នេះជារឿងមួយដ៏នឹកស្មានមិនដល់ ខណៈដែលថ្មីៗនេះ អ្នកគ្រូបង្រៀនម្នាក់ បានចែករំលែកបទពិសោធន៍ ពីផលប៉ះពាល់ដោយសារការប្រើប្រាស់ហ្វឺត និងផ្តាំផ្ញើដល់លោកគ្រូអ្នកគ្រូ សូមមានការប្រុងប្រយ័ត្ន ជាពិសេសគឺត្រូវពាក់ម៉ាក់ ខណៈយកហ្វឺតមកសរសេរ ព្រោះអ្នកគ្រូផ្ទាល់ ដោយសារប្រើប្រាស់ហ្វឺតសរសេរច្រើន ដោយមិនបានការពារ បាននាំឲ្យមានចំណែកកើតជំងឺមហារីកមួយនេះ។
នេះបើយោងតាមគណនីហ្វេសប៊ុកឈ្មោះ THIDA ដែលជាអ្នកគ្រូបង្រៀនដ៏មានប្រជាប្រិយម្នាក់ នៅលើបណ្តាញសង្គម តាមរយៈទឹកដៃសរសេរអក្សរស្អាតដូចបោះពុម្ភ និងចែករំលែកវិធីសាស្រ្តបង្រៀនថ្មីៗ ព្រមទាំងស្វះស្វែងរកជំនួយ ដើម្បីជួយដល់កូនសិស្សក្រីក្រ បានបង្ហោះសារយ៉ាងដូច្នេះថា៖ «ផ្ដាំទៅលោកគ្រូអ្នកគ្រូ ពេលសរសេរហ្វឺតពាក់ម៉ាស់ផង
ដោយសារខ្ញុំប្រើហ្វឺតបាវ សរសេរអក្សរច្រើន វាជាកត្តាមួយចំណែកបណ្ដាលកើតនូវជំងឺមហារីកនេះ»។
ជាក់ស្តែង អ្នកគ្រូខាងលើ ក៏បានបង្ហាញពីលទ្ធផលវះកាត់ត្រង់ផ្នែកបំពង់ក និងបានរៀបរាប់ថា «បន្ទាប់ពីវះហើយ ឥឡូវដឹងលទ្ធផលសាច់ខ្ញុំជាសាច់មហារីក បងប្អូនណាស្គាល់ពេទ្យឯកទេសខាងកំពេញទីរ៉ូអ៊ីតជួយប្រាប់ខ្ញុំផង ចង់ដឹងពិគ្រោះជំងឺសាច់នេះ ពឹងបងប្អូនជួយស៊ែរផង»។
ទន្ទឹមនឹងនេះ អ្នកគ្រូ ក៏បានបញ្ជាក់ប្រាប់តាមរយៈខមិន អំពីរោគសញ្ញាជំងឺមហារីកដំណាក់កាលដំបូងនេះថា គឺវាធ្វើឲ្យឆាប់ហត់ ឆេវ និងញ៉ាំបាន ប៉ុន្តែស្គម។ អ្នកគ្រូក៏បានណែនាំថា ប្រសិនបើមានអាការ «អួលៗក» សូមប្រញាប់ឲ្យពេទ្យពិនិត្យទៅ!។
តែយ៉ាងណាមិញ ក្រោយពីបានឃើញអ្នកគ្រូប្រាប់ថា កើតជំងឺមហារីកក្រពេញទីរ៉ូអ៊ីត ដោយសារហ្វឺត, ក៏មានគណនីហ្វេសប៊ុកឈ្មោះ Sreynit Banchhorm បានឆ្លើយតបពន្យល់ថា «ប្រសិនបើអ្នកគ្រូមានជំងឺទៅលើក្រពេញទីរ៉ូអ៊ីត គឺមិនបណ្ដាលមកពីហ្វឺតនោះទេអ្នកគ្រូ។ ព្រោះជំងឺទីរ៉ូអ៊ីត គឺវាបណ្ដាលមកពីក្រពេញទីរ៉ូអ៊ីតផលិតអរម៉ូនលើស ឬខ្វះ បណ្ដាលអោយពក.ក។ ចំពោះការប្រើប្រាស់ហ្វឺត គឺទឹកហ្វឺតអាចបណ្ដាលអោយមានបញ្ហាខ្លះៗទៅនឹងសួត ពោលគឺផ្លូវដង្ហើម (មិនទាន់មានប្រភពច្បាស់លាស់បញ្ជាក់ពីផលប៉ះពាល់របស់ទឹកហ្វឺតនៅឡើយទេ) ។ ដូច្នេះការពាក់ម៉ាស់ជាជម្រើសល្អ ហើយខណៈពេលប្រើប្រាស់ហ្វឺតសរសេរ ឬ ដីសរ គួរនៅក្នុងបន្ទប់មានផាសុខភាព គឺមានខ្យល់ចេញចូលគ្រប់គ្រាន់។
ជាមួយគ្នានេះ អ្នកគ្រូក៏បានឆ្លើយតបថា៖ «ដោយសារខ្ញុំប្រើហ្វឺតបាវឡើងចូលរាប់រយហ្វឺត ហើយក៏មិនដែលពាក់ម៉ាស់ដែរ ខ្ញុំផុសគ្រាន់តែចង់ឲ្យការពារប្រសើរជាងព្យាបាលប៉ុណ្ណោះ។គោរពអរគុណបង»៕
