សត្វឆ្កែញី១ក្បាល ដែលបាត់ម្ចាស់នៅក្នុងសោកនាដកម្មយន្តហោះកូរ៉េខាងត្បុង ត្រូវបានគេយកមកចិញ្ចឹមហើយ ខណៈ
ក្រុមសិទ្ធិសត្វរបស់កូរ៉េខាងត្បូង បានប្រកាសថា ខ្លួនបានយក Pudding ជាឆ្កែអនាថាដែលគ្រួសារម្ចាស់របស់វាបានស្លាប់អស់ទាំង៩នាក់ នៅក្នុងសោកនាដកម្ម Jeju Air នៅក្នុងហេតុការណ៍សោកនាដកម្មយន្តហោះ Jeju Air ដែលបានកើតឡើងកាលពីថ្ងៃទី ២៩ ខែធ្នូ ឆ្នាំ ២០២៤។
អង្គការសិទ្ធិសត្វ Care ក្នុងប្រទេសកូរ៉េខាងត្បូង បានប្រកាសកាលពីថ្ងៃទី១ ខែមករា ថា ខ្លួនបានចិញ្ចឹមឆ្កែមួយក្បាលឈ្មោះ Pudding ខណៈវាកំពុងវង្វេងជុំវិញភូមិមួយក្នុងស្រុក Yeonggwang ខេត្ត Jeolla ភាគខាងត្បូង។
ក្រុមថែទាំបាននិយាយថា «យើងបានកំណត់ថា Pudding មិនមានសុវត្ថិភាពដោយគ្មានអ្នកមើលថែទេ។ បន្ទាប់ពីទាក់ទងសាច់ញាតិរបស់ជនរងគ្រោះ យើងបានសម្រេចចិត្តចិញ្ចឹម Pudding រហូតដល់យើងអាចរកឃើញម្ចាស់ថ្មីសមរម្យ»។
គួរបញ្ជាក់ថា សមាជិក ៩ នាក់ នៃគ្រួសាររបស់លោក Bae ដែលជាម្ចាស់ Pudding បាននៅលើជើងហោះហើរ Jeju Air ដែលបានធ្លាក់នៅព្រលានយន្តហោះ Muan កាលពីថ្ងៃទី២៩ ខែធ្នូ ឆ្នាំ ២០២៤ ក្នុងចំណោមមនុស្ស ១៧៩ នាក់ ដែលបានស្លាប់។
ក្រុមថែទាំបាននិយាយថា មុនហេតុការណ៍កើតឡើង ក្រុមគ្រួសារបានទៅប្រទេសថៃ ដើម្បីប្រារព្ធខួបកំណើតរបស់លោក Bae ដែលនេះក៏ជាលើកទីមួយដែរ ដែលក្រុមគ្រួសារបានធ្វើដំណើរទៅក្រៅប្រទេសជាមួយគ្នា។ ក្រោយពេលកើតហេតុ ផ្ទះជនបទរបស់លោក Bae គឺត្រូវស្ងាត់ជ្រងំ ដោយមានតែ Pudding នៅយាមផ្ទះ។
ឆ្កែញីមួយក្បាលនេះមិនបាននៅក្នុងផ្ទះម្ចាស់ទៀតទេ ដោយវាបានដើរជុំវិញភូមិ មើលរថយន្ត និងឡានក្រុង ហាក់ដូចជាកំពុងរង់ចាំក្រុមគ្រួសាររបស់ម្ចាស់វាត្រឡប់មកវិញ។ ហើយអ្នកភូមិ ក៏បានសហការប្ដូរវេនគ្នាឲ្យចំណីដល់វាផងដែរ។
Care បានរៀបរាប់ពីពេលដែលពួកគេបានទៅដល់ដើម្បីទទួលយកសត្វឆ្កែនេះថា «យើងបានរកឃើញ Pudding អង្គុយស្រងោតស្រង៉ាត់នៅខាងក្រៅសាលាភូមិ។ ពេលយើងទៅជិត វាបានរត់សំដៅរកពួកយើងដោយរំភើប ហាក់ដូចជាកំពុងរង់ចាំម្ចាស់របស់វា»។
Care បាននិយាយថា «ឆ្កែនេះហាក់ដូចជាមិនស្រួលបន្តិច ក្នុងអំឡុងពេលធ្វើដំណើរយកទៅឲ្យពេទ្យសត្វពិនិត្យ នៅទីក្រុងសេអ៊ូល។ យើងបានពិនិត្យសុខភាពរបស់ Pudding ដោយសារតែពោះវៀនរបស់វាមានអាហារបង្កគ្រោះថ្នាក់ដូចជាខ្ទឹមបារាំង និងឆ្អឹងមាន់»។
គួររម្លឹកថា យន្តហោះ Boeing 737-800 របស់ក្រុមហ៊ុនអាកាសចរណ៍ Jeju Air បានជួបឧបទ្ទវហេតុកាលពីថ្ងៃទី២៩ ខែធ្នូ ខណៈពេលចុះចតនៅអាកាសយានដ្ឋាន Muan ភាគនិរតីនៃប្រទេសកូរ៉េខាងត្បូង ដែលបានក្លាយជាសោកនាដកម្មអាកាសចរណ៍ដ៏អាក្រក់បំផុត នៅលើទឹកដីកូរ៉េខាងត្បូង។
យន្តហោះនេះបានបុកសត្វស្លាប ហើយទំនងជាមានបញ្ហាជាមួយនឹងឧបករណ៍ចុះចតរបស់វា ដោយបង្ខំឱ្យអ្នកបើកយន្តហោះចុះចតដោយពោះទទេ។ តែទោះជាយ៉ាងណា យន្តហោះ Boeing 737-800 បានរអិលចេញពីផ្លូវរត់ ហាក់បីដូចជាមិនអាចបន្ថយល្បឿនបាន ហើយបានធ្លាក់ចូលទៅក្នុងជញ្ជាំងបេតុងនៅចុងផ្លូវរត់ បណ្តាលឲ្យឆាបឆេះយ៉ាងសន្ធោសន្ធៅតែម្តង។
មន្ត្រីកូរ៉េខាងត្បូងជឿថា ដំណើរការខុសប្រក្រតីនៅក្នុងឧបករណ៍ចុះចតនេះ គឺជាមូលហេតុចម្បងមួយ នៃសោកនាដកម្មនេះ។
ប៉ូលីសកូរ៉េខាងត្បូង បានឆែកឆេរអាកាសយានដ្ឋាន Muan និងការិយាល័យ Jeju Air នៅថ្ងៃនោះ ដែលជាផ្នែកមួយនៃការស៊ើបអង្កេតលើការធ្លាក់យន្តហោះនេះ។ យន្តហោះ Boeing 737-800 ទាំងអស់ដែលដំណើរការដោយក្រុមហ៊ុនអាកាសចរណ៍កូរ៉េខាងត្បូង កំពុងស្ថិតនៅក្រោមការត្រួតពិនិត្យយ៉ាងពិសេស ដោយផ្តោតលើឧបករណ៍ចុះចត៕
