បុរសជនជាតិចិនម្នាក់ បានធ្វើឲ្យអ្នកប្រើប្រាស់អ៊ីនធើរណែត ភ្ញាក់ផ្អើលយ៉ាងខ្លាំង បន្ទាប់ពីបានដឹងថាបុរសរូបនេះបានធ្លាក់ខ្លួនជាជនរងគ្រោះ ខាត់បង់ប្រាក់អស់ជិត ៣ ម៉ឺនដុល្លារ ដោយសារក្រុមបោកប្រាស់ដែលដំណើរការដោយប្រើកម្មវិធី AI ដើម្បីបង្កើតរូបភាព និងវីដេអូជាក់ស្តែងរបស់នារីវ័យក្មេង ដើម្បីទាក់ទាញការចាប់អារម្មណ៍។
សារព័ត៌មាន CCTV News បានរាយការណ៍ឲ្យដឹងថា បុរសឈ្មោះ Liu បានលង់ស្នេហ៍ជាមួយស្រ្តីឈ្មោះ Jiao បន្ទាប់ពីបានស្គាល់គ្នាតាមរយៈបណ្តាញសង្គម។ តែអ្វីដែលមិននឹកស្មានដល់នោះ គឺចុងក្រោយ បុរសរូបនេះត្រូវបានខាតបង់ផ្នែកហិរញ្ញវត្ថុដ៏ធំ ដោយសារ Jiao ដែលបានចាប់ផ្តើមខ្ចីលុយពី Liu សម្រាប់ហេតុផលផ្សេងៗ ដូចជាការវិនិយោគអាជីវកម្ម និងការចំណាយលើការវះកាត់សម្រាប់សមាជិកគ្រួសារ។
អ្វីដែលធ្វើឲ្យកាន់តែជឿទុកចិត្តនោះ គឺនាង Jiao ថែមទាំងបង្ហាញអត្តសញ្ញាណប័ណ្ណរបស់នាងទៀតផង។ ហើយដើម្បីបញ្ចុះបញ្ចូល Liu, នាង Jiao ថែមទាំងបង្កើតអត្តសញ្ញាណប័ណ្ណរបស់នាង ដើម្បីបញ្ជាក់ថានាងពិតជាមនុស្សពិតប្រាកដ។
នារីរូបនេះក៏បានចែករំលែកកំណត់ត្រាវេជ្ជសាស្រ្តរបស់សមាជិកគ្រួសាររបស់នាង និងការបញ្ជាទិញរបស់នាង សម្រាប់ “អាជីវកម្ម” របស់នាង ហើយ Liu បានធ្លាក់ចូលទៅក្នុងអន្ទាក់។
បុរសនេះបានចាប់ផ្តើមផ្ទេរប្រាក់ទៅនាង Jiao តាមអ៊ិនធរណេត ដែលគិតជាទឹកប្រាក់សរុបរហូតដល់ទៅ 200,000 យន់ (ស្មើនឹង 27,615 ដុល្លារ) ទោះបីជាមិនដែលជួបមុខនារីម្នាក់នេះសូម្បីតែមួយដងណាឡើយ បន្ទាប់ពីមានទំនាក់ទំនងជាមួយនាងអស់រយៈពេល ២ ខែ។
បន្ទាប់មក Liu មានការសង្ស័យលើនារីម្នាក់នេះដែលគាត់កំពុងលង់ស្នេហ៍ជាមួយ ហើយមានអារម្មណ៍ថាធ្វើឲ្យនឿយណាយក្នុងចិត្តខ្លាំង ដូច្នេះគាត់បានទូរស័ព្ទទៅប៉ូលីសដែលទម្លាយព័ត៌មានដ៏អាក្រក់ ទៅកាន់ Liu អំពីក្រុមបោកប្រាស់។
អាជ្ញាធរចិនក៏បានរកឃើញរូបភាពដែល ស្រ្តីឈ្មោះ Jiao បានផ្ញើទៅកាន់ Liu ដែលបង្ហាញថា នាងកំពុងរស់នៅក្នុងជីវិតប្រចាំថ្ងៃរបស់នាងដូចមនុស្សធម្មតា៕
