យុវជនម្នាក់ និងក្រុមគ្រួសារ បានមកលេងសួនសត្វ ហើយចតរថយន្តនៅក្រោមដើមឈើ ប៉ុន្តែ អ្វីដែលមិននឹកស្មានដល់នោះ គឺពេលត្រឡប់មកវិញ គាត់ស្ទើរតែដួល នៅពេលរកឃើញថា សត្វស្លាបមួយហ្វូងធំ បានជុះដាក់រពេញរថយន្តរបស់គាត់។ ហើយពេលនេះ ទើបគាត់ដឹងច្បាស់ថា ហេតុអ្វីកន្លែងទំនេរ២ហ្នឹង បានជាគ្មានអ្នកចត!។
ក្នុងឃ្លីបដែលកំពុងផ្ទុះការចាប់អារម្មណ៍ នៅលើបណ្តាញសង្គម TikTok យុវជននោះបានបង្ហាញថា បន្ទាប់ពីធ្វើដំណើរទៅក្នុងសួនសត្វ Safari World ពួកគាត់បានចតឡាននៅកន្លែងទំនេរពីរ។ ប៉ុន្តែ អ្វីដែលមិននឹកស្មានដល់នោះ គឺនៅពេលគាត់ត្រឡប់មកវិញ គាត់មានអារម្មណ៍ទន់ខ្លួនតែម្តង នៅពេលរកឃើញសត្វស្លាប បានជុះមកលើរថយន្តទាំងពីរគ្រឿង បំផ្លាញទាំងស្រុងតែម្តង។
ជាមួយគ្នានោះ យុវជននោះបាននិយាយទាំងហួសចិត្តបែបនេះថា «ចតរថយន្តខាងក្រៅផ្ទះម្តង។ ខ្ញុំមិននឹកស្មានជួបរឿងបែបនេះសោះ។ ហើយពេលនេះ ខ្ញុំបានដឹងថា ហេតុអ្វីបានជាកន្លែងទំនេរនេះគ្មានអ្នកមកចតឡាន!»។
នៅក្នុងឃ្លីបនោះ រថយន្តទាំងពីរត្រូវបានចតនៅកន្លែងទំនេរមួយ បន្ទាប់ពីគិតថាគ្មានអ្នកណាចតនៅទីនោះ។ ប៉ុន្តែពួកគេបានដឹងតិចតួចថា សត្វស្លាបតែងតែមកម្តុំគ្នានៅទីនោះ ហើយជាលទ្ធផល ធ្វើឱ្យរថយន្តទាំងពីរត្រូវបានគ្របដណ្ដប់ដោយដំណក់ទឹកលាមកសត្វបក្សី ស្ទើរតែគ្មានសល់កន្លែង។
ជាមួយការបង្ហោះនេះ មហាជនជាច្រើនបានបញ្ចេញមតិ និងសំណូមពរថា គួរតែប្រញាប់លាងរថយន្តចេញ ព្រោះថាបើទុកចោលយូរពេក វានឹងធ្វើឱ្យខូចថ្នាំរថយន្តពុំខាន ហើយមិនអាចលាងចេញបានទេ។ ជាងនេះទៅទៀត ក៏មានអ្នកខ្លះថា ម្ចាស់កន្លែងត្រូវដាក់ស្លាកសញ្ញា ដើម្បីកុំឲ្យអ្នកផ្សេងដែលចតនៅទីនោះ រងគ្រោះបែបនេះ៕
