នេះជារឿងថ្មីចែស ដែលធ្វើឲ្យអ្នកលេងបណ្តាញសង្គម ការភ្ញាក់ផ្អើល និងហួសចិត្តខ្លាំងតែម្តង ខណៈបានឃើញបុគ្គលបន្លំធ្វើជាព្រះសង្ឃម្នាក់ បានរត់យ៉ាងលឿនខ្មាញ់ ដើម្បីគេចខ្លួនពីការតាមចាប់របស់អាជ្ញាធរ បន្ទាប់ពីបានរកឃើញថា កំពុងដើរបិណ្ឌបាតបោកប្រាស់ទឹកចិត្តប្រជាពុទ្ធបរិស័ទ។
យ៉ាងណាមិញ វីដេអូនៃហេតុការណ៍កម្លាំងអាជ្ញាធរ ដេញតាមចាប់ខ្លួនលោកសង្ឃក្លែងក្លាយ ដែលបង្កឲ្យមានការភ្ញាក់ផ្អើលនេះ ត្រូវបានដឹងថា បានកើតឡើងនៅបុរីសែនមនោរម្យ ភូមិកន្ទោកជើង សង្កាត់កន្ទោក ខណ្ឌកំបូល កាលពីព្រឹកថ្ងៃទី១៥ ខែកុម្ភៈ ឆ្នាំ២០២៥។
បើតាមអ្នកបង្ហោះវីដេអូ បានបញ្ជាក់ប្រាប់ថា បុគ្គលក្លែងខ្លួនជាព្រះសង្ឃរូបនោះ ត្រូវបានកម្លាំងអាជ្ញាធរចាប់បញ្ចូលរថយន្តផងដែរ។ ប៉ុន្តែ មិនដឹងថា បន្ទាប់មក អាជ្ញាធរនឹងចាត់ការដាក់ទោសទណ្ឌ ឬ ក៏គ្រាន់តែយកទៅធ្វើការអប់រំ រួចដោះលែងវិញ ឬយ៉ាងណានោះទេ ខណៈពុំឃើញមានរបាយព័ត៌មានណាមួយ ចេញផ្សាយពីករណីនេះនៅឡើយ ព្រោះប្រជាពលរដ្ឋពិតជាចង់ឃើញណាស់ ដើម្បីចំណាំមុខទុក។
ទាក់ទងនឹងលោកសង្ឃក្លែងបន្លំនេះផងដែរ បើតាមបងប្អូនប្រជាពលរដ្ឋ បានឲ្យដឹងថា យោងតាមការសង្កេតជាក់ស្តែង នោះបច្ចុប្បន្ននេះ ឃើញថាមានលោកសង្ឃដ៏គួរឲ្យសង្ស័យច្រើនណាស់ (ទាំងមិនដែលស្គាល់មុខ) បានដើរបិណ្ឌបាតយក [ជាបច្ច័យ] ជំនួសឲ្យការដាក់ជា [ចង្ហាន់] តាមទំនៀមទម្លាប់ប្រពៃណី ដោយព្រឹកឡើងបើកភ្នែកមិនទាន់ទេ មកដល់មុខផ្ទះ ឬតូបលក់ដូរហើយ មិនដឹងចេញពីផ្ទះជួលម្ដុំណានោះទេ? ព្រោះមិនមែនជាព្រះសង្ឃក្នុងវត្តស្រុកភូមិផងហ្នឹង!!៕
