គម្រោងវិនិយោគខ្នាតយក្ស បោះទុនជិត១ពាន់លានដុល្លារ ដែលនឹងត្រូវបញ្ចប់ការសាងសង់នាពេលខាងមុខ បាន​ឱកាសការងារប្រមាណ ៥០០០ កន្លែងជូនប្រជាពលរដ្ឋ

ខេត្តព្រះសីហនុ៖ ឯកឧត្តម ម៉ាង ស៊ីណេត អភិបាលខេត្តព្រះសីហនុ បានពិនិត្យវឌ្ឍន៍ភាពគម្រោងសាងសង់របស់ក្រុមហ៊ុន និងជំរុញឲ្យក្រុមហ៊ុនពន្លឿនដំណើរការសាងសង់ ក្នុងនោះ ក៏បានពិនិត្យការងារបច្ចេកទេសផ្សែងទៀតពាក់ព័ន្ធនឹងអាងប្រព្រឹត្តកម្ម បរិស្ថាន អនាម័យជាដើម ព្រមទាំងចូលរួមដោះ ស្រាយចំណុចពាក់ព័ន្ធមួយចំនួនក្នុងការដ្ឋាន ហើយចំពោះការងារសាង់សង់នាពេលនេះ ក្រុម ហ៊ុនផ្តោតសំខាន់ទៅលើបរិស្ថានជាចំបង។

ឯកឧត្តម អភិបាលខេត្តព្រះសីហនុ បានបន្តថា ការបោះទុនវិនិយោគនៅខេត្តតំបន់ឆ្នេរ នៃព្រះរាជានាចក្រកម្ពុជា ដើម្បីជួយបង្កើនការងារ ក៏ដូចជាបង្កើនសេដ្ឋកិច្ចរបស់ខេត្តព្រះសីហនុ ចូលរួមកាត់បន្ថយភាពក្រីក្រ ព្រមទាំងបានជំរុញឲ្យក្រុមហ៊ុនពន្លឿនការងារសាងសង់ ទន្ទឹមនឹងការសាងសង់ត្រូវរៀបចំអាងប្រព្រឹត្តកម្មទឹកកខ្វក់ឲ្យបានត្រឹមត្រូវ ដើម្បីធានាថា គម្រោងសាងសង់របស់ក្រុមហ៊ុនអនុត្តតាមលក្ខណស្តង់ដារត្រឹមត្រូវ មិនមានការបំពុលបរិស្ថាននៅជុំវិញ ហើយរដ្ឋបាលខេត្តគាំទ្រនូវគម្រោងសាងសង់របស់ក្រុមហ៊ុន និងរង់ចាំជួយសម្របសម្រួលដោះស្រាយបញ្ហាប្រឈមឪ្យបានទាន់ពេលវេលា ដើម្បីធ្វើយ៉ាងណាការងារសាងសង់របស់ក្រុមហ៊ុនមានភាពរលូនតាមការគ្រោងទុក។

លោក LAI XIAO BO Project Manager ក្រុមហ៊ុន ផឹនីនស៊្យូឡឺ បេ (Peninsula Bay Investment CO.,LTD.) បានឲ្យដឹងថា គម្រោងនេះ ចំណាយថវិកា ៥៧៤លានដុល្អាអាមេរិក ស្ថិតនៅទីលានតេជោ ស្ថិតនៅសង្កាត់លេខ៤ ក្រុង ខេត្តព្រះសីហនុ និងតាមការវាយតម្លៃចុងក្រោយត្រូវចំណាយអស់ថវិកា ១ពាន់លានដុល្លាអាមេរិក ហើយនៅក្នុងគម្រោងសាងសង់យើងបានធ្វើការបែងចែកជា២តំបន់ គឺតំបន់ Aនិងតំបន់ B តំបន់Bមានដូចជាអគារខុនដូរ អគារពាណិជ្ជកម្ម អាចសាងសង់ហើយរួចរាល់នៅចុងឆ្នាំ២០២៥ តំបន់ A មានដូចជា សណ្ឋាគារលំដាប់ផ្កាយ៥ ផ្សារទំនើប និងសួនកម្សាន្តផ្សេងៗទៀត គ្រោងនឹងបញ្ចប់ការងារនៅឆ្នាំ២០២៨។

ដោយឡែកចំពោះហាងលក់ដូរតាមបណ្តោយឆ្នេរខាងក្រោម មានលក់ទំនិញជាច្រើន ហើយក្រុមហ៊ុន បានធ្វើការទំនាក់ទំនងជាមួយក្រុមហ៊ុនបរទេស ដើម្បីនាំយកនូវផលិតផលប្រេនៗពីប្រទេសបារាំងយកដាក់លក់ ក្នុងនោះក៏មានសួនកម្សាន្តលំដាប់ដែលអាចទាក់ទាញភ្ញៀវទេសចរណ៍ផងដែរ ដោយឡែកហាងនៅមាត់សមុទ្រគ្រោងនឹងបើកនៅខែកុម្ភះខាងមុខ ក្រុមហ៊ុនបានធ្វើការវិនិយោគនៅលើផ្ទៃដី ១៥.៨ហិកតា ដែលមានអគាររហូតដល់ ៩០ម៉ឺនការ៉េ ផ្តល់ការងារជូនប្រជាពលរដ្ឋកម្ពុជា ប្រមាណជា ៥ ០០០នាក់៕