ភ្នំពេញ ៖ ក្រសួងអប់រំ យុវជន និងកីឡា បានចេញសេចក្ដីប្រកាសព័ត៌មានស្ដីពីការបង្ហោះវិញ្ញាសា និងអត្រាកំណែ នៃការប្រឡងសញ្ញាបត្រមធ្យមសិក្សាទុតិយភូមិចំណេះទូទៅ និងបំពេញវិជ្ជា សម័យប្រឡង ថ្ងៃទី ២០ សីហា ២០១៨។ ក្រសួងអប់រំ បានព្រមានចាត់វិធានការច្បាប់ ចំពោះម្ចាស់ទំព័រ Facebook ទាំងឡាយណា ដែលបន្តបង្ហោះវិញ្ញាសា និងអត្រាកំណែនៃការប្រឡងមធ្យមសិក្សាទុតិយភូមិ ឆ្នាំ២០១៨នេះ។ ជាមួយគ្នានោះដែរ ដំណើរការកំណែលើសន្លឹកកិច្ចការបេក្ខជន នៅតែបន្តនៅតាមមណ្ឌលកំណែទាំង១០ ។
យោងតាមសេចក្តីប្រកាសព័ត៌មានរបស់ក្រសួងអប់រំ យុវជន និងកីឡា នៅថ្ងៃទី២៧ ខែសីហា ឆ្នាំ២០១៨នេះ បានបញ្ជាក់ថា នាពេលថ្មីៗនេះ មានទំព័របណ្ដាញសង្គម Facebook និងអ្នកប្រើប្រាស់គណនីឯកជនមួយចំនួន បានបង្ហោះ ចែករំលែកវិញ្ញាសា និងអត្រាកំណែមុខវិជ្ជានៃការប្រឡងសញ្ញាបត្រមធ្យមសិក្សាចំណេះទូទៅ និងបំពេញវិជ្ជា នៃសម័យប្រឡងកាលពីថ្ងៃទី២០ ខែសីហា ២០១៨។
តាមរយៈសេចក្តីប្រកាសព័ត៌មាននេះ ក្រសួងអប់រំ បានលើកឡើងថា ការបង្ហោះ និងចែករំលែកវិញ្ញា និងអត្រាកំណែនេះ បានជះឥទ្ធិពលយ៉ាងធ្ងន់ធ្ងរដល់ដំណើរប្រព្រឹត្ដទៅ នៃការប្រឡង ដែលកំពុងប្រព្រឹត្ដទៅយ៉ាងរលូន ដោយគោរពតាមគោលការណ៍ច្បាប់ យុត្ដិធម៌ តម្លាភាព និងលទ្ធផលទទួលយកបាន។
ក្រសួងអប់រំ បានអំពាវនាវដល់ម្ចាស់ទំព័រ Facebook ដែលកំពុងធ្វើសកម្មភាពនេះ ត្រូវបញ្ឈប់ជាបន្ទាន់នូវទង្វើរបស់ខ្លួន។ ក្រសួងអប់រំ បានព្រមានថា ប្រសិនបើសកម្មភាពចែករំលែករាល់វិញ្ញាសា និងអត្រាកំណែនៅតែបន្ដក្នុងរយៈពេលដំណើរកំណែ ការស្រង់ បូកពិន្ទដោយកុំព្យូទ័រ ផ្ទៀងផ្ទាត់ពិន្ទុ មុនការប្រកាសលទ្ធផលផ្លូវការ មិនទាន់ត្រូវបានបញ្ចប់ ក្រសួង នឹងសហការជាមួយស្ថាប័នមានសមត្ថកិច្ចពាក់ព័ន្ធ ក្នុងការស្វែងរកម្ចាស់ទំព័រ ឬគណនីហ្វេសប៊ុកទាំងនេះ មកទទួលខុសត្រូវនូវទង្វើរបស់ខ្លួនតាមផ្លូវច្បាប់យ៉ាងតឹងរ៉ឹងបំផុត។
សូមបញ្ជាក់ថា ការប្រលងមធ្យមសិក្សាទុតិយភូមិបានធ្វើឡើងកាលពីថ្ងៃទី២០-២១ ខែសីហា ឆ្នាំ២០១៨កន្លងទៅនេះ។ បច្ចុប្បន្នក្រសួងកំពុងតែដំណើរការកំណែលើវិញ្ញាសានៃការប្រលងនេះ ហើយលទ្ធផលគ្រោងនឹងប្រកាសនៅថ្ងៃទី១១ ខែកញ្ញា ឆ្នាំ២០១៨ខាងមុខនេះ។
សមាជិកកំណែនៅតាមមណ្ឌលកំណែទាំង១០ នៅតែបន្តធ្វើកំណែលើសន្លឹកកិច្ចការ បេក្ខជនប្រឡងសញ្ញាបត្រមធ្យមសិក្សាទុតិយភូមិចំណេះទូទៅ និងបំពេញវិជ្ជា សម័យប្រឡង៖ ២០ សីហា ២០១៨ ដោយការយកចិត្តទុកដាក់ក្រោមស្មារតីទទួលខុសត្រូវខ្ពស់ ដោយមិនបានភ្ជាប់មកជាមួយនូវទូរសព្ទដៃ និងឧបករណ៍អេឡិចត្រូនិកផ្សេងៗចូលបន្ទប់កំណែឡើយ ដើម្បីចៀសវាងបង្ហោះរាល់សំណៅកិច្ចការបេក្ខជន ឬអត្រាកំណែតាមបណ្ដាញសង្គម៕ ដោយ ៖ កូឡាប
