ខេត្តព្រះសីហនុ៖ អភិបាលខេត្តព្រះសីហនុ ឯកឧត្តម យន្ត មីន បានណែនាំដល់រដ្ឋបាលសង្កាត់ទាំងអស់ ក្នុងក្រុងព្រះសីហនុ ជាពិសេសចៅសង្កាត់ផ្ទាល់ឲ្យចាត់ចែងទម្រង់ការងារជាកញ្ចប់ ជៀសវាងក្តោបការងារតែម្នាក់ឯង នាំឲ្យរាំងស្ទះដល់ការងារជួយប្រជាពលរដ្ឋ។
ឯកឧត្តមអភិបាលខេត្ត បានពន្យល់ថា ចៅសង្កាត់នីមួយៗ ត្រូវបែងចែកការងារទទួលខុសត្រូវ ទៅដល់ចៅសង្កាត់រង ឬក្រុមប្រឹក្សាសង្កាត់ ដោយឲ្យក្រុមប្រឹក្សាសង្កាត់មួយរូបៗមានការទទួលខុសត្រូវ ចុះជួយតាមភូមិ ដោយទទួលជាផ្នែកៗដូចជា៖ មន្ត្រីខ្លះឲ្យទទួលមើលការខុសត្រូវខាងសំរាម មន្ត្រីខ្លះឲ្យទទួលមើលការខុសត្រូវខាងផ្លូវ ឬខាងសន្តិសុខជាដើម ដើម្បីរដ្ឋបាលសង្កាត់ឆាប់ទទួលបានព័ត៌មានសម្រាប់រាយការណ៍ជាបន្ទាន់ ទៅអភិបាលក្រុង ឬថ្នាក់ដឹកនាំបន្ទាប់ ដើម្បីឈានទៅមានវិធានការចុះ ជួយដោះស្រាយអ្វី ដែលចាំបាច់ចំពោះមុខ អ្វីដែលត្រូវដោះស្រាយបន្ទាប់។ ផ្តើមពីបញ្ហានេះ ឯកឧត្តម យន្ត មីន រំពឹងថា នៅពេលដែលរដ្ឋបាលសង្កាត់នីមួយៗ អនុវត្តន៍យន្តការនេះ ហើយមន្ត្រីត្រូវចុះប្រចាំតាមភូមិ ដោយមិនប្រមូលផ្តុំគ្នាតែនៅក្នុងសាលាសង្កាត់ គឺបញ្ហា ឬកង្វល់ខ្លះ អាចនឹងធ្វើការដោះស្រាយបានលឿន។
ឯកឧត្តមអភិបាលខេត្តព្រះសីហនុ ឲ្យដឹងដូច្នេះ ធ្វើឡើងកាលពី រសៀលថ្ងៃ២៦ ខែសីហា ឆ្នាំ២០១៨ នាឱកាសដឹកនាំមន្ត្រីចុះតាមមូលដ្ឋានសង្កាត់លេខ៤ ក្រុងព្រះសីហនុ។
សកម្មភាព របស់ឯកឧត្តម យន្ត មីន ចុះមូលដ្ឋានពេលនេះ ស្របពេលមានសេចក្តីរាយការណ៍ពីពលរដ្ឋមកថា មានមន្ត្រីភូមិ និងសង្កាត់ខ្លះមិនទាន់ស្គាល់អស់ពីភូមិសាស្ត្រនៅក្នុងមូលដ្ឋាន របស់ខ្លួន ដែលទទួលខុសត្រូវនៅឡើយទេ…៕ ដោយ៖ ដែន សីមា
