ថ្មីៗនេះលើបណ្តាញសង្គមចិនបានចែករំលែក វីដេអូមួយ បង្ហាញឲ្យឃើញ “កូនក្រមុំមុខលុយ” ម្នាក់បានស្រែកឡូឡា ទាមទារលុបមង្គលការចោល ព្រោះតែឪពុកក្មេក មិនរក្សា… ពាក្យសន្យា ហើយដាក់លុយក្នុងស្រោមសំបុត្រ… តិចពេក ។
តាមប្រពៃណីចិន បន្ទាប់ពីទទួលពែងតែពីកូនក្រមុំ កូនកម្លោះ ឪពុកម្តាយក្មេកទាំងសងខាង និងឲ្យលុយធីបជាការជូនពរ ។ ក្នុងស្រោមសំបុត្រអាចជាមាស កម្មសិទ្ធិដីធ្លី ផ្ទះ ឬលុយសុទ្ធ ។ល។
ក្នុងមង្គលការខាងក្រោមនេះ ពេលកូនក្រមុំទទួលយកស្រោមសំបុត្រពីឪពុកក្មេករួច ក៏មានអាកប្បកិរិយាចម្លែក ។ នាងបានបើកមើលភ្លាម ហើយធ្វើមុខស្ងួត ព្រោះតែចំនួនលុយខុសពីការ … សន្យា ។
កូនក្រមុំទទួលស្រោមសំបុត្ររួចបើកមើលភ្លាម ។
ក្រោយមកទើបដឹងថា បុរសជាឪពុកបានសន្យាឲ្យកូនក្រមុំ ១០.០០១ យាន់ (ប្រមាណ១៥០០ USD) ។ លុយនេះវាពុំច្រើនទេ តែមានន័យថាក្នុងចំណោមមនុស្ស ១០.០០០នាក់ ទើបរកបាន… ម្នាក់ដែលល្អ ។ ប៉ុន្តែពេលបើកស្រោមសំបុត្រឃើញតែ ១.០០១ យាន់ (ប្រមាណ ១៥០ USD) ទើបធ្វើឲ្យនាងផ្ទុះកំហឹង ។ នារីមុខលុយបានគ្រវែងស្រោមសំបុត្រ ហើយស្រែកខ្លាំងៗថា ៖ “ខ្ញុំនឹងមិនរៀបការទៀតទេ!” ។
អ្នកមានវត្តមាននៅទីនោះ សុទ្ធសឹងស្រឡាំងកាំង ។ កូនម្លោះបង្ហាញភាពអស់សង្ឃឹម ហើយខឹង រីឯបុរសជាឪពុកពិតជា “កប់យោបល់” ។
កូនក្រមុំមុខលុយបោះស្រោមសំបុត្រចោល ហើយទាមទារលុបមង្គលការ ។
ទោះបីពុំដឹងលទ្ធផលចុងក្រោយយ៉ាងណា តែប្រាកដណាស់ទង្វើបែបនេះ វាពុំមានសិរីសួស្តីសម្រាប់គ្រួសារមួយថ្ងៃអនាគតឡើយ ៕ ចន្ទ្រា
