លោក ឌួង ឆាយ សម្រេចប្រគល់កូនស្រី ទៅឲ្យអតីតប្រពន្ធ អ្នកនាង ដេត ម៉ាលីណា ដោយការស្ម័គ្រចិត្ត តាមកាលកំណត់របស់អាជ្ញាសាលា

ភ្នំពេញ ៖ នៅថ្ងៃទី២ខែមេសា ឆ្នាំ២០២៥ អាជ្ញាសាលានៃសាលាដំបូងរាជធានីភ្នំពេញ សូមជម្រាបដល់សាធារណជនមេត្តាជ្រាបថា កាលពី ថ្ងៃទី២៦ ខែមីនា ឆ្នាំ២០២៥ អាជ្ញាសាលា បានចេញលិខិតជូនដំណឹងស្តីពីការអនុវត្តលេខ ៩៣ ច.ច.អ/២៥ បង្គាប់ឱ្យឈ្មោះ ឌួង ឧត្តមឆវិន (ហៅ ឌួង ឆាយ) ភេទប្រុស សញ្ជាតិខ្មែរ ត្រូវធ្វើការអនុវត្តដោយស្ម័គ្រចិត្តដោយប្រគល់កូនស្រី ឈ្មោះ ឌួង រាជនីគុជ ភេទស្រី កើតថ្ងៃទី២៦ ខែកក្កដា ឆ្នាំ២០១៩ ឱ្យទៅឈ្មោះ ជេត ម៉ាលីណា ភេទស្រី សញ្ជាតិខ្មែរ ដែលត្រូវជាម្តាយ និងជាម្ចាស់បំណុលនៃការអនុវត្ត ឬប្រគល់ឱ្យមកអាជ្ញាសាលានៃសាលាដំបូងរាជធានីភ្នំពេញ តាមអំណាច នៃដីកាសម្រេចលេខ ០៨ក្រVIIសអ. ដកស ចុះថ្ងៃទី០៧ ខែមិថុនា ឆ្នាំ២០២៤ របស់សាលាឧទ្ធរណ៍ភ្នំពេញ ឱ្យបាន ឆាប់រហ័សក្នុងរយៈពេល៧ (ប្រាំពីរ)ថ្ងៃ គិតចាប់ពីថ្ងៃជូនដំណឹងនេះ រហូតដល់ថ្ងៃទី២ ខែមេសា ឆ្នាំ២០២៥ វេលាម៉ោង ដប់ប្រាំពីរ និងសូន្យនាទី ជាកំហិត។

ក្រោយពីឈ្មោះ ឌួង ឧត្តមឆវិន (ហៅ ឌួង នាយ) បានទទួលលិខិតជូនដំណឹងស្តីពីការអនុវត្តខាងលើរួចមក នៅថ្ងៃទី២ ខែមេសា ឆ្នាំ២០២៥ វេលាម៉ោងដប់ប្រាំមួយ និងសែសិបប្រាំនាទី នៅចំពោះមុខអាជ្ញាសាលា ឃើញថា ឈ្មោះ ឌួង ឧត្តមឆវិន (ហៅ ឌួង ឆាយ) បានស្ម័គ្រចិត្តប្រគល់កូនស្រីឈ្មោះ ឌួង រាជនីគុជ ភេទស្រី កើតថ្ងៃទី២៦ ខែកក្កដា ឆ្នាំ២០១៩ ឱ្យទៅឈ្មោះ ដេត ម៉ាលីណា ភេទស្រី សញ្ជាតិខ្មែរ ដែលត្រូវជាម្តាយ នៅបន្ទប់អាជ្ញាសាលានៃ សាលាដំបូងរាជធានីភ្នំពេញ តាមអំណាចនៃដីកាសម្រេចលេខ ០៨ក្រVIIសអ. ដកស ចុះថ្ងៃទី០៧ ខែមិថុនា ឆ្នាំ២០២៤ របស់សាលាឧទ្ធរណ៍ភ្នំពេញ រួចរាល់ហើយ៕ រក្សាសិទ្ធដោយ៖សុទ្ធលី