បងធំ ជាមេ Team22 និងកូនចៅ២នាក់ទៀត ក្រោយពីសម្តែងឫទ្ធ អួតអាង ប្រកាសតាមបណ្តាញសង្គម បបួលស្វែងរកកាប់គ្នា នៅពេលនេះត្រូវបានកម្លាំងអាវុធហត្ថចាប់ឃាត់ខ្លួនហើយ កាលពីព្រឹកថ្ងៃទី៣០ ខែធ្នូ ឆ្នាំ២០២៤ នៅភូមិក្រាំងខ្វាវ ឃុំរការកោះ ស្រុកគងពីសី ខេត្តកំពង់ស្ពឺ ។
កាលពីពេលថ្មីៗនេះ បុរសជាបងធំម្នាក់ ដែលល្បីក្នុង TikTok មានរហ័សនាមថា មេ Team 22 ត្រូវបានកម្លាំងអាវុធហត្ថខេត្តកំពង់ស្ពឺ ចុះទៅចាប់ដល់ផ្ទះនៅភូមិក្រាំងខ្វាវ ឃុំរការកោះ ស្រុកគងពីសី រួមទាំងកូនចៅចំនួន២នាក់ កាលពីថ្ងៃទី៣០ ខែធ្នូ ឆ្នាំ២០២៤ បន្ទាប់ពីមេធីមទំនើងរូបនេះ និងសមាជិក Team បានចេញវីដេអូបញ្ចេញប្ញទ្ធអួតអាង ប្រកាសបណ្តាញសង្គម បបួលស្វែងរកកាប់គ្នាដ៏ហួសចិត្តបំផុត។
ទោះជាយ៉ាងណា សមត្ថកិច្ចពុំបានដាក់ទោសទណ្ឌធ្ងន់ធ្ងរ ទៅលើមេធីមរូបនេះ និងក្រុមបក្ខពួកនោះទេ ដោយគ្រាន់ត្រឹមធ្វើការអប់រំ និងធ្វើកិច្ចសន្យាបញ្ឈប់រាល់ទង្វើដ៏ទំនើង និងសកម្មភាពបងតូចបងធំ អួតអាងរឿងកាប់ចាក់បង្កអសន្តិសុខដល់សង្គមទៀត ហើយសមត្ថកិច្ចក៏បានអនុញ្ញាតឲ្យវិលត្រឡប់ទៅផ្ទះវិញផងដែរ។
ពិតណាស់ ដោយសារភាពល្បីល្បាញនៅក្នុង TikTok រហ័សនាមអ្នកមែន និងក្រោយចេញពីប៉ុស្តិ៍ប៉ូលីស បន្សល់ទុកសក់ក្បាលឡើងអស់ទាស់ និងសូម្បីស៊យម៉ូតូខូចតាមផ្លូវបណ្តើរផ្ទះទាំងយប់ បុរសជាមេ Team22 រូបនេះ បានធ្វើឲ្យមហាជនទប់សំណើចមិនជាប់នោះទេ ខណៈអ្នកលេងបណ្តាញសង្គមជាច្រើន បាននាំគ្នាចំអកឲ្យឡើងព្រោងព្រាតតែម្តង។
តែអ្វីដែលគួរឲ្យភ្ញាក់ផ្អើលខ្លាំងនោះ គឺបន្ទាប់ចេញពីប៉ុស្តិ៍ប៉ូលីសមិនបានប៉ុន្មានថ្ងៃ ស្រាប់តែមេ Team 22 មានវាសនាខ្ពស់ ត្រូវបានក្រុមហ៊ុនផលិតផលសម្រស់មួយ ហៅមកធ្វើជា BA ផលិតផលរបស់ខ្លួន ដោយមានទាំងការចុះកុងត្រាទៀតផង។
តែទន្ទឹមនឹងឃើញរូបភាពដ៏គួរឲ្យសរសើររំភើបត្រេកអរជំនួសនេះ បែរជាមហាជនជាច្រើន សម្តែងការហួសចិត្តខ្លាំងតែម្តង និងរិះគន់ទៅកាន់ម្ចាស់ក្រុមហ៊ុនផលិតសម្រស់នោះ ដោយបានដាក់ឲ្យឡើងកប់ៗបែបនេះថា
«អីចឹងទេតើ បានជាអាក្មេងៗទំនើង វាចូលចិត្តធ្វើអញ្ចឹង, អាមួយហ្នឹងយកតែមនុស្សឆ្កួតធ្វើ BA ទេ ព្រោះក្រុមហ៊ុនអន់ផលិតផលអន់ គ្មានលទ្ធភាពជួល BA ត្រឹមត្រូវទេ, ទង្វើបែបនេះ ហើយកុំឆ្ងល់ថា ហេតុអ្វីស្រុកយើងសំបូរពួកអញ្ចឹងម្ល៉េះ ថ្នាក់លើគេខំបំបាក់ វាលើកស្ទួយ.. ធ្វើឆ្កួតលេងៗបានធ្វើ BA,….»។
តែទន្ទឹមនឹងនេះ ក៏មានអ្នកលើកទឹកចិត្តថា «វាមិនទាស់ខុសអីទេ បើសិនជាមេធីម២២នោះចេះកែប្រែខ្លួនជាមនុស្សល្អ មកវិញហើយនោះ វាក៏ជាឱកាសមួយសំរាប់មនុស្សម្នាក់ ដើម្បីកសាងជីវិតថ្មីមួយដែរ»៕
