ក្រុមទំនើង២នាក់និងបក្ខពួកប្រើដាវកែច្នៃដេញវាយគ្នាទាំងកណ្ដាលរាត្រី ផ្អើលអស់អ្នកភូមិភ្ញាក់ក្រញ៉ាំង ត្រូវបានឃាត់ខ្លួន

កំពង់ស្ពឺ៖ ស្នងការដ្ឋាននគរបាលខេត្ដកំពង់ស្ពឺ បានឲ្យដឹងថាដោយទទួលបានព័ត៌មានពីប្រជាពលរដ្ឋថាមានក្រុមអ្នកលេងដាវឯក ដេញវាយកាប់គ្នានៅចំណុចផ្លូវលំ ភូមិត្រពាំងសាលា ឃុំនិទាន ស្រុកបសេដ្ឋ។ តាមហេតុការណ៍ខាងលើក្រុមក្មេងទំនើង បានធ្វើសកម្មភាពពួនស្ទាក់ដោយគប់ដុំថ្ម និងយកដាវកែច្នៃប្រវែង៥០សង់ម៉ែត្រកាប់ម៉ូតូជនរងគ្រោះឈ្មោះ ប៉ុន សាល ភេទប្រុស អាយុ២៧ឆ្នាំ រស់នៅភូមិត្រពាំងសាលា ឃុំនិទាន ស្រុកបសេដ្ឋ ខេត្តកំពង់ស្ពឺ ។

លោកវរសេនីយ៍ឯក ចន សុភីត អធិការ នគរបាលស្រុកបសេដ្ឋ បានបញ្ចេញកំលាំងត្រៀមអន្ដរាគមន៍ បានចេញប្រតិបត្ដិការស្រាវជ្រាវបង្រ្កាបបានមុខសញ្ញាចំនួន ០២នាក់ ៖ ១-ឈ្មោះ ឌឹម ផាន់ណេត ភេទប្រុស អាយុ ១៧ឆ្នាំ រស់នៅភូមិសាឡាំ ឃុំពោធិម្រាល ស្រុកបសេដ្ឋ ខេត្តកំពង់ស្ពឺ។ ២-ឈ្មោះ សន វុទ្ធី ភេទប្រុស អាយុ ២២ឆ្នាំ រស់នៅភូមិម្រាលត្នោតខាងជើង ឃុំពោធិម្រាល ស្រុកបសេដ្ឋ ខេត្តកំពង់ស្ពឺ ។

សមត្ថកិច្ចដកហូតវត្ថុតាងមធ្យោបាយជិះធ្វើសកម្មភាព រួមមាន ម៉ូតូ០១ គ្រឿងម៉ាកហុងដា125cc ពណ៌ខ្មៅ សេរីឆ្នាំ២០២០ ស្លាកលេខ ភ្នំពេញ 1IJ -8971 និងដាវកែច្នៃ ០១ដើម ។

រីឯជនសង្ស័យ ជាបក្ខពួកបានគេចខ្លួន សមត្ថកិច្ចកំពុងបន្តស្រាវជ្រាវ -ឈ្មោះ ស រដ្ឋ ហៅប៉ោង -ឈ្មោះ រ ម៉ៅ ហៅខ្មៅ

បច្ចុប្បន្នជនសង្ស័យរួមជាមួយវត្ថុតាងសមត្ថកិច្ចបានកសាងសំណុំរឿងបញ្ជូនមកការិយាល័យជំនាញ នៃស្នងការដ្ឋាននគរបាលខេត្តកំពង់ស្ពឺ ចាត់ការតាមនីតិវិធីច្បាប់ ៕ រក្សាសិទ្ធដោយ៖សុទ្ធលី