បុរសថៃម្នាក់បានចំណាយពេលជាង ១ ឆ្នាំ ធ្វើដំណើរពីខេត្ត Trang ឆ្ពោះទៅកាន់ភ្នំ Doi Inthanon នៅក្នុងខេត្ត Chiang Mai ដើម្បី «ពង្រាយ» ឆ្អឹងរបស់មិត្តស្រីគាត់ដែលបានស្លាប់ ។
កាលពីរសៀលថ្ងៃពុធ Sakchai Suphanmart អាយុ ៣៩ ឆ្នាំ មកពីស្រុក Muang ខេត្ត Udon Thani បានធ្វើដំណើរដល់ផ្លូវសម្រាប់វាងមួយកន្លែង នៅក្នុងស្រុក San Patong ក្នុងខេត្ត Chiang Mai ។
គាត់ត្រូវបានឃើញរុញរទេះមួយ ផ្ទុកពេញទៅដោយរបស់របរផ្សេងៗរបស់គាត់ និងអមដំណើរជាមួយសត្វឆ្កែរបស់គាត់២ក្បាល រួមនឹងសត្វឆ្មាពណ៌ខ្មៅ១ក្បាលផងដែរ ។
Sakchai បានប្រាប់ The Nation ថា គាត់បានចាប់ផ្តើមដើរពី Trang នៅក្នុងខែមករា ឆ្នាំ២០១៧ មកម្លេះ ។ ក្នុងអំឡុពេលធ្វើដំណើរដ៏វែងនេះ គាត់បានស្នាក់នៅពេលយប់ នៅតាមដងផ្លូវធ្វើដំណើរ ដោយមានការជួយឧបត្ថម្ភពីអ្នកភូមិ ។ ជូនកាល គាត់ត្រូវដេកនៅវាលកប់ខ្មោចក៏មានដែរ ។
Sakchai និយាយថា គាត់កំពុងបំពេញនូវការសន្យាមួយ ដែលបានផ្តល់ចំពោះមិត្តស្រីរបស់គាត់ ដែលបានស្លាប់នៅក្នុងខែតុលា ឆ្នាំ២០១៦ ថានឹងនាំនាងទៅលេងភ្នំ Doi Inthanon ។ គាត់បានទៅធ្វើការនៅក្នុងខេត្ត Trang ទីកន្លែងដែលគាត់បាននារីម្នាក់ ហើយបានសន្យាជាមួយនាងថា នៅពេលសន្សំលុយបានច្រើន គាត់នឹងនាំនាងធ្វើដំណើរកម្សាន្តជុំវិញប្រទេស និងជាពិសេសមកកាន់ Doi Inthanon នេះតែម្តង ។
Sakchai បន្តថា គាត់មានគម្រោងធ្វើបុណ្យកុសលដ៏ល្អមួយ សម្រាប់មិត្តស្រីរបស់គាត់ នៅលើកំពូលភ្នំនេះ និងបាចឆ្អឹងរបស់នាងនៅទីនេះ ។
គាត់ក៏បានប្រាប់ឲ្យដឹងផងដែរថា៖ «ខ្ញុំបានជាប់សត្វឆ្កែ២ក្បាល និងកូនឆ្មា១ក្បាល នៅតាមផ្លូវធ្វើដំណើរ ។ ខ្ញុំបានប្រទះឃើញឆ្កែ១ក្បាលដំបូង ត្រូវបានគេបោះបង់ចោលនៅក្នុង Samut Prakan និង១ក្បាលទៀត នៅ Phitsanulok ហើយពួកវាទាំងពីរក៏បានដើរតាមខ្ញុំតែម្តង ។ បន្ទាប់មក ខ្ញុំប្រទះឃើញកូនឆ្មាពណ៌ខ្មៅ១ក្បាល កំពុងនៅម្នាក់ឯងនៅលើចិញ្ចើមផ្លូវមួយកាលពីថ្ងៃពុធ ។ ឃើញដូច្នេះ ខ្ញុំក៏បានចាប់វាមកជាមួយ ព្រោះបារម្ភខ្លាចក្រែងវារត់ឆ្លងផ្លូវត្រូវរថយន្តបុក» ។
ទោះយ៉ាងណា គាត់ពុំអាចទប់ទឹកភ្នែកបានទេ នៅពេលនិយាយដំណើររឿងរ៉ាវអំពីមិត្តស្រីរបស់គាត់ ព្រោះថា រវាងគាត់ និងមិត្តស្រីរបស់គាត់ ពិតជាស្រលាញ់គ្នាស្មោះស្ម័គ្រខ្លាំងណាស់ ខណៈធ្វើការជាមួយគ្នានៅក្នុងខេត្ត Trang ។ គាត់បន្តថា គាត់មិនអាចឈប់គិតអំពីនាងបានទេ ក្នុងមួយជីវិតនេះ ៕ ឧត្តម (The Nation, Coconuts)
