យ៉ាងហោចណាស់មនុស្ស ៥ នាក់ បានស្លាប់ និង ២៧ នាក់ផ្សេងទៀត រងរបួស នៅក្នុងឧបទ្ទវហេតុធ្នឹមបេតុងនៃស្ពានអាកាសគម្រោងផ្លូវល្បឿនលឿន នៅជិតផ្លូវ Rama 2 សង្កាត់ Chom Thong ទីក្រុងបាងកក បានដួលរលំ កាលពីវេលាម៉ោង ១ និង ៤៨ នាទី រំលងអាធ្រាត្រថ្ងៃទី ១៥ ខែមីនា ឆ្នាំ២០២៥។
ប៉ូលីសស្រុក Bang Mod បាននិយាយថា ឧប្បទ្ទវហេតុនេះបានកើតឡើង គឺនៅពេល «ធ្នឹម» បេតុងស្ពានដែលកំពុងសាងសង់ ចំងាយប្រហែល ២០០ ម៉ែត្រ ពីផ្លូវចូលមហាវិថី ស្រាប់តែបាក់ស្រុត បណ្តាលឲ្យមនុស្សស្លាប់ និងរបួសជាច្រើននាក់ ខណៈនៅពេលកើតហេតុមានកម្មករជាង ២០ នាក់ កំពុងធ្វើការនៅការដ្ឋានសំណង់។
ក្រុមអ្នកជួយសង្គ្រោះ និងមន្ត្រីមកពីនាយកដ្ឋានបង្ការ និងកាត់បន្ថយគ្រោះមហន្តរាយទីក្រុងបាងកក បានប្រញាប់ប្រញាល់ទៅកាន់កន្លែងកើតហេតុ ដើម្បីស្វែងរក និងជួយអ្នកនៅរស់រានមានជីវិត។
គិតត្រឹមម៉ោង៧ព្រឹកថ្ងៃទី១៥ មីនា កម្មករ៥នាក់ ត្រូវបានគេអះអាងថាស្លាប់។ ក្នុងចំណោមអ្នកស្លាប់ទាំង៥នាក់នោះ គឺមានជនជាតិថៃ ៣នាក់ ក្នុងនោះមានវិស្វករម្នាក់ កម្មករថៃ ២នាក់ និងពលករបរទេស ២នាក់។ ហើយទន្ទឹមនឹងនេះ យ៉ាងហោចណាស់ មានជនរងគ្រោះ ២៧ នាក់ផ្សេងទៀត បានរងរបួស។
ក្រុមអ្នកជួយសង្គ្រោះបានទាញជនរងគ្រោះបួននាក់ ចេញពីគំនរបាក់បែក ខណៈមនុស្សម្នាក់នៅបាត់ខ្លួន។ អ្នករបួសត្រូវបានបញ្ជូនទៅកាន់មន្ទីរពេទ្យក្បែរនោះដើម្បីព្យាបាល។
កម្មករម្នាក់នៅកន្លែងកើតហេតុ បាននិយាយថា គាត់បានឮសំឡេងលាន់យ៉ាងខ្លាំង ចេញពីសំណង់ មុនពេលវាបាក់រលំ។
នៅជិតផ្លូវចោមថងត្រូវបានបិទទាំងស្រុង ខណៈដែលប្រតិបត្តិការជួយសង្គ្រោះនៅតែបន្ត។ បច្ចុប្បន្ន វិស្វករ និងប៉ូលីស កំពុងស៊ើបអង្កេតមូលហេតុនៃការដួលរលំសំណង់ស្ពានអាកាសល្បឿនលឿននេះ៕
