កាលពីប៉ុន្មានឆ្នាំមុន រដ្ឋាភិបាលចិន បានទិញផ្ទះប្រជាជនដែលរស់នៅទីតាំង សម្រាប់ការសាងសង់ផ្លូវថ្មី ដោយនឹងផ្តល់សំណងដ៏សមរម្យ។ តែចម្លែកខុសគេតែម្ចាស់ផ្ទះមួយនៅទីក្រុង Jinxi ភាគនិរតីនៃទីក្រុងសៀងហៃ បានបដិសេធទទួលយកសំណងដែលមិនពេញចិត្ត របស់រដ្ឋាភិបាលនោះទេ ដោយសង្ឃឹមថានឹងទទួលបានកិច្ចព្រមព្រៀងកាន់តែប្រសើរជាងនេះ។
ទោះជាយ៉ាងណា, ការរឹងរូស និងសេចក្តីចង់បានដ៏ហួសប្រមាណ បានធ្វើឲ្យម្ចាស់ផ្ទះនោះខកចិត្តយ៉ាងខ្លាំង ដោយសារតែរដ្ឋាភិបាលបានសម្រេចចិត្តសាងសង់ផ្លូវព័ទ្ធជុំវិញទ្រព្យសម្បត្តិរបស់បុរសនោះ ជំនួសឱ្យការចំណាយលុយ ទៅតាមការទាមទារដ៏មិនសមហេតុផលរបស់គាត់ ខណៈដែលម្ចាស់អចលនទ្រព្យផ្សេងទៀតទាំងអស់ នៅក្នុងតំបន់បានលក់ដីរបស់ពួកគេទៅឱ្យរដ្ឋាភិបាល ដោយទុកឱ្យម្ចាស់ផ្ទះនោះ រស់នៅឯកោកណ្តាលផ្លូវហាយវេតែឯង។
លោក Huang Ping ដែលជាម្ចាស់ផ្ទះរឹងរូស បានប្រាប់អ្នកយកព័ត៌មានទាំងទឹកមុខក្រៀមក្រំថា «ប្រសិនបើខ្ញុំអាចបង្វិលពេលវេលាត្រឡប់មកវិញបាន ខ្ញុំនឹងយល់ព្រមតាមលក្ខខណ្ឌនៃការរុះរើដែលពួកគេផ្តល់ជូន… ឥឡូវនេះមានអារម្មណ៍ថា ខ្ញុំចាញ់ការភ្នាល់ដ៏ធំមួយ ខ្ញុំពិតជាសោកស្តាយខ្លាំង»។
តាមប្រភពព័ត៌មានបានឲ្យដឹងថា បុរសចំណាស់ដ៏រឹងរូសនោះ ដែលរស់នៅជាមួយចៅប្រុសអាយុ ១១ ឆ្នាំ ត្រូវបានផ្តល់សំណងជូន ១.៦ លានយន់ (ស្មើនឹង ២២០,៧០០ ដុល្លារ) ។ តែទោះជាយ៉ាងណា បុរសចំណាស់រូបនេះបានបដិសេធទទួលយកទេ ដោយសង្ឃឹមថា នឹងទទួលបានការផ្តល់ជូនកាន់តែល្អជាងនេះ ដោយគាត់បានវាយតម្លៃខ្ពស់លើការចាប់អារម្មណ៍របស់អាជ្ញាធរចិន ចំពោះទ្រព្យសម្បត្តិរបស់គាត់ តែទីបំផុត គាត់ក្លាយជាម្ចាស់ «ផ្ទះក្រចក» ដែលជានិមិត្តរូបនៃការតស៊ូរវាងម្ចាស់ផ្ទះរឹងរូស និងរដ្ឋចិន។
ខណៈពេលកំពុងសាងសង់ផ្លូវ លោក Huang ត្រូវបានដឹងថា បានត្រូវឆ្លងកាត់លូបេតុង ដើម្បីចាកចេញពីផ្ទះដាច់ស្រយាលនៅកណ្តាលផ្លូវហាយវ៉េ ដោយបានចំណាយពេលភាគច្រើននៅកណ្តាលក្រុង Jinxi ដែលនៅឆ្ងាយពីសំឡេងរំខាន ពីការដ្ឋានសំណង់ជុំវិញផ្ទះរបស់គាត់ ហើយត្រឡប់មកវិញតែនៅពេលល្ងាចពេលកម្មករចាកចេញ។ ប៉ុន្តែគាត់បារម្ភថា អ្វីៗនឹងកាន់តែអាក្រក់ទៅៗ នៅពេលដែលផ្លូវហាយវេនេះត្រូវបានសម្ពោធ។ ជាក់ស្តែង ដំបូលផ្ទះរបស់គាត់ស្មើនឹងផ្លូវម៉ូតូឡាន ហើយសំឡេងរំខាននៃចរាចរណ៍ដែលឆ្លងកាត់ ច្បាស់ជាទ្រាំមិនបាននោះទេ។
សម្រាប់ពេលនេះ ផ្ទះក្រចករបស់ Huang Ping គឺជាកន្លែងទាក់ទាញទេសចរណ៍ដ៏ចម្លែកមួយ ដោយសារតែទីតាំងមិនធម្មតារបស់វា នៅចំកណ្តាលផ្លូវហាយវេ ប៉ុន្តែការចាប់អារម្មណ៍ទាំងអស់នេះ គឺគ្រាន់តែចង់រំលឹកបុរសចំណាស់នេះ អំពីការសម្រេចចិត្តមិនល្អរបស់គាត់ប៉ុណ្ណោះ៕
