មហាជនពិតជាមានក្តីតក់ស្លុត និងក៏ដូចខឹងសម្បារយ៉ាងខ្លាំង ក្រោយពីបានឃើញវីដេអូចែករំលែក បង្ហាញរថយន្ត HighLander ១គ្រឿងបានបើកបុកម៉ូតូ បណ្តាលឲ្យបុរសម្នាក់បាក់ភ្លៅ និងបែកក្បាល រងរបួសធ្ងន់ធ្ងរ ហើយរថយន្តបង្កនោះក៏បានបើករត់គេចខ្លួន ដោយមិនទទួលខុសត្រូវនោះទេ បើទោះជាបងប្អូនប្រជាពលរដ្ឋ ធ្វើសកម្មភាពស្ទាក់ឃាត់យ៉ាងណាក៏ដោយ។
ហេតុការណ៍នេះ បានកើតឡើងស្ថិតនៅចំណុចផ្លូវភ្លោះ បុរីពិភពថ្មីចំការដូង នៅវេលាម៉ោងប្រហែល ២ រសៀល ថ្ងៃទី២១ ខែមីនាឆ្នាំ២០២៥ ។ រថយន្តបង្កម៉ាក HighLander ពណ៌ស ពាក់ស្លាកលេខ (កំពង់ធំ 2B-5236) បានបើករត់គេចបាត់ស្រមោល ខណៈជនរងគ្រោះ ត្រូវបានបងប្អូនប្រជាពលរដ្ឋហៅរថយន្តសង្គ្រោះ ដឹកយកទៅសង្គ្រោះបន្ទាន់ភ្លាម និងបច្ចុប្បន្ន កំពុងសម្រាកព្យាបាលនៅមន្ទីរពេទ្យលោកសង្ឃ។
ទោះជាយ៉ាងណា នៅពេលនេះ ម្ចាស់រថយន្ត HighLander ដែលបានបើកបង្កគ្រោះថ្នាក់ដល់អ្នកដំណើរ នៅក្នុងបុរីចំការដូង ត្រូវបានស្គាល់អត្តសញ្ញាណហើយ ដោយប្រភពមួយបានបញ្ចេញឲ្យដឹងថា គឺមានឈ្មោះ អោក ពន្លឺស័ក្តិ អាយុ ៥៤ឆ្នាំ មុខរបរគ្រូបង្រៀន មានទីលំនៅនៅ ភូមិ ថ្នល់ថ្មី ឃុំ បារាយណ៍ ស្រុក បារាយណ៍ ខេត្តកំពង់ធំ។
តាមរយៈនេះ ក៏សូមលោក អោក ពន្លឺស័ក្តិ ប្រញាប់ចូលខ្លួនមកដោះស្រាយ និងទទួលខុសត្រូវចំពោះជនរងគ្រោះ កុំបន្តព្យាយាមរត់គេច ព្រោះថាទោះខំប្រឹងជ្រែកដីទៀត ក៏សមត្ថកិច្ចរកឃើញដែរ៕
