ភ្នំពេញ ៖ មន្ទីរសុខាភិបាល នៃរដ្ឋបាលរាជធានីភ្នំពេញ កាលពីថ្ងៃទី២៦ ខែមីនា ឆ្នាំ២០២៥ បានចេញលិខិតបំភ្លឺដល់ម្ចាស់គេហទំព័របណ្តាញសង្គម Facebook ដែលមានឈ្មោះ Mommy Natural ឱ្យលុបវីដេអូ និងខ្លឹមសារចំណងជើង ដែលបានផ្សព្វផ្សាយថា ការលេបប្រមាត់ទាកាប៉ាស្រស់ ធ្វើឱ្យអ្នកជំងឺកាត់ប្រមាត់មានសុខភាពល្អធម្មតា ។
ការចេញលិខិតបំភ្លឺនេះ ក្រោយពីមន្ទីរសុខាភិបាល នៃរដ្ឋបាលរាជធានីភ្នំពេញ បានឃើញម្ចាស់គេហទំព័របណ្តាញសង្គម Facebook Mommy Natural បានបង្ហោះរូបភាព វីដេអូ និងខ្លឹមសារចំណងជើង(Caption)ថា «ចែករំលែក ស៊ែរយកបុណ្យផងបងប្អូន ដើម្បីឱ្យអ្នកដែលកាត់ប្រម៉ាត់រួចដូច ខ្ញុំបានដឹង ព្រោះល្អណាស់ជាបទពិសោធន៍ផ្ទាល់តែម្តង។ ផ្លិចបើកៗខ្ញុំបាត់បង់ប្រម៉ាត់ ១ឆ្នាំ៧ខែហើយ តែសុខភាពខ្ញុំល្អ ជាធម្មតា ញ៉ាំអីបានគ្រប់យ៉ាងមិនមានតមអ្វីទាំងអស់ ដោយសារញ៉ាំប្រម៉ាត់ទាកាប៉ាស្រស់ៗនេះឯង» ៕ រក្សាសិទ្ធដោយ៖សុទ្ធលី
