ភ្នំពេញ ៖ គ្រឹះស្ថានអង្គរ បានឲ្យដឹងថា រយៈពេលមួយឆ្នាំ២០២៤ ភ្ញៀវទេសចរបរទេស អញ្ជើញចូលទស្សនារមណីយដ្ឋានអង្គរ មានចំនួន ១ ០២៣ ៦៨៨ នាក់ ដោយរកចំណូលបានចំនួន ៤៧ ៨២៦ ៩៨១ ដុល្លារអាមេរិក។
របាយការណ៍ដែលទទួលបានពីគ្រឹះស្ថានអង្គរនៅព្រឹកថ្ងៃទី១ ខែមករា ឆ្នាំ២០២៥នេះ បានឱ្យដឹងថា នៅរយៈពេលពេញមួយឆ្នាំ២០២៤ មានភ្ញៀវទេសចរបរទេសចំនួន ១ ០២៣ ៦៨៨នាក់ បានទិញបណ្ណចូលទស្សនារមណីយដ្ឋានអង្គរ កើនឡើងជាង ២៨ភាគរយ បើធៀបនឹងឆ្នាំ២០២៣ មានតែ ៧៩៨ ០៦៩នាក់។
សម្រាប់ចំណូលពីការលក់បណ្ណវិញមានចំនួន ៤៧ ៨២៦ ៩៨១ ដុល្លារអាមេរិក កើនជាង ២៨ភាគរយ បើធៀបឆ្នាំ២០២៣ មានចំនួន៣៧ ១៩៨ ៩៨៨ដុល្លារអាមេរិក។
បើតាមតួលេខ ភ្ញៀវដែលទិញសំបុត្រទស្សនារយៈពេល១ថ្ងៃ តម្លៃ៣៧ដុល្លារមានចំនួនជាង ៦៣ម៉ឺននាក់ ស្មើនឹងជាង៦១ភាគរយ, ទស្សនា៣ថ្ងៃ តម្លៃ៦២ដុល្លារ មានជាង៣៧ម៉ឺននាក់ ស្មើនឹងជាង៣៦ភាគរយ និងទស្សនា ១សប្តាហ៍តម្លៃ ៧២ដុល្លារ មានជាង១.៦ម៉ឺននាក់ ស្មើនឹង ១.៦១ភាគរយ។
សរុបចំណូលឧបត្ថម្ភមូលនិធិគន្ធបុប្ផាកម្ពុជា រយៈពេល ១២ខែ ក្នុងឆ្នាំ២០២៤ មានចំនួនសរុប ២ ០៤៧ ៣៧៦ដុល្លារ ៕ រក្សាសិទ្ធដោយ៖សុទ្ធលី
