ភ្នំពេញ៖ ការដាក់តាំងស្លាកយីហោរបស់អាជីវកម្មដ្ឋាននានា នាពេលកន្លងមកនេះ រដ្ឋបាលរាជធានីភ្នំពេញ បានមើលឃើញថា មានម្ចាស់អាជីវកម្មដ្ឋានទេសចរណ៍ជាច្រើន បានដាក់តាំងស្លាកយីហោ អាជីវកម្ម ជាភាសារបរទេស ដូចជា ភាសាអង់គ្លេស ចិន និងកូរ៉េ ជាដើម ដោយគ្មានអក្សរខ្មែរ ឬអក្សរខ្មែរនៅពីខាងលើ តាមការកំណត់របស់ច្បាប់។ រដ្ឋបាលរាជធានី សូមស្នើឲ្យម្ចាស់អាជីវកម្មដ្ឋាន ដែលដាក់តាំងស្លាកយីហោ ជាភាសាបរទេសទាំងអស់ ប្រញ៉ាប់ផ្លាស់ប្តូរចេញជាបន្ទាន់ ដោយទុកឱសានវាទរយៈពេល១ខែ បើមិនដូច្នោះទេ រដ្ឋបាលរាជធានីភ្នំពេញ នឹងមានវិធានការតាមផ្លូវច្បាប់។
ចំណែកលោក ហួត ហៃ អភិបាលរងរាជធានីភ្នំពេញ បានថ្លែងថា កន្លងមកនេះ ក្រសួងទេសចរណ៍ ក៏ដូចជារដ្ឋបាលរាជធានីភ្នំពេញ ធ្លាប់បានចេញសារាចរណែនាំ អំពី ការដាក់តាំងស្លាកយីហោអាជីវកម្មដ្ឋាននេះ ប៉ុន្តែនៅមានម្ចាស់អាជីវកម្មដ្ឋានមួយចំនួន នៅមិនព្រមគោរព និងអនុវត្តន៍តាម ដូច្នេះរដ្ឋបាលរាជធានីភ្នំពេញ បានកំណត់ពេលទុកឱ្យ២សប្តាហ៍ សម្រាប់ម្ចាស់អាជីវកម្មដ្ឋានទាំងអស់ ដែលដាក់តាំងយីហោជាភាសាអង់គ្លេស ចិន ធ្វើការកែប្រែ ដោយដាក់អក្សរខ្មែរ នៅខាងលើវិញ ហើយបើចង់ដាក់អក្សរបរទេស ត្រូវដាក់ខាងក្រោម និងមានទំហំ តូចជាងអក្សរខ្មែរ១ភាគ២។
លោក ហួត ហៃ បានបញ្ជាក់ទៀតថា បន្ទាប់ពីដាក់ឱសានវាទនេះតទៅ នឹងចាត់ក្រុមការងារ ចុះពិនិត្យមើល បើរកឃើញថា ម្ចាស់អាជីវកម្មដ្ឋានណាមិនគោរព និងមិនអនុវត្តន៍តាមនោះទេ រដ្ឋបាលរាជធានីភ្នំពេញ នឹងមានវិធានការផ្លូវច្បាប់។ ក្រៅពីនោះ លោក ហួត ហៃ ក៏បានជម្រុញឱ្យមានការស្នើសុំអាជ្ញាប័ណ្ណ សម្រាប់បង្កើតអាជីវកម្ម និងបន្តសុពលភាពសម្រាប់អ្នកដែលបានស្នើសុំរួចហើយ ឱ្យបានរួសរាន់ ដោយមកដាក់ពាក្យស្នើសុំនៅតាមច្រកចេញចូលតែមួយ នៃរដ្ឋបាលរាជធានីភ្នំពេញ នៅអគារថ្មី និងត្រូវបង់កម្រៃទៅតាមច្បាប់កំណត់ ។ សម្រាប់ការស្នើសុំប្រកបអាជីវកម្ម និងសុំបន្តអាជីវកម្មនេះ រដ្ឋបាលរាជធានីភ្នំពេញ បានកំណត់ទុករយៈពេល១ខែ គិតចាប់ពីថ្ងៃជូនដំណឹងនេះតទៅ ។ ១ខែក្រោយ ក្រុមការងារនឹងចុះទៅត្រួតពិនិត្យ អាជីវកម្មដល់ទីតាំងជាក់ស្តែង បើពុំមានលិខិតអនុញ្ញាត ឬ អាជ្ញាប័ណ្ណទេ ម្ចាស់អាជីវកម្មទាំងនោះ ប្រឈមនឹងបិទទ្វារអាជីវកម្មតែម្តង៕ ដោយ៖កូឡាប
