ភ្នំពេញ៖ ការចូលរួមកម្មវិធីប្រកួតជួញដូរភាគហ៊ុនស៊ីអាយអិមប៊ី ប្រចាំតំបន់អាស៊ាន ដើម្បីបង្កើនចំណេះដឹង និងជំនាញវិនិយោគ Platform និងលើកកម្ពស់ការទទួលស្គាល់ លើសមត្ថភាពរបស់និស្សិតកម្ពុជា ពីតំបន់អាស៊ាន ដ៏ទូលំទូលាយ។
ធនាគារស៊ីអាយអិមប៊ី ភីអិលស៊ី (CIMB) សហការជាមួយ ក្រុមហ៊ុនមូលបត្រកម្ពុជា (CSX) បានប្រគល់រង្វាន់ជ័យលាភី ថ្នាក់ជាតិ ដល់ក្រុមជ័យលាភីកំពូល ៣ក្រុម នៃកម្មវិធីប្រកួតជួញដូរភាគហ៊ុន ស៊ីអាយអិមប៊ី ប្រចាំតំបន់អាស៊ាន ឆ្នាំ២០១៧ នៅកម្ពុជា ។
កម្មវិធីប្រគល់រង្វាន់នេះ បានធ្វើឡើងនៅថ្ងៃទី២៣ ខែវិច្ឆិកា ឆ្នាំ២០១៧នេះ នាក្រុមហ៊ុនមូលបត្រកម្ពុជា (CSX)។ ការប្រកាសឈ្មោះក្រុមជើងឯក ថ្នាក់ជាតិដែលនឹងត្រូវចូលរួម ប្រកួតប្រជែងវគ្គផ្ដាច់ព្រ័ត្រថ្នាក់តំបន់ នៅប្រទេសឥណ្ឌូនេស៊ី នាខែមករា ឆ្នាំ២០១៨ខាងមុខនេះ ជាមួយនឹងក្រុមជើងឯកមកពី ប្រទេស៤ផ្សេងទៀត ក្នុងតំបន់អាស៊ាន រួមមាន ម៉ាឡេស៊ី សិង្ហបុរី ឥណ្ឌេស៊ី និងថៃ ដែលមានប្រាក់រង្វាន់ចំនួន ៤ម៉ឺនដល្លារ និងដំណើរទស្សនកិច្ច ទៅកាន់ផ្សារមូលបត្រតូក្យូ ប្រទេសជប៉ុន ។
លោក ប៊ុន យីន ប្រធាននាយកប្រតិបត្តិ នៃធនាគារ CIMB បានមានប្រសាសន៍ថា “ខ្ញុំសម្ដែងនូវ ការកោតសរសើរដល់ ក្រុមប្រឡងទាំងអស់ ហើយខ្ញុំមានសេចក្ដីរំភើប និងចូលរួមអបអរសាទរដល់ក្រុមជ័យលាភីទាំង ៣ក្រុម ជាពិសេសគឺក្រុមជើងឯកថ្នាក់ជាតិ ដែលត្រូវបាជ្រើសរើសជាក្រុមជ័យលាភីតំណាងកម្ពុជា ក្នុងការចូលរួមប្រកួតវគ្គផ្ដាច់ព្រ័ត្រ នៃកម្មវិធីប្រកួតជួញដូរ ភាគហ៊ុនស៊ីអាយអិមប៊ី ប្រចាំតំបន់អាស៊ាន ឆ្នាំ២០១៧ នៅឥណ្ឌូនេស៊ី” ។
លោកបន្តថា ការចូលរួមកម្មវិធីប្រកួតជួញដូរ ភាគហ៊ុនស៊ីអាយអិមប៊ី ប្រចាំតំបន់អាស៊ាន គឺមិនត្រឹមតែបង្កើនចំណេះដឹង និងជំនាញវិនិយោគ Platform ប៉ុណ្ណោះទេ ថែមទាំងលើកកម្ពស់ការទទួលស្គាល់ លើសមត្ថភាពរបស់និស្សិតកម្ពុជា ពីតំបន់អាស៊ាន ដ៏ទូលំទូលាយផងដែរ ។
នៅក្នុងឱកាសនោះដែរ លោក ហុង សុខហួរ អគ្គនាយកក្រុមហ៊ុនផ្សារមូលបត្រកម្ពុជា បានមានប្រសាសន៍ផងដែរថា កន្លងមក ដើម្បីគាំទ្រកម្មវិធីប្រកួតប្រជែងនេះ ឲ្យទទួលបានជោគជ័យ ក្រុមហ៊ុនផ្សារមូលបត្រកម្ពុជា បានរៀបចំវគ្គបណ្ដុះបណ្ដាល ក៏ដូចជាសិក្ខាសាលាមួយចំនួន ដោយសហការជាមួយ ធនាគារស៊ីអាចអិមប៊ី ដើម្បីពន្យល់ពីរបៀបបញ្ជាជួញដូរ និងការវិភាគផ្សេងៗ ដែលជាទុនសម្រាប់ប្អូនៗនិស្សិត ក្នុងការប្រកួត ។
លោកបន្ថែមថា “ជាការពិត ការចូលរួមក្នុងកម្មវិធី ប្រកួតប្រជែងបែបនេះ នឹងញ៉ាំងឲ្យប្អូនៗនិស្សិត មានទំនុកចិត្តមួយកម្រិតបន្ថែមទៀត ក្នុងការចូលរួម នៅក្នុងវិស័យមូលបត្រនាពេល អនាគតក្នុងនាមជាអ្នកវិនិយោគិន ឬជាមន្ត្រីបុគ្គលិក ដែលទទួលបន្ទុកការងារ ពាក់ព័ន្ធនឹងដំណើរការ ទីផ្សារមូលបត្រផ្ទាល់តែម្ដង” ។
ក្រុមជ័យលាភីជើងឯកថ្នាក់ជាតិ ដែលតំណាងឲ្យប្រទេសកម្ពុជា សម្រាប់ទៅចូលរួមការប្រកួត ថ្នាក់តំបន់ នៅក្នុងខែមករា ឆ្នាំ២០១៨ ខាងមុខនោះ គឺក្រុម The Brilliant មកពីសាកលវិទ្យាល័យកម្ពុជា ។ ជាមួយគ្នានោះដែរ ជ័យលាភីលេខ១ គឺក្រុម Team Potatoes មកពីសាកលវិទ្យាល័យហ្សាម៉ាន់ ទទួលបាន ៨០០ដុល្លារ ពី CIMB និង៥០០ដុល្លារ ពីCSX, ក្រុមជ័យលាភីលេខ២ គឺក្រុម The Brilliant មកពីសាកលវិទ្យាល័យកម្ពុជា ទទួលបាន ៥០០ដុល្លារ ពី CIMB និង ៣៥០ដុល្លារ ពីCSX, និងជ័យលាភីលេខ៣ គឺក្រុម The Gravity មកពីសាកលវិទ្យាល័យហ្សាម៉ាន់ ទទួលបាន ៤០០ដុល្លារ ពី CIMB និង ២៥០ដុល្លារ ពីCSX ។
សូមបញ្ជាក់ថា ប្រទេសកម្ពុជា ទើបតែបានចូលរួមកម្មវិធី ប្រកួតថ្នាក់តំបន់នេះ ចំនួន ៣ឆ្នាំប៉ុណ្ណោះ ។ អ្វីដែលគួរឲ្យគត់សម្គាល់នោះគឺ ក្រុមជើងឯកតំណាងកម្ពុជា បានដណ្ដើមតំណែងជើងឯករង (លេខ២) ថ្នាក់តំបន់ ២ឆ្នាំជាប់គ្នា និងទទួលបានជ័យលាភីលេខ៤ កាលពីឆ្នាំ២០១៦ ៕ ដោយ៖កូឡាប
