ថ្មីៗនេះ មហាជននៅលើបណ្តាញសង្គម បានផ្ទុះការរិះគន់ក្តៅគគុកទៀតហើយ ក្រោយពីបានឃើញទង្វើប៉ូលិសចរាចរមួយក្រុម ដែលដាក់គោលដៅ ត្រង់ចំណុចហួសផ្សារព្រៃទទឹង ផ្លូវជាតិលេខ៣ គ្មានទំនួលខុសត្រូវ ក្រោយពីបានធ្វើសកម្មភាពស្ទាក់ចាប់រថយន្តផាកពិន័យ បង្កឲ្យមានគ្រោះថ្នាក់ដល់រថយន្តផ្សេង ដែលគ្មានកំហុសអ្វី ដោយនាំគ្នាលើកបារ៉ាស់ ចាកចេញពីកន្លែងចាប់ផាកពិន័យយ៉ាងប្រញាប់ប្រញាល់ ដែលឃើញហើយពិតជាហួសថ្លែងតែម្តង។
ជាក់ស្តែង តាមរយៈវីដេអូដែលម្ចាស់រថយន្តរងគ្រោះថត បានបង្ហាញរថយន្តស៊េរីទំនើប Toyota Rav4 រងការខូចខាតផ្នែកខាងមុខយ៉ាងដំណំ ដែលគេជឿថាជាលទ្ធផល បុកគូទរថយន្ត Ford ខាងមុខ ដែលត្រូវបានក្រុមប៉ូលិសទាំងនោះ ស្ទុះចេញស្ទាក់ចាប់ភ្លាមៗ ជាហេតុធ្វើឲ្យរថយន្ត Ford ចាប់ហ្វ្រាំងយ៉ាងប្រថុចញ៉ុច បណ្តាលឲ្យរថយន្ត Rav4 បើកស្របមកពីក្រោយ អកហ្សឺជាន់ហ្វ្រាំងមិនទាន់ បុកពេញទំហឹងតែម្តង។
អ្វីដែលហួសចិត្តខ្លាំងបំផុតនោះ គឺបន្ទាប់ពីបានបង្កឲ្យកើតមានគ្រោះថ្នាក់ចរាចរណ៍នេះហើយ ស្រាប់តែក្រុមប៉ូលីសទាំងនោះ នាំគ្នារើតុ កៅអី ចាកចេញពីកន្លែងកើតហេតុយ៉ាងប្រញាប់ប្រញាល់ គេចរៀងៗខ្លួន ដោយគ្មានការទទួលខុសត្រូវ ចំពោះទង្វើរបស់ពួកខ្លួនសោះឡើយ បើទោះជាម្ចាស់រថយន្តរងគ្រោះ ហៅឃាត់ទាមទារឲ្យដោះស្រាយករណីនេះយ៉ាងណាក៏ដោយ។
ពិតណាស់ ក្រោយបានឃើញពីទង្វើដ៏គ្មានការទទួលខុសត្រូវនេះរួចភ្លាម មហាជនបាននាំគ្នារិះគន់ព្រលះឲ្យយ៉ាងចាស់ៗដៃ។ ក្នុងនោះ ពលរដ្ឋម្នាក់បានដាក់បែបនេះថា «ក្រុមពួនឆ្មក់ ប៉ះថ្ងៃស៊យ ប្រហែលលួចដាក់តែគ្នាឯង បានខ្លាចបែបនេះ, សង្ឃឹមថាថ្នាក់លើ នឹងហៅមន្ត្រីប៉ូលិសដែលពាក់ព័ន្ធ ទៅធ្វើការឆ្លើយបំភ្លឺជុំវិញរឿងនេះ ព្រោះយើងជាមន្ត្រីអនុវត្តន៍ច្បាប់ មិនគួរណា មានបញ្ហាហើយនាំគ្នាដើរចេញចឹងទេ ហើយក៏សង្ឃឹមថា ការអនុវត្តច្បាប់មានតម្លាភាព ចំពោះមន្ត្រីខិលខូចមួយចំនួនតូច ដែលធ្វើអោយប៉ះពាល់ដល់ស្ថាប័នជាតិទាំងមូលបែបនេះ៕
