កំពង់ចាម៖ ជនសង្ស័យម្នាក់ ពាក់ព័ន្ធករណីក្លែងឯកសណ្ឋានអាវុធហត្ថ និងប្រើប្រាស់កាំភ្លើងខ្លីគំរាមសម្លាប់ជនរងគ្រោះម្នាក់ ត្រូវបានកងកម្លាំងអាវុធហត្ថខេត្តកំពង់ចាម ត្រូវឃាត់ខ្លួន នៅបញ្ជាកាដ្ឋានកងរាជអាវុធហត្ថខេត្ត ដើម្បីចាត់ការតាមនីតិវិធី។
កម្លាំងអាវុធហត្ថខេត្តកំពង់ចាម បានឲ្យដឹងថា ក្រោយពីទទួលបានពាក្យបណ្តឹង នៅថ្ងៃទី១៩ ខែសីហា ឆ្នាំ២០១៨ ពីឈ្មោះ ហួត ហ្វុងហ្វុង ភេទស្រី អាយុ២៥ ឆ្នាំ រស់នៅផ្ទះលេខ៧៥T ផ្លូវជាសុផារ៉ា សង្កាត់ភ្នំពេញថ្មី ក្រុងភ្នំពេញ បានប្តឹងឈ្មោះ ព្រុំ នាង ភេទប្រុស អាយុ៣២ ឆ្នាំ មុខរបរមិនពិតប្រាកដ រស់នៅផ្ទះ៥៦E ផ្លូវ៥៨៨ សង្កាត់ ទឹកល្អក់២ ខណ្ឌទួលគោក ក្រុងភ្នំពេញ ដែលបានយកអាវុធខ្លី មិនស្គាល់ម៉ាក មកភ្ជង់គំរាមសម្លាប់ខ្លួន នៅវេលាម៉ោង១៦ និង៣០នាទីថ្ងៃទី១៥ ខែសីហា ឆ្នាំ២០១៨ នៅផ្ទះម្តាយរបស់ខ្លួន ក្នុងខណៈពេលដែលខ្លួនមកលេងផ្ទះម្តាយ ឈ្មោះ ស៊ាង ពៅ នៅភូមិចំណោម ឃុំបុសខ្នុរ ស្រុកចំការលើ ខេត្តកំពង់ចាម នៅថ្ងៃទី២០ ខែសីហា ឆ្នាំ២០១៨ កម្លាំងជំនាញកងរាជអាវុធហត្ថខេត្ត បានឃាត់ខ្លួនជនសង្ស័យឈ្មោះ ព្រុំ នាងហៅ ព្រុំ តារាណុច នៅចំណុច ហាងកាហ្វេស្ថិតនៅ ភូមិប្រសើ ឃុំបុសខ្នុរ ស្រុកចំការលើ ខេត្តកំពង់ចាម និងដកហូតយកបានអាវុធខ្លីប្រើហ្គាស ១ដើម ដែលនៅជាប់នឹងខ្លួនជនសង្ស័យ និងបានឆែកឆេរ រកឃើញឯកសណ្ឋានកងរាជអាវុធហត្ថ ដែលមានពាក់សក្តិថ្នាក់វរសេនីយ៍ឯក ជារបស់ ជនសង្ស័យ ដែលបានកាន់កាប់រក្សាទុក ប្រើប្រាស់បន្លំ ជានាយទាហានកងរាជអាវធហត្ថ។
បច្ចុប្បន្នជនសង្ស័យ និងវត្ថុតាងខាងលើ កំពុងឃាត់ខ្លួន នៅបញ្ជាកាដ្ឋានកងរាជអាវុធហត្ថខេត្ត ដើម្បីចាត់ការតាមនីតិវិធី៕ ដោយ៖បញ្ញាស័ក្តិ