សម័យកាលបច្ចុប្បន្ន ពិតជាពិបាកជឿថា សេដ្ឋីមានទ្រព្យស្តុកស្តម្ភនៅប្រទេសជឿនលឿនមួយ បែរជាចង់រៀបការជាមួយស្ត្រីកសិករម្នាក់ គ្មានទ្រព្យ ថែមទាំងជំពាក់បំណុល វ័យច្រើនគួរសម ថែមទាំងមេម៉ាយ… ។
នេះជារឿងពិតរបស់សេដ្ឋីសញ្ជាតិនៅអេស្បាញដើមកំណើតចិនម្នាក់ ឈ្មោះ Yao Nashan ជាមួយស្ត្រីកសិករឈ្មោះ Lijuan ។ និស្ស័យស្នេហ៍របស់ពួកគេផ្តើមពីរឿងចៃដន្យមួយនៅថ្ងៃទី ៦ ខែកក្កដា ឆ្នាំ ២០១៣ ។ ថ្ងៃនោះ Nashan និងមិត្តភក្តិម្នាក់ កំពុងដើរទេសចរនៅស្រុក Vandon ខេត្តហ្សីជៀង ជ្រុលម៉ោងរថភ្លើងចេញចោល ។ Nashan ក៏គោះទ្វារផ្ទះមួយ ដើម្បីសុំជ្រកបណ្តោះអាសន្នមួយយប់ ។
នោះគឺជាផ្ទះរបស់អ្នកស្រី Liu Lijuan ដែលគ្រានោះជាស្ត្រីមេម៉ាយ រស់នៅម្នាក់ឯង ។ ស្មានពុំដល់ថា ក្រោយជជែកគ្នាលេងអ្នកទាំង២ មានចំណុចស្រដៀងគ្នាច្រើនណាស់ ពិសេសប្តីរបស់អ្នកស្រីបានស្លាប់ដោយសារជំងឺមហារីក ហើយកូនស្រីចិញ្ចឹមតែម្នាក់គត់ក៏មានជំងឺឆ្អឹងរ៉ាំរ៉ៃ ហើយអ្នកស្រីក៏បានរត់គ្រប់ទីកន្លែងដើម្បីរកពេទ្យព្យាបាល -បំណុលក៏ជំពាក់គេវ័ណ្ឌក ប៉ុន្តែសំណាងល្អដែលនាងបានជាសះស្បើយវិលត្រឡប់ទៅធ្វើការនៅទីក្រុងវិញ ។ យ៉ាងនេះក្តីអ្នកស្រីអង្គុយរ៉ាយរ៉ាប់ពីជីវិតរស់នៅ ដើម្បីប្រឹងសងបំណុល ដោយទឹកមុខញញឹម គ្មានតូចចិត្តអ្វីបន្តិច ។
ខណៈពេលនោះលោក Nashan ក៏ជាបុរសពោះម៉ាយប្រពន្ធស្លាប់ ដោយជំងឺមហារីកដែរ ។ ទោះបីលោករស់នៅលើគំនរទ្រព្យក៏ពិតមែន ប៉ុន្តែលោកពុំមានអារម្មណ៍ “សុទិដ្ឋិនិយម” ប្រឈមមុខនឹងជីវិតទាំងចិត្តរីករាយសោះ ។ លោកពិតជាពុំដែលប្រទះនារីម្នាក់អង់អាចក្លាហានហ៊ានប្រឈមមុខនឹងការលំបាក និងពុំថ្ងូរអ្វីសូម្បីបន្តិចបែបនេះឡើយ ។
លោកបានអញ្ជើញនាង Liu Lijuan ឲ្យទៅលេងនៅអេស្ប៉ាញ ហើយសន្យានឹងជួយនាងសងបំណុលគេ ។ ប៉ុន្តែ Lijuan បានបដិសេធព្រមទាំងសន្យាជាមួយលោកថានាងប្រឹងធ្វើការ ដើម្បីសងបំណុលគេ ។
វិលត្រឡប់មកអេស្បាញវិញ Nashan តែងនឹកដល់អ្នកស្រី Lijuan ។ គាត់នឹកគិតថា Lijuan គឺជាមនុស្សដែលលោកស្វែងរកដើម្បីកំដរជីវិតពេលចាស់ជរា ។ ចុងក្រោយលោកសម្រេចចិត្តប្រគល់ទ្រព្យសម្បត្តិ និងការងាររកស៊ីឲ្យកូន ៣នាក់ គ្រប់គ្រងហើយលោកវិលត្រឡប់មកប្រទេសចិនវិញ ។
លោកបានក្លាយជាមេចុងភៅធ្វើការក្នុងហាងរបស់អ្នកស្រី Lijuan នៅរដូវស្លឹកឈើជ្រុះ ឆ្នាំ ២០១៤ ។ ដោយចេះធ្វើប៊ីសស្តេកយ៉ាងស្ទាត់ជំនាញ តាមបែបអឺរ៉ុប ធ្វើឲ្យការងាររកស៊ីរបស់ហាងអ្នកស្រី Lijuan ដាច់យ៉ាងខ្លាំង ។
រហូតទល់ខែតុលា ឆ្នាំ ២០១៥ លោក Nashan បានសុំនាង Lijuan រៀបការ ។ ដំបូងអ្នកស្រីអល់អែក ព្រោះខ្លាចខ្លួនក្លាយជា “បញ្ហា” ធ្វើឲ្យគ្រួសារលោក Nashan បែកបាក់ ពិសេសរឿងទ្រព្យសម្បត្តិ។ ប៉ុន្តែលោក Nashan ប្រាប់ថាគាត់បានរៀបចំរឿងនេះដាច់ស្រេចហើយ ។
ដំបូងកូនៗរបស់លោក Nashan នៅ “ប្រឆាំង” ចំពោះការដែលឪពុកខ្លួនបោះបង់អ្វីៗទាំងអស់ មករស់នៅចិន ប៉ុន្តែក្រោយមកដោយឃើញស្នាមញញឹមប្រកបដោយសុភមង្គលលើផ្ទៃមុខឪពុក ពួកគេងាកមកគាំទ្រវិញ ។
ចុងក្រោយអាពិហ៍ពិពាហ៍របស់អ្នកទាំងពីរ បានប្រព្រឹត្តទៅនៅពិធីបុណ្យណូអែលឆ្នាំ ២០១៥ -ពួកគេក្លាយជាប្តីប្រពន្ធដូចក្តីស្រមៃ ។ ជឿទេថា រឿងនិទានពុំមែនតែងតែប្រឌិតទេ ពេលខ្លះវាកើតឡើងពីរឿងពិតដូចស្នេហាខាងលើអីចឹង ៕ ចន្ទ្រា
