បើទោះជារដ្ឋបាលរាជធានីខេត្ត ចេញសារាចរហាមមិនឱ្យដុតផាវ កាំជ្រួច ឬការបង្កសំឡេងផ្ទុះគ្រប់ប្រភេទ នៅក្នុងពិធីបុណ្យចូលឆ្នាំថ្មីប្រពៃណីចិន និងវៀតណាម យ៉ាងណាក៏ដោយ ក៏គេឃើញនៅមានការដុតផាវរប៉េះរប៉ោះ ក្នុងវេលាសែនមកដល់ ដោយខ្លាចបង្កបញ្ហាកើតឡើងនោះទេ។
តែអ្វីដែលមិននឹកស្មានដល់នោះ គឺខណៈវេលាស្បៃរាត្រីចូលមកដល់ ស្រាប់តែជនជាតិចិនមួយក្រុម នៅក្នុងក្រុងព្រះសីហនុ បានយកកាំជ្រួច មកដាក់តាំងលើដងផ្លូវ រួចដុតបង្កការភ្ញាក់ផ្អើល និងភ័យខ្លាចយ៉ាងខ្លាំង ទាំងប្រជាពលរដ្ឋអ្នកធ្វើដំណើរ និងក៏ដូចអ្នករស់នៅផ្ទះជិតខាង ព្រោះតែម្នាក់ៗបារម្ភខ្លាចឆេះផ្ទះ ឬ ម៉ូតូ ឡាន និងត្រូវមនុស្ស។
យ៉ាងណាមិញ វីដេអូហេតុការណ៍ដុតកាំជ្រួច ផ្អើលកក្រើកក្រុងព្រះសីហនុ ពីសំណាក់ក្រុមជនជនជាតិចិន ត្រូវបានគេបង្ហោះ និងបញ្ជាក់ថា ធ្វើឡើងនៅចំណុចភ្លើងស្តុបមួយកន្លែង នាវេលាយប់ថ្ងៃទី២៨ ខែមករា ឆ្នាំ២០២៥ ហើយសកម្មភាពដ៏មិនធម្មតានេះ ក៏ត្រូវបានប្រជាពលរដ្ឋរស់នៅជិតខាង ថតបង្ហោះនៅលើបណ្តាញសង្គមព្រោងព្រាតផងដែរ។
ទោះជាយ៉ាងណា គេក៏មិនដឹងថា អាជ្ញាធរខេត្តព្រះសីហនុ មានចំណាត់ការ ទៅលើទង្វើដ៏បង្កគ្រោះថ្នាក់របស់ពួកក្រុមជនជាតិចិនទាំងនោះដែរ ឬយ៉ាងណានោះទេ៕
