ឧត្តរមានជ័យ ៖ ជនសង្ស័យចំនួន ២នាក់ ពាក់ព័ន្ធករណីគ្រឿងញៀន រួមនឹងវត្ថុតាង នៅថ្ងៃទី២៥ខែសីហានេះ ត្រូវបានមន្ត្រីជំនាញកងរាជអាវុធហត្ថខេត្តឧត្តរមានជ័យ កំពុងកសាងសំណុំរឿង បញ្ជូនទៅតុលាការ ដើម្បីចាត់ការតាមច្បាប់។
សូមបញ្ជាក់ថា នៅវេលាម៉ោង ៨ និង ៤៥នាទី ថ្ងៃទី២៤ ខែសីហា ឆ្នាំ២០១៨ កម្លាំងមូលដ្ឋានកងរាជអាវុធហត្ថស្រុកអន្លង់វែង ដឹកនាំដោយលោកវរសេនីយ៍ទោ ងួន ទ្ធីរិទ្ធ មេបញ្ជាការស្រុក បានចុះបង្ក្រាបករណីចែកចាយសារធាតុញៀន ដោយឃាត់ខ្លួនជនសង្ស័យចំនួន ២នាក់ នៅចំណុចភូមិអូរគគីរលើ ឃុំលំទង ស្រុកអន្លង់វែង ខេត្តឧត្តរមានជ័យ។
ជនសង្ស័យទាំង២នាក់មានឈ្មោះ ហេង មួង ភេទប្រុស អាយុ ៣៦ឆ្នាំ មុខរបរធ្វើស្រែ រស់នៅភូមិអភិវឌ្ឍន៍ ស្រុកអន្លង់វែង ខេត្តឧត្តរមានជ័យ និងឈ្មោះ លន សាវឿន ភេទប្រុស អាយុ ៣២ឆ្នាំ មុខរបរមិនពិតប្រាកដ រស់នៅភូមិត្រពាំងសេះ សង្កាត់គោកចក ក្រុង/ខេត្តសៀមរាប រួមទាំងដកហូតបានវត្ថុតាងរួមមាន៖ ម្សៅក្រាមពណ៌សចំនួន ១១ថង់តូច និង ១ថង់ ទំងន់ ១២៦,៥១ក្រាម រថយន្ត Lexus RX៣០០ ចំនួន ១គ្រឿង ទូរស័ព្ទចំនួន ៥គ្រឿង ប្រាក់រៀលចំនួន ១៥០.០០០រៀល កាបូបដៃពណ៌ខ្មៅចំនួន ១ ថង់ច្រកគ្រឿងញៀន និងសម្ភារសម្រាប់សេពសារធាតុញៀនមួយចំនួន។
បច្ចុប្បន្ន ជនសង្ស័យ និងវត្ថុតាង ត្រូវបានមន្ត្រីជំនាញកងរាជអាវុធហត្ថខេត្ត កំពុងកសាងសំណុំរឿង ដើម្បីចាត់ការបន្តតាមនីតិវិធី៕ ដោយ ៖ បញ្ញាស័ក្តិ
