រូបភាពកាំរស្មីអ៊ិច ពីម៉ាស៊ីនស្វែងរកយោធាអាមេរិក បានបង្ហាញមនុស្សជាច្រើនទៀត ដែលកំពុងជាប់នៅក្នុងគំនរកំទេចកំទី ដែលគ្របដណ្ដប់ដោយស្រទាប់ស៊ីម៉ងត៍ នៃអគារបាក់ស្រុត ក្នុងហេតុការណ៍គ្រោះរញ្ជួយដី ខណៈកម្លាំងសង្គ្រោះបានរកឃើញសាកសព ៥ នាក់ទៀត បន្ទាប់ពីមានក្លិនមិនល្អ។
នេះយោងតាមទំព័រហ្វេសប៊ុក Fire & Rescue Thailand នៅថ្ងៃទី១ ខែមេសា ឆ្នាំ២០២៥ បានបញ្ចេញរូបភាពកាំរស្មីអ៊ិចពីម៉ាស៊ីនស្រាវជ្រាវ ដែលប្រើដោយយោធាសហរដ្ឋអាមេរិក បានរកឃើញមនុស្សជាច្រើនទៀត ដោយមិនដឹងថានៅរស់ ឬស្លាប់ កំពុងជាប់គាំងក្នុងគំនរកម្ទេចថ្ម នៅអគារការិយាល័យសវនកម្មរដ្ឋ ដែលដួលរលំ ប៉ុន្តែនៅមិនទាន់អាចយកចេញបានទេ។ ទោះជាយ៉ាងណា នេះគ្រាន់តែជាព័ត៌មាន ពីផ្កាយរណបប៉ុណ្ណោះ ខណៈចំនួនលើសពីនេះយ៉ាងណា មិនត្រូវបានដឹងច្បាស់នោះទេ។
ក្រោយមក នៅវេលាម៉ោង ១០ និង ៣០ នាទី ព្រឹកថ្ងៃទី១ ខែមេសា មន្ត្រីបានរកឃើញសាកសព ៥ នាក់ ទៀត បន្ទាប់ពីរកឃើញមានក្លិនស្អុយ នៅក្រោមអគារ។ ពួកគេបានចល័តគ្រឿងចក្រធុនធ្ងន់ ដើម្បីលើកបំណែកថ្ម និងស្វែងរកអ្នកបាត់ខ្លួន និងអ្នកស្លាប់ជាបន្ទាន់ ដោយសង្ឃឹមថានឹងរកអ្នកនៅរស់បន្ថែមទៀត។
ជាមួយគ្នានេះ សមាគមឆ្លើយតបគ្រោះមហន្តរាយប្រទេសថៃ បានបង្ហាញឱ្យដឹងថា វេលាម៉ោង ៨ និង៣០នាទីព្រឹកថ្ងៃទី១ មេសា លោក Chadchart Sittipunt អភិបាលក្រុងបាងកក បានកោះប្រជុំផែនការជួយសង្គ្រោះ ដើម្បីត្រៀមកាត់ និងលើកបន្ទះបេតុងធំៗ (តំបន់ B) និងចាប់ផ្តើមបេសកកម្មភ្លាមៗ៕
