ខេត្តព្រះសីហនុ ៖ ប្រធានមន្ទីរពេទ្យបង្អែកខេត្តព្រះសីហនុ គឺលោកវេជ្ជបណ្ឌិត សេង ណុង មានប្រសាសន៍ថា មានស្ត្រីវ័យចំណាស់មួយរូបអាយុ ៧៨ឆ្នាំ កំពុងមានជម្ងឺធ្ងន់ និងកំពុងសម្រាកព្យាបាលនៅមន្ទីរពេទ្យបង្អែកខេត្តនេះ ដោយអ្នកជម្ងឺរូបនោះមិនមានសាច់ញាតិមកមើលថែទេ។
ភ្លាមៗ ក្រោយពីទទួលបានដំណឹងដ៏សោកសង្រេងខាងលើនេះ លោកឧកញ៉ា ទៀ វិចិត្រ ក៏បានចុះទៅជួបជីដូនវ័យចំណាស់រូបនោះ ដោយផ្ទាល់ដល់មន្ទីរពេទ្យបង្អែក កាលពីវេលាថ្ងៃត្រង់ថ្ងៃសៅរ៍ ទី២៥ ខែសីហា ឆ្នាំ២០១៨។
នាឱកាសនោះ លោកឧកញ៉ា ទៀ វិចិត្រ បាននាំយកសម្លៀកបំពាក់ សម្ភារៈប្រើប្រាស់ផ្ទាល់ខ្លួន ព្រមទាំងម្ហូបអាហារច្រើនមុខ និងថវិការចំនួន១លានរៀល យកទៅជួយឧបត្ថម្ភ លោកយាយវ័យ ៧៨ឆ្នាំរូបនោះ។
ជីដូនវ័យជរាកំពុងមានជំងឺរូបនេះ បានថ្លែងអំណរគុណ និងជូនពរលោកឧកញ៉ា ទៀ វិចិត្រ ព្រមទាំងគ្រួសារ ដែលនាំជំនួយឧបត្ថម្ភ មកផ្តល់ជូនរូបគាត់ពេលនេះ។ លោកយាយមានប្រសាសន៍ថា រូបគាត់មានឈ្មោះ ហ៊ុយ ជុន អាយុ ៧៨ឆ្នាំ រស់នៅទំនប់រលក ក្នុងសង្កាត់លេខ១ ក្រុងព្រះសីហនុ។ ហើយថា បច្ចុប្បន្ននេះ រូបគាត់គ្មានកូននៅមើលថែរទេ។
លោកយាយបន្តថា កូនៗ របស់គាត់ចំនួន ២នាក់ ពួកគេរស់នៅខេត្តក្រចេះឯណោះ ហើយនៅពេលជម្ងឺ របស់គាត់ធ្វើទុក្ខម្តងៗ ទើបរូបគាត់ បានរកម៉ូតូឌុបឲ្យជូនមកសម្រាកព្យាបាល នៅពេទ្យបង្អែកខេត្តព្រះសីហនុជាបន្តបន្ទាប់មកនេះ។
លោកយាយ ហ៊ុយ ជុន បញ្ជាក់ថា រាល់ថ្ងៃនេះ រូបគាត់មានតែចៅតូចៗ (ចៅតួត) មិនទាន់ដឹងក្តីចំនួន ២នាក់ប៉ុណ្ណោះមករស់នៅជាមួយ និងមិនអាចជួយអ្វីគាត់បានទេ ដោយសារនៅក្មេងៗពេក។
និយាយដល់ត្រង់ចំណុចនេះ លោកវេជ្ជបណ្ឌិត សេង ណុង ប្រធានមន្ទីរពេទ្យបង្អែកខេត្តព្រះសីហនុ មានប្រសាសន៍ថា ជីដូនមានជំងឺខាងលើនេះ គាត់មានជម្ងឺសួត ស្គមរីងរៃ។ លោកវេជ្ជបណ្ឌិតបន្តថា នៅពេលជម្ងឺ របស់ស្ត្រីវ័យចាស់ខាងលើ ធ្វើទុក្ខម្តងៗ រូបគាត់តែងជិះម៉ូតូឌុប មករកពេទ្យជាមួយចៅតូចៗទាំងពីរនាក់របស់គាត់។
លោកវេជ្ជបណ្ឌិតបន្តថា កន្លងមក ពុំដែលឃើញមានឃើញសាច់ញាតិជាមនុស្សចាស់ រូបណាម្នាក់ មកមើលថែរស្ត្រីវ័យចំណាស់ខាងលើនេះទេ។
លោក សេង ណុង ឲ្យដឹងដូច្នេះ រួចបញ្ជាក់ថា ខាងក្រុមគ្រូពេទ្យ ក្រៅពីបានជួយព្យាបាល ខាងមន្ទីរពេទ្យក៏ទទួលជួយមើលថែរជីដូនខាងលើនេះផងដែរ។
យ៉ាងណាក៏ដោយចុះ លោកឧកញ៉ា ទៀ វិចិត្រ មានប្រសាសន៍ជូនពរ និងបួងសួង សុំឲ្យជីដូនក្រីក្ររូបនេះ ឆាប់ជាសះស្បើយពីជម្ងឺ និងមានសុខភាពល្អឡើងវិញ។
បន្ថែមលើនេះ លោកឧកញ៉ា ទៀ វិចិត្រ បានបញ្ជាក់ថា ការនាំយកជំនួយទៅឧបត្ថម្ភមនុស្សវ័យចំណាស់ខាងលើ គឺជាការងារមនុស្សធ៌ម របស់លោកសុទ្ធសាធ ដែលរូបគាត់ធ្លាប់បានធ្វើសកម្មភាពមនុស្សធម៌ សម្រាប់ មនុស្សចាស់ជរា មានជម្ងឺដោយពុំបានគិតពីសាវតាផ្ទាល់ របស់គ្រួសារអ្នកជម្ងឺឡើយ។
លោកឧកញ៉ា បានសង្កត់ធ្ងន់ថា រូបគាត់នឹងនៅតែបន្តធ្វើបុណ្យសប្បុរស ឬធ្វើមនុស្សជូនចាស់ជរា ទុរគតជន និងជនបាត់បង់កម្លាំងពលកម្មជាដើមជាបន្តទៀត នៅថ្ងៃខាងមុខ ទៅតាមលទ្ធភាពជាក់ស្តែង ដ៏រាបណារូបលោកនៅមានជីវិត៕ ដោយ៖ ដែន សីមា
