បើតាមប៉ូលិសស្រុក Temerloh ប្រទេសម៉ាឡេស៊ី បានឲ្យដឹងថា មានស្ត្រី៣នាក់ បានមកដាក់រាយការណ៍អំពីករណីនេះ ដែលនាំទៅដល់ការចាប់ខ្លួនបុរសអាយុ ៤១ ឆ្នាំ ម្នាក់នៅឯផ្សារ Ramadan កាលពីថ្ងៃទី១២ ខែមីនា ឆ្នាំ២០២៥។ បុរសរោគចិត្តរូបនេះ បាននិងកំពុងរស់នៅជាមួយមេរោគអេដស៍ អស់រយៈពេល ១៣ ឆ្នាំ មកហើយ។
សារព័ត៌មាន Sinar Harian បានរាយការណ៍ថា បុរសដែលអត់ការងារធ្វើនេះ បានព្យាយាមបង្ហាញអំពីភាពត្រឹមត្រូវនៃសកម្មភាពរបស់ខ្លួន ដោយអះអាងថា មិនបានមានទំនាក់ទំនងស្និទ្ធស្នាលជាយូរមកហើយ ដោយសារតែការផ្ទុកមេរោគអេដស៍អស់រយៈពេល ១៣ ឆ្នាំ ប៉ុន្តែបានប្រើប្រាស់វាជាលេសក្នុងការបៀតបៀនស្ត្រីនៅឯទីប្រជុំជន ឬផ្សារតែម្តង។
ជាក់ស្តែង សាក្សីម្នាក់ដែលគណនី TikTok ឈ្មោះ zackrazbundle ប្រទះឃើញករណីនេះដោយចៃដន្យ បានកត់ត្រាសកម្មភាពរបស់ជនសង្ស័យ ហើយបានបង្ហោះវីដេអូ ចូលទៅក្នុងបណ្តាញផ្សព្វផ្សាយសង្គម។
ជាមួយភស្តុតាងនេះ ជនសង្ស័យបានសារភាពថា ខ្លួនពិតជាបានជាប់ពាក់ព័ន្ធទៅនឹងទង្វើនេះមែន ដោយចេតនាដើរធ្វើជាជំពប់លើជនរងគ្រោះ និងបៀតបៀនលើរាងកាយពួកគេ។
ប៉ូលីសក៏បានបញ្ចេញឲ្យដឹងផងដែរថា ជនរងគ្រោះទីមួយជាស្ត្រីអាយុ ២៦ ឆ្នាំ ត្រូវបានគេរាយការណ៍ថាត្រូវបានបៀតបៀនកាលពីថ្ងៃទី៦ ខែមីនា ខណៈដែលជនរងគ្រោះទីពីរ និងទីបីដែលមានអាយុ ២៣ និង ២៧ ឆ្នាំ បាននិយាយថា ករណីដ៏ស្លុតចិត្តនេះបានកើតឡើងចំពោះពួកគេកាលពីថ្ងៃទី១០ ខែមីនា។
ជនរងគ្រោះទាំងអស់បានអះអាងថា ពួកគេត្រូវបានបៀតបៀន ខណៈពេលពួកគេកំពុងដើរទិញអាហារ ហើយពេលនោះជនសង្ស័យបានដើរមកប៉ះទង្គិចលើពួកគេ រួចយកដៃស្ទាបដើមទ្រូង និងគូទ។
ប៉ូលីសក៏បានបញ្ជាក់ដែរថា ជនសង្ស័យមានកំណត់ហេតុចំនួន ៥ ករណីរួចហើយ ពាក់ព័ន្ធនឹងគ្រឿងញៀន និងឧក្រិដ្ឋកម្ម។ ហើយករណីនេះកំពុងស្ថិតក្រោមការស៊ើបអង្កេត ខណៈជនសង្ស័យត្រូវបានឃុំខ្លួន តាមមាត្រា ៣៥៤ នៃក្រមព្រហ្មទណ្ឌ៕
