សួនសត្វមួយកន្លែងក្នុងប្រទេសចិន បានធ្វើអោយការភ្ញាក់ផ្អើលយ៉ាងខ្លាំង បន្ទាប់ពីបានលក់ «ឱសថទឹកនោមខ្លា» ពីសត្វខ្លាស៊ីបេរី ក្នុងតម្លៃ ៥០ យន់ (ស្មើ 6.95$) ក្នុងមួយដប ដោយក្នុងមួយដបមានប្រហែល ២៥០ ក្រាម។
ភ្ញៀវម្នាក់ដែលបានទៅសួនសត្វបានថតរូបផលិតផលនោះ ហើយចែករំលែកនៅលើបណ្តាញសង្គម ដោយបង្ហាញថាសួនសត្វកំពុងលក់ទឹកនោមខ្លា ខណៈអះអាងថា វាអាចជួយព្យាបាលជំងឺឈឺសន្លាក់ឆ្អឹង និងរលាករ៉ាំរ៉ៃ។
តាមរយៈរូបភាពជាក់ស្តែង បានបង្ហាញស្លាកយីហោនៅលើដប បានសរសេរអះអាងថា ទឹកនោមខ្លាមានលក្ខណៈសម្បត្តិព្យាបាល និងអាចជួយដល់ការឈឺសន្លាក់ឆ្អឹង រមួលក្រពើ និងឈឺសាច់ដុំ។ ស្លាកយីហោនោះ ក៏ថែមទាំងណែនាំឱ្យផឹក ប៉ុន្តែព្រមានមនុស្សឱ្យឈប់បន្ទាន់ ប្រសិនបើពួកគេមានប្រតិកម្មអាលែហ្សី។
បុគ្គលិកសួនសត្វម្នាក់បានប្រាប់កាសែត The Paper ថា “ឱសថទឹកនោមខ្លា” នោះត្រូវបានប្រមូលដោយផ្ទាល់ពីធុងសម្រាប់ដាក់ទឹកនោមរបស់សត្វខ្លា។ ប៉ុន្តែ មិនច្បាស់ទេថាតើពួកគេធ្វើបែបណា ដើម្បីធ្វើការសំលាប់មេរោគ មុននឹងដាក់លក់នោះវា។
បុគ្គលិកក៏បានចែករំលែកថា ផលិតផលកំពុងតែមានតម្រូវការ ដោយក្នុងមួយថ្ងៃលក់រហូតដល់ទៅ ២ ដប។
តែទោះជាយ៉ាងណា ឱសថការីម្នាក់មកពីមន្ទីរពេទ្យឱសថបុរាណចិន ក្នុងខេត្តហ៊ូប៉ី ប្រទេសចិន បាននិយាយថា ទឹកនោមខ្លាពិតជាមិនត្រូវបានទទួលស្គាល់ថាជាឱសថបុរាណ និងមិនមានអត្ថប្រយោជន៍សុខភាព ដូចដែលគេបានអះអាងនោះទេ។
ឱសថការីនោះក៏បានណែនាំប្រជាជនឱ្យប្រកាន់ខ្ជាប់នូវការព្យាបាលវេជ្ជសាស្ត្រត្រឹមត្រូវ ដោយព្រមានថា ការប្រើប្រាស់ថ្នាំដែលមិនបានផ្ទៀងផ្ទាត់ អាចធ្វើឱ្យអ្វីៗកាន់តែធ្ងន់ធ្ងរ ជំនួសឱ្យការប្រសើរជាងមុន ។
ចំណែកអ្នកអនុវត្តឱសថបុរាណចិនម្នាក់ទៀត ក៏បានសម្តែងការហួសចិត្តចំពោះចោទសួនសត្វនោះ ដោយចោទសួរថា ហេតុតើពួកគេថែមទាំងមានសិទ្ធិលក់ «ផលិតផលឱសថ» នេះ? ព្រោះថាថ្នាំទាំងអស់ត្រូវការការយល់ព្រម ពីនិយតកររដ្ឋាភិបាល។
ទោះជាយ៉ាងនេះក្តី បុគ្គលិកសួនសត្វបានទទូចថា ពួកគេមានអាជ្ញាប័ណ្ណអាជីវកម្មលក់ទឹកនោមខ្លា៕
