្រុមហ៊ុនរថយន្តមកប្រាប់ថា មិនអាចទាក់ទងទៅតៃកុង ដែលបើកបររថយន្តបង្កគ្រោះថ្នាក់កាលពីម្សិលមិញបាននោះដែរ ។ បន្ទាប់ពីសមត្ថកិច្ចយកទូកអូសសពមកលើគោកឆែកឆេររកមើលឃើញកាបូបដៃ ក្នុងហោប៉ៅ ដែលកាន់អត្តសញ្ញាណប័ណ្ណមានឈ្មោះ ហួត កំណត់ ភេទប្រុស មានទីលំនៅភូមិសន្សំកុសល២ សង្កាត់ បឹងទំពុន ខណ្ឌមានជ័យ រាជធានីភ្នំពេញ ។
ក្រោយពីសមត្ថកិច្ចពិនិត្យលើសាកសពរួចមក សមត្ថកិច្ចអះអាងថា ពិតជាតៃកុងរថយន្តកុងទីន័រ ដែលជួបចរាចរណ៍កាលពីម្សិលមិញពិតប្រាកដមែន ។ សាកសពត្រូវបានសមត្ថកិច្ចទាក់ទងទៅខាងក្រុមគ្រួសារដើម្បីមកទទួលសពយកទៅធ្វើបុណ្យតាមប្រពៃណី ។
សូមបញ្ជាក់ផងដែរថាៈរថយន្តកុងទឺន័រមួយគ្រឿងបាន រេចង្កូតបុកបង្កាន់ដៃស្ពាន និងម៉ូតូក្មេងស្ទូចត្រីបានធ្លាក់ចូលទឹកទន្លេវ៉ៃគោ តែសំណាងល្អហើយគ្មានបង្កគ្រោះថ្នាក់ដល់អ្នកធ្វើដំណើរណាម្នាក់នោះទេ ។
ករណីនេះ បានកើតឡើងកាលវេលាម៉ោង៤និង២៥នាទីរសៀល ថ្ងៃទី២០ ខែសីហា ឆ្នាំ២០១៨ នៅលើផ្លូវជាតិលេខ១ ត្រង់ចំណុចក្បាលស្ពានហាយវ៉េ ប៉ែកខាងកើត ស្ថិតក្នុងភូមិ បាក់រនាស់ សង្កាត់ សង្ឃ័រ ក្រុង ស្វាយរៀង ខេត្តស្វាយរៀង ៕ វ៉ៃកូ