កាលពីព្រឹកថ្ងៃទី២០ ខែធ្នូ ឆ្នាំ២០២៤ លោកជំទាវបណ្ឌិតសភាចារ្យ ភឿង សកុណា រដ្ឋមន្រ្តីក្រសួងវប្បធម៌និងវិចិត្រសិល្បៈ បានអញ្ជើញជាអធិបតីសម្ពោធបើពិព័រណ៍ស្នាដៃសិប្បកម្មដូនតា រៀបចំឡើងដោយនាយកដ្ឋានសិល្បៈសូនរូបនិងសិល្បៈសិប្បកម្ម និងនាយកដ្ឋានអភិវឌ្ឍន៍វប្បធម៌ នៃអគ្គនាយកដ្ឋានបច្ចេកទេសវប្បធម៌ ក្រសួងវប្បធម៌និងវិចិត្រសិល្បៈ ប្រារព្ធនៅក្នុងបរិវេណសារមន្ទីរខ្លែងខ្មែរ។
ការរៀបចំពិព័រណ៍នេះ មានគោលបំណងផ្តល់ជូនសាធារណជន ជាពិសេសយុវជននិងសិស្សនិស្សិតបានស្វែងយល់អំពីសិប្បកម្មខ្មែរតាមសហគមន៍នានាក្នុងប្រទេសកម្ពុជា។ ពិព័រណ៍នេះ ក៏មានបំណងរៀបចំបង្ហាញជូនសាធារណជនបានស្វែងយល់ពីស្នាដៃនៃការបណ្តុះបណ្តាលជំនាញវិជ្ជាជីវៈដូនតា និង “ក្រមា” ជាបេតិកភណ្ឌវប្បធម៌អរូបីនៃមនុស្សជាតិរបស់កម្ពុជា ដែលទើបបានចុះក្នុងបញ្ជីរបស់អង្គការយូណេស្កូ។
ថ្លែងក្នុងពិធីខាងលើនេះ លោកជំទាវបណ្ឌិសភាចារ្យបានគូសបញ្ជាក់ថា សិប្បកម្មដូនតាគឺជាបេតិកភណ្ឌវប្បធម៌អរូបី ដែលត្រូវយកចិត្តទុកដាក់លើកស្ទួយ ថែរក្សា និងអភិរក្សឲ្យបានគង់វង្ស។ជាពិសេសនៅតាមបណ្តារាជធានី ខេត្តសូមខិតខំសិក្សាស្រាវជ្រាវ ចងក្រង ដើម្បីមនុស្សជំនាន់ក្រោយ៕ រក្សាសិទ្ធដោយ៖សុទ្ធលី
