ខេត្តព្រះសីហនុ ៖ នៅល្ងាចថ្ងៃទី២៩ ខែសីហា ឆ្នាំ២០១៨នេះ នៅលើទំព័រហ្វែសប៊ុក (Facebook) របស់ លោក អ៊ីសុខឡេង អភិបាលក្រុងព្រះសីហនុ បានបង្ហាញថា រាល់ថ្ងៃនេះ រដ្ឋបាលក្រុង បានសហការជាមួយមន្ទីរជំនាញចុះវាស់វែង ទប់ស្កាត់ការសាងសង់ថ្មីៗ រំលោភលើចិញ្ចើមផ្លូវសាធារណៈ ដីអូរ និងធ្វើកំណត់ហេតុណែនាំ ឲ្យម្ចាស់សំណង់ឲ្យរុះរើ និងវាយកម្ទេចដោយខ្លួនឯង។
លោកអភិបាលក្រុងបន្តថា ក្នុងករណីចុះធ្វើកំណត់ហេតុណែនាំ មិនក្រោម ២ដង ម្ចាស់ទីតាំងទាំងនោះ នៅតែមិនព្រមរុះរើ និងវាយកម្ទេចដោយខ្លួនឯង រដ្ឋបាលក្រុង នឹងសហការជាមួយមន្ទីរជំនាញ ចុះទៅរុះរើ និងវាយកម្ទេចចោល ដូចមាននៅក្នុងរូបភាពខាងក្រោមនេះ។
លោក អ៊ី សុខឡេង ឲ្យដឹងដូច្នេះ រួចសង្កត់ធ្ងន់ថា រដ្ឋបាលក្រុងព្រះសីហនុ នឹងបន្តសហការជាមួយមន្ទីរជំនាញ ចុះវាស់វែង ទប់ស្កាត់ រុះរើ និងវាយកម្ទេចចោលដូចភ្លៀងរលឹម ចំពោះសំណង់ធ្វើពីឥដ្ឋ គ្រោងដែក និងឈើ ដែលសាងសង់រំលោលើចិញ្ចើមផ្លូវសាធារណៈ និងអូរ..។
លោក អ៊ី សុខឡេង បន្តថា កន្លងមកការប្រើកំលាំងមនុស្ស ( ប្រជាការពារ ) ដើម្បីរុះរើ និងវាយកម្ទេចសំណង់ពិតជាលំបាក ដូច្នេះ ដើម្បីអនុវត្តការងារនេះ បានលឿន និងមានប្រសិទ្ធភាព រដ្ឋបាលក្រុងព្រះសីហនុ នឹងទិញឡានអាអ៊ិចកង់កៅស៊ូ ១គ្រឿង ទុកសម្រាប់បម្រើឲ្យការកម្ទេច សំណង់ណា ដែលសាងសង់រំលោភលើដីចិញ្ចើមផ្លូវ ដីអូរ និងដីសាធារណៈ៕ ដោយ៖ ដែន សីមា
