ត្បូងឃ្មុំ៖ជំនួបនៃតុលាការខេត្តត្បូងឃ្មុំនិងតុលាការខេត្តតៃនិញ បានជួបផ្លាស់ប្តូបទពិសោធន៍គ្នា ដើម្បីទទួលបានចំណេះដឹងថ្មី ថែមទៀត ក្នុងនាមជាខេត្តភូមិផងជាប់គ្នា ឲ្យបានយល់កាន់តែច្បាស់អំពីអង្គច្បាប់ និងការជំនុំជម្រះ រកយុត្តិធម៌ជូនប្រជាជន។
តុលាការខេត្តត្បូងឃ្មុំ ប្រទេសកម្ពុជា និងតុលាការខេត្តតៃនិញប្រទេសវៀតណាមនៅថ្ងៃទី២៤ ខែវិច្ឆិកា ឆ្នាំ២០១៧ បានជួបពិភាក្សាគ្នា នៅសាលាដំបូងខេត្តត្បូងឃ្មុំ។ ការជួបពិភាក្សាគ្នានេះខាងខេត្តត្បូងឃ្មុំរបស់កម្ពុជាដឹកនាំដោយលោក គឹម ហេង អនុប្រធានតុលាការ និងខេត្តតៃនិញប្រទេសវៀតណាមដឹកនាំដោយលោកស្រី ង្វៀង ធិទៀតវុន អនុប្រធានតុលាការខេត្តតៃនិញ។ដោយទាំងខាងខេត្តត្បូងឃ្មុំ និងខេត្តតៃនិញបានធ្វើបទបង្ហាញលើការជំនុំជម្រះក្តីរៀងៗខ្លួន។
លោក គឹម ហេង បានលើកឡើងថាការជួបពិភាក្សាគ្នានេះពិតជាមានសារសំខាន់ណាស់លើការផ្លាសប្តូរបទពិសោធន៍គ្នាទៅវិញទៅមក និងជាពិសេសស្វែងយល់អំពីអង្គច្បាប់រវាងប្រទេសទាំង២ផងដែរ ធ្វើយ៉ាងណាដើម្បីទប់ស្កាត់បទល្មើស និងស្វែងរកយុត្តិធម៌ជូនប្រជាជន។
ជាមួយគ្នានោះលោកស្រី ង្វៀង ធិទៀតវុន បានលើកឡើងដែថា ជាការពិតការជួបផ្លាស់ប្តូបទពិសោធន៍គ្នានាពេលនេះគឺទទួលបានចំណេះដឹងថ្មីថែមទៀតពីគ្នាទៅវិញទៅក្នុងខេត្តភូមិផងជាប់គ្នា និងម្យ៉ាងខាងខេត្តតៃនិញបានយល់កាន់តែច្បាស់អំពីអង្គច្បាប់ និងការជំនុំជម្រះរកយុត្តិធម៌ជូនប្រជាជនរបស់តុលាការខេត្តត្បូងផងដែរ។
ក្រោយការជួបពិភាក្សាគ្នាក្រុមការងារតុលាការខេត្តទាំង២ក៏បានពិសារអាហារសាមគ្គីដើម្បីបង្ហាញពីកិច្ចសហប្រតិបត្តិការ និងភាពស្និទ្ធស្នាលគ្នាផងដែរ៕ ដោយ៖បញ្ញាស័ក្តិ
