លោក អ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ និងលោក CHIBA Chinya ប្រធានសហជីពធនធានមនុស្សអន្តរជាតិ នាទីស្តីការក្រសួង ថ្ងៃទី២៣ ខែ វិច្ឆិកា ឆ្នាំ២០១៧ បានជួប ពិភាក្សាការងារពាក់ព័ន្ធនឹងការបញ្ជូនកម្មសិក្សាការីទៅបម្រើការងារ លើវិស័យសេវាកម្មថែទាំមនុស្សចាស់នៅប្រទេសជប៉ុន ។
ក្នុងជំនួបនោះលោករដ្ឋមន្ត្រីបានមានប្រសាសន៍ថា បច្ចុប្បន្នកម្ពុជា-ជប៉ុន កំពុងតែស្ថិតនៅក្នុងដំណាក់កាលទំនាក់ទំនងយ៉ាងជិតស្និទ្ធ។ ថ្នាក់ដឹកនាំប្រទេសទាំងពីរ បានផ្លាស់ប្តូរដំណើរទស្សនៈកិច្ចទៅវិញទៅមក ដែលនេះជាការរិតចំណងមិត្តភាពរបស់ប្រទេសទាំងពីរឲ្យកាន់តែរឹងមាំ លើសពីនេះទៀតមានអ្នកវិនិយោគជប៉ុនបានចូលមកវិនិយោគនៅកម្ពុជាជាបន្តបន្ទាប់ ហើយក្នុងនោះកំណើនទេសចរណ៍ជប៉ុនមកកម្ពុជាក៏កាន់តែមានការកើនឡើងពីមួយឆ្នាំទៅមួយឆ្នាំ។ ហើយជាមួយគ្នានោះដែរ ជប៉ុនក៏បានទទួលកម្មសិក្សាការីកម្ពុជាទៅបម្រើការងារនៅប្រទេសជប៉ុនជាង៥ពាន់នាក់លើវិស័យកសិកម្ម ឧស្សាហ៍កម្ម និងសំណង់។
លោក CHIBA Chinya ប្រធានសហជីពធនធានមនុស្សអន្តរជាតិលើកឡើងថា គោលបំណងរបស់គណៈប្រតិភូរបស់លោកមកកម្ពុជាក្នុងពេលនេះ គឺដើម្បីពិភាក្សាពីការបញ្ជូនកម្មសិក្សាការីកម្ពុជាទៅធ្វើការនៅប្រទេសជប៉ុនលើវិស័យសេវាកម្មថែទាំមនុស្សចាស់ ដោយកន្លងកម្ពុជា បញ្ជូនតែកម្មសិក្សាការី ដែលបម្រើការងារក្នុងវិស័យកសិកម្ម ឧស្សាហ៍កម្ម និងវិស័យសំណង់ប៉ុណ្ណោះ។ដូច្នេះលោកសូមឲ្យមានការគាំទ្រពីឯកឧត្តមរដ្ឋមន្ត្រីដើម្បីជំរុញការងារនេះឲ្យទទួលបានជោគជ័យ។
លោកបន្ថែមថា បច្ចុប្បន្នប្រទេសជប៉ុនមានប្រជាជនវ័យចំណាស់ច្រើន ដូច្នេះកម្លាំងពលកម្មក៏មានការថយចុះ ទើបរដ្ឋាភិបាលជប៉ុនរៀបចំបង្កើតច្បាប់ថ្មីដើម្បីទទួលកម្មសិក្សាការីផ្នែកថែទាំមនុស្សចាស់ទៅធ្វើការនៅប្រទេសជប៉ុន ហើយរាជរដ្ឋាភិបាលជប៉ុនបានយកចិត្តទុកដាក់ និងចាត់ទុកថាជារឿងសំខាន់ ចំពោះបញ្ហានេះ។ រាជរដ្ឋាភិបាលប្រទេសជប៉ុនត្រូវការកម្មសិក្សាការីពីបរទេសចំនួនពី ២០ទៅ៣០ម៉ឺននាក់ក្នុងមួយឆ្នាំដើម្បីបម្រើការងារលើវិស័យថែទាំមនុស្សចាស់នេះ។ លោកបន្ថែមទៀតថា ដោយឡែកសហជីពរបស់លោកមាន ក្រុមហ៊ុនជាដៃគូច្រើន ដូច្នេះសហជីពរបស់លោក ត្រូវការកម្មសិក្សាការីទៅបម្រើការងារនៅជប៉ុនចំនួនពី២ទៅ៣ម៉ឺននាក់។ ប្រការនេះហើយទើប លោកមកធ្វើការសិក្សានៅកម្ពុជា ដើម្បីស្វែងរកដៃគូសហការ និងសុំការគាំទ្រពីក្រសួងការងារ ដើម្បីជំរុញការងារនេះឲ្យបានជោគជ័យ។លោកបន្ថែមថា ជាមួយគ្នានោះលោកក៏និងមានគម្រោងសហការជាមួយមជ្ឈមណ្ឌលភាសាជប៉ុននៅកម្ពុជាផងដែរ។
បន្ទាប់ពីស្តាប់ការលើកឡើងរបស់ភាគីជប៉ុនឯកឧត្តម បណ្ឌិតរដ្ឋមន្ត្រី ពិតជាពេញចិត្ត និងគាំទ្រចំពោះភាគីជប៉ុនដែលមានបំណងចង់បញ្ជូនកម្មសិក្សាការីកម្ពុជាឲ្យទៅធ្វើការ លើសេវាកម្មថែទាំមនុស្សចាស់។ឯកឧត្តមបណ្ឌិតរដ្ឋមន្ត្រីបញ្ជាក់ថា ឯកឧត្តមផ្ទាល់ក៏ចង់ឃើញកំណើន ប្រជាពលរដ្ឋកម្ពុជាទៅធ្វើការងារនៅជប៉ុន ច្រើនជាងបច្ចុប្បន្នផងដែរ។ ក្នុងចំណោមប្រទេសដែលបានបញ្ជូនកម្មសិក្សាការីទៅបម្រើការងារនៅជប៉ុនទាំង១៧ កម្ពុជាឈលេខរៀងទី៦ ហើយឯកឧត្តមចង់ឃើញលេខរៀងតិចជាងនេះ។
ឯកឧត្តម សង្កត់ធ្ងន់ថា កន្លងមកកម្ពុជា ជប៉ុនមានតែកិច្ចព្រមព្រៀងតែលើវិស័យកសិកម្ម ឧស្សាហកម្ម និងសំណង់ប៉ុណ្ណោះ ហើយឯកឧត្តមក៏ចង់ឲ្យមានកិច្ចសហការលើវិស័យសេវាកម្មថែទាំមនុស្សចាស់ពីសំណាក់រាជរដ្ឋាភិបាលជប៉ុន ដើម្បីផ្តល់ភាពស្របច្បាប់ និងគិតគូពីសុខទុក្ខរបស់កម្មសិក្សាការីកម្ពុជា។ លើសពីនោះទៀត ខាងសហជីពធនធានមនុស្សអន្តរជាតិ ត្រូវមានការណែនាំ តម្រង់ទិស និងបណ្តុះបណ្តាលពីភាគីជប៉ុនមុននិងបញ្ជូនកម្មសិក្សាការីទៅបម្រើការងារ ហើយសហជីពត្រូវបង្កើតភ្នាក់ងារដើម្បីណែនាំ និងត្រូវចុះបញ្ជីនៅក្រសួងការងារជាមុនសិន៕ ដោយ៖បញ្ញាស័ក្តិ
