នេះជាដំណឹងដ៏ល្អមួយ សម្រាប់បងប្អូនដែលមានក្រដាសប្រាក់រៀល ចាស់ ទក់ ឬ រហែក ដែលមិនអាចចាយបាន គឺពេលនេះ មានសង្ឃឹមហើយ ខណៈដែលធនាគារជាតិនៃកម្ពុជា បានប្រកាសថា នឹងទទួលប្តូរលុយរបស់បងប្អូនប្រជាពលរដ្ឋ ដែលមានបញ្ហាដូចបានរៀបរាប់ខាងលើ នៅទូទាំងសាខារាជធានី-ខេត្ត។
ជាក់ស្តែង ធនាគារជាតិនៃកម្ពុជាសាខាខេត្តកំពង់ធំ នៅថ្ងៃទី១៧ ខែកុម្ភៈ ឆ្នាំ២០២៥ បានប្តូរប្រាក់រៀលថ្មី ជូនពលរដ្ឋម្នាក់រស់នៅក្នុងឃុំបល្ល័ង្ក ស្រុកបារាយណ៍ ខេត្តកំពង់ធំ ដែលប្រាក់សន្សំរបស់គាត់បានឆេះខូចខាត ដោយសារភ្លើងឆេះផ្ទះ។ ការប្តូរជូននេះធ្វើឡើងដោយអនុលោមតាមលក្ខខណ្ឌជាក្រដាសប្រាក់រៀលពិតប្រាកដ មិនក្លែងក្លាយ និងគោលការណ៍វាយតម្លៃដែលរក្សាទ្រង់ទ្រាយដើមនៃក្រដាសប្រាក់លើសពី ៧០%។
ធនាគាជាតិនៃកម្ពុជា ក៏បានបញ្ជាក់បន្ថែមថា សាធារណជនអាចបន្តប្តូរក្រដាសប្រាក់រៀលចាស់ ទក់ ឬរហែក យកប្រាក់រៀលថ្មីដោយមិនគិតកម្រៃសេវា នៅតាមសាខាធនាគារជាតិនៃកម្ពុជា រាជធានី-ខេត្ត ដែលនៅជិតផ្ទះ រៀងរាល់ម៉ោងធ្វើការ៕
